Ṭahhlapawl 3 - Zanniat Bible

Cawhhnak, Sirhnak Le Umlamhnak

¹ Pathian ai cawhhnak a hardan, A thinrawhnak fungkek a lingtu ing.

² Tleuhnak um lo khuathim songah phum deuhdeuh in i tul i.

³ Ninghiohnak zaikhai um loin, Sunnivui catloin i vit i.

⁴ I vun zik ai i tik lar i, I ruhte khai ek sek i.

⁵ Thawnginn pit bikraw ah i khum i, Vansang thinharhnak thawng songah.

⁶ I nuam lo kong in i umruai i, Thihhnak khuathim rimsia lakah.

⁷ Thir cikcin in i khit i, Luat tuhin umlamhnak nai lo thawngtla ing.

⁸ Pathian hnenah bawmhnak ngen in au ing, Ikhalselai i auhnak ngai nuam lo i.

⁹ Sawn kongin vak betbo ing, I herhnak hmuncang ah lungtlep in i kham i.

¹⁰ Vom bangin i bawh i, Chintit bangin i zoi i.

¹¹ Lampui in i hnawt isi, I hlai dek ai i zam zel isi.

¹² A li er ai, a conkiang hmuisunghnak in i hmang i.

¹³ A conkiang in i sai ai, I lung songah a thukpui in lut i.

¹⁴ Miphunte in sunnivui hnih i san tlang i, Amahte ca ahcen hnihsarelhnak huatsuak la bang menma ing.

¹⁵ I duh lo kong in tikha i dingruai ai, Tuarhnak a kha roh khiah rong bangin i airuai i.

¹⁶ I hmai tu laipua ah i rawt ai, Lungto ah i kam ekruai sek i.

¹⁷ Lungmuang daphnak in i zam i, Anghnak tu zaibang ini? ti rin hih nawn lo ing.

¹⁸ A raipui i nung tuh nawn lo i, Bawipa hnenai i umlamhnak bo zo ihang.

¹⁹ Inn le lo nai loin i tuarhnak hnelhno heh i ruat fangin kaimah caah thihsi kha roh thawn bang i.

²⁰ Ciami catloin ruat ai thin i nau cuahco i.

²¹ Ikhalselai umlamhnak hleng leh i, Hemi thil pakhat i ling fangin.

²² A kho ngai Bawipa ai ithnak tu zaikom inkhai cat awng lo i. A ninghiohnak tu tawp nia nai lo i.

²³ Zing lam khuavar bangin thar ṭiode i; Rintlak a ihnak tu a thawmlian i.

²⁴ I covo tu Bawipa lek i; Ciamanin i umlamhnak a hnenah dah tuh ing.

²⁵ Bawipa tu pha i, Amah a ringtute ca ahcen.

²⁶ Thinsau ngai ai iang heh kinmah caah a pha ber i, Amah ai kin ohnak iang khiah.

²⁷ Ciami thinsauhnak zir heh no lai can ah pha ber i.

²⁸ Harsahnak kin tuar fangin, Thinsau le dapthen in to tuh ising.

²⁹ Hniatacuhhnak thawn kin lu ut tuh ising; Zaimantifangin umlamhnak um thai pang lai i.

³⁰ Zohsuamhnak le vithnak kin tuar inkhai tuar tuh cuahco ising.

³¹ Bawipa tu mi ninghiotu i, Kumzangza in kin hnawl tuh lo i.

³² Lungsiahnak kin pe khalselai, A ngaihharhnak lar tuh i; Amah ai a kin ithnak tu rinsantlak i.

³³ Lungawihnak zaikhai nai lo i, Kin lungsiahnak le kin tuarhnak ahhen.

³⁴ Bawipa in ling sio i, Thawnginn ai laipua lakah fonhnak kin tuar fangin cen.

³⁵ Amah in ling sio i, Amah ai pehnak covo kin ngah lo fangin.

³⁶ Amah in ling sio i, Thukhanhnak hmunah thudik dingpui lo fangin.

³⁷ Bawipa ai tumtekhnak tel loin, Zaikhai bawnsuak thil lo i.

³⁸ Cungnungber thupehnak bangin, a hnawm le a pha cang ṭen i.

³⁹ Zaimanin minungte phuncam tlang thliahthlo ini? Amahte sual manin cawhhnak a tuar fangin.

⁴⁰ Kin nuncan heh sikfel leh ngasing khaw Bawipa hnenah let ngasing.

⁴¹ Vancung Pathian hnenah kin kut lek ilo in kin thinlung khai pe ngasing. Cen hetihin sawngen ngasing.

⁴² “Na hmaiah kin sual ai ral na cai tlang zo i ing; Cen, Aw Bawipa, nang in kin ngaithiam lo isi.

⁴³ Na thinrawhnak in thuam dun isi; Ninghiohnak zaikhai nai loin kin hnawh ai kin rek isi.

⁴⁴ “Na thinrawhnak khuanimpui tu Kin sawngenhnak in pel thil lo i.

⁴⁵ Nangmah in ningdulkul hnawmborh bangin kin bawn isi, Laivum pumpuhluk miphun hmaiah.

⁴⁶ “Kin ralte hmuahhmuah in zohsuam nautathnak ponkam thawn kin sawi i.

⁴⁷ Siatsuahhnak le pairalhnak tawk tlang zo i ing; Thinlauhnak kihkulhnak songah um i ing.

⁴⁸ I minungte hnawmcanhnak tawk tlang manin i mithli tu runpui bangin luang i.

⁴⁹ “I mithli tu cirhti bangin catloin suak ṭiode i.

⁵⁰ Bawipa in vancung in, i sik ai i hmu hlanlo com awng lo i.

⁵¹ Lung i sia ai thin i ur i, Khuapui song nupangte vumah thil a hlenghnak manin.

⁵² “Vaniu bangin thang in kin awk i, Thula um lo ai i huatu ralte in.

⁵³ I nungcing in khur songah i hla i, Lungto in khuk i, cia khur khiah.

⁵⁴ Ti in i phum cuahco i, I thi cing tuh i bang hang, ti ing.

⁵⁵ “Khur thuk songin, Aw Bawipa nangmah na ko ing.

⁵⁶ I kohnak aw ngai tuhin na ngen fangin i ngai sah isi.

⁵⁷ I auhnak aw tu i sawn ai, “Lau malaw,” i ti isi.

⁵⁸ “Kaimah ṭan tuhin kawi ai, Aw Bawipa, i nunhnak tu o ngah zo isi.

⁵⁹ I thu tu fel ngai in i khan sah tu; I vumah anite khelh zia ling hlen isi.

⁶⁰ I ralte in i hmuhheh zia le I engsan zia ling hlen isi.

⁶¹ “Aw Bawipa, mi zohsuamhnak le i engsanhnak hmuahhmuah ling sio isi.

⁶² Sunnivui kaimah thu lek rel ai Kaimah zuar tuhhnak thu lek ngaisung tlang i.

⁶³ A to fangin ituseh a ding fangin ituseh, i zohsuam ai hnihsarelhnak menma in i hmang tlang i.

⁶⁴ “Aw Bawipa, hetihin bawn manin cawh tu.

⁶⁵ Cukcam tulai thinlung harhnak in dim tuseh.

⁶⁶ Na thinraw in si tulai, Lailung vuman pairalruai tusek law.”