Thupphuan 11 - Zanniat Bible

Lingpuitute Pahnih

¹ Tehfung a bangmi fungkek pakhat i pe ai, “Feh tulai Pathian ai biakinn le puleng teh ta tu; cen biakinn songai Pathian a biatute siar tu.

² Ikhalselai biakinn tualvan tu teh mah, zaimantifangin Pathian ling lo mite hnenah pe zo ai ciamite in hla sawmli le hla hnih song Khuapui Thiang heh cimpil tuh sek i.

³ I lingpuitute pahnih, buri hnikpon thawn thuam in, hlat tuh ing; anite in Pathian thu tu prophet bangin ni thawng khat le ni zahnih le sawmruk song rel kawm tuh i,” tiin ti i.

⁴ Ciami lingpuitute pahnih tu laivum Bawipa hmaiah a dingtu Olive thingkungte pahnih le maikhuatte pahnih i.

⁵ Anite siatsuah a tumtu a ralte hmuahhmuah heh amahte ka songin a suakhnak mai in siatsuah tuh i; ciatihin anite tuahmawh a tumtu heh rekhnak tuar tuh i.

⁶ Van pit thil thu nai ai Pathian thu a phuang song tu van in ruah si tuh lo i. Ti vum ahkhai thu nai ai cirhtite heh thisan ah cangruai thai i. Laivum tu amahte daih cancan ah urhnak a phunphun in cawhthilhnak nai i.

⁷ Anite thurel ben fangin tawpnailo khur songin a suakmi sahrang in tawng tuh i. Neh tuhai rek tuh i.

⁸ Cen a luang tu a Bawipa thinglamteh vumah rekhnak khuapui lampui ah zam tuh i. Ciami khuapui ai hming khel tu Sodom ihlahle Egypt i.

⁹ Miphun cang, hin cang le pong cang ai mi zongzong in amahte luang heh ni thum le hrek song sik tlang tuhai a phum tuh khai kham tlang tuh i.

¹⁰ Hemi prophette pahnih thi manin laivum minungte tu ang tlang tuh i. Amahte anghnak puai bawn tlang tuhai pakhat le pakhat lehsawng sum dun tuh i, zaimantifangin he prophette pahnih manin laivum mi harsahnak tam ze tuar tlang zo i.

¹¹ Ikhalselai ni thum le hrek hnuaah Pathian hnenin nunhnak petu haihawh hleng ai amahte songah lut in anite tu kawi tlang tuh i; ciami a hmutu hmuahhmuah heh tihik tlang tuh i.

¹² Cen prophette pahnih in van in, “Heta ah kai tu ih,” tiin a titu ai aw cawm ngai za tlang i. A ralte ai mithmuh rori ah anite tu mairo thawn vancung ah kai tlang i.

¹³ Cia laitak rori ah a roh ngai in hlinhlin ai khuapui seuhra ai seukhat hnawm sek i; minung thawng sarih thi i. Midangte tu kih le lau in um tlang ai vancung Pathian ai thawmlian zia hmu tlang ai thangphat tlang i.

¹⁴ A kihkul pahnihhnak bo i, inapui pathumhnak a rai hlanah hleng tuh i.

Thirhlung Pasarihhnak

¹⁵ Cen a pasarihhnak vancungmi in a thirhlung tum ai vancung ah a cawm ngai aw in, “Laivum uk benhnak huham heh kin Bawipa le a Messiah kut songah um zo ai kumzangza in kumzangza tian amah in uk tuh i,” tiin ti tlang i.

¹⁶ Ciafangin Pathian hmaiah amahte bawi tohkham vumai a totu upate kul hluanli tu bok tlang ai Pathian bia tlang i,

¹⁷ Anite in, “Hmualnaiber Bawipa Pathian, tunah a ummi le hlanah a um awng zomi! A thawmlian na huham larruai ai ukhnak ham na pan zo manin thang na phat ing.

¹⁸ Na thinraw a larhnak can hleng ai mithite thukhan can a khim manin, Pathian sang lote thinraw tlang roh i. Na cengfa prophette le na upattu na minungte a ham a sen in perman ngah tlang can hleng i. Laivum siatsuahtute siatsuah can hleng zo i,” ti tlang i.

¹⁹ Vancung ai a umhnak Pathian biakinn hong tlang ai ciata ah Thutiam Kuang um i. Cen vantlingtleleuh zutzo i, khuari dumdo i, hlinhlin ai rial a rohpui in tla i.