Ṭahhlapawl 1 - Zanniat Bible

Jerusalem Ai Lungsiahnak

¹ Jerusalem tu lungleng in um i, Mi phunkhim umhnak khuapui! Laivum pumpuhluk ai upat awnghnak khuapui tu hmaitong bangin cang zo i! Bawinu bang khua lian, Sal pomhnak ah cang zo i!

² Zan khuavar in kap awm; Mithli a biang ah luang awm! A rualpui aisu khai um lo i, A hnemtu ah pakhat tal khai um lo i. A ṭantute in zuar i, Mi zongzong in tun tu ralcai ihang.

³ Judah mite sal ah cang i, Naper khunghar per tlang i, Bawm tu nai loin; Amahte runinn in fehpui sio i; Miphun dang ramah um tlang i, Kinmah ram ti tuh nai loin! Ralte in kulh sio i, Luathnak lampui nai loin.

⁴ Zion lampui lungsia in um i, Aisu inkhai hlun nawn lo i, Cawlum nia Pathian bia tuhin. Lasatu fenute harsahnak tuar tlang i, Suangbawite kap in rung i. Zion tu thin urhnak tuar i, Khuapui kotkate khing ruahro i.

⁵ A ralte hlawhtling i, Amahte kut songah hup i. Bawipa amah in tuarruai i, A sualhnak tam ze manin, A fate pomhnak tuar i, Lamhlapui ah fehpui sek i.

⁶ Jerusalem ai songlawihnak tu, A bo sa thil i. A hotute khai ṭawnṭai i, Rong lo ai tha nai lo kiho bang i; Thazang zaikhai nai tlang lo i, Sakap thiam hmaiah a dawp fangin!

⁷ Jerusalem tu khuarop ah cang i, lungleng kul i; A songlawi awng zia hih leh de i. A ralte ai kut songah hleng i, Bawmtu aisu khai nai loin. A nehtute in hnihsan i, Zohsuam tlang dekdo i, A hnawmral fangin.

⁸ Hmaizah tlak a ihnak tu bo zo i, Kawngkolh in um ai zohsuam tlang i. A thin ur in kap in ai i, A zakthi in a hmai hup i. Amah lala ningrim ruai i, Jerusalem an a kihkul sualhnak a bawn zo manin!

⁹ A cianghlimlohnak tu lar ngai i; A hmai lam thu tu ruat awng hang lo i. A hnawmhnak tu a kihkul i; Aisu inkhai hnem ben lo i. A ralte in neh zo i; Ninghio ngen in Bawipa ko i.

¹⁰ A ralte in a thil long sio i, A sumsaw hmuahhmuah khai! A mit rori in hmu i, Biakinn song a lut lak khiah. Gentile mite lut tuh loin, Bawipa in a khamhnak hmun ahcen.

¹¹ A minungte kap in rung i; Aih tuh pakhatkhat a hmu tlang fangin. Amahte hlawnthil tu rong thawn thleng dun i, Amahte pumcawmhnak tuhin. “Bawipa, i sik tu,” tiin a khuapui khiah au i; “I harsadan i hmu tu law!” ti i.

¹² “I sik tu law,” tiin au i. A hiangai a vaktu hmuahhmuah hnenah. “Aisu inkhai urhnak tuar awng lo i, Kai i tuarhnak urhnak tluk in; Bawipa ai i pehnak urhnak i, Kaimah vumah thin a raw fangin.

¹³ “Vum lamin mai hlak i, i ruh songai a komi mai i. Kaimah awk tuhin thangtoh ai, laipua lakah i tluruai i. Ciatihin i zam menma ai, Catloin urhnak i tuarruai i.

¹⁴ “I sualhnak hmuahhmuah laibu songah khum sio i; A veksen in hmunkhat ah pen ai i hawng ah i khaih i; A rit ze manin i tlu duldo i, Thazang nai nawn lo ing. Bawipa in i ralte kut songah i hlengruai i; Kaimah caah a hat ze manin Mar ben lo ing.

¹⁵ “Bawipa ai hnihsanhnak menma ah cang tlang i, I ralkap hat ber pawl; A ralkap burkhat kuat i, I tlangvalte rek tuhin. Cabit bangin i minungte rial dek i, Judah fenu ngom khiah!

¹⁶ “Ciamanin i nakhaw i kaphnak, I mithli rialti bangin luang i. Hnemtu aisu khai nai lo ing, Tha thoruaitu aisu khai um lo i. I ral in i neh ngah zo i; I minungte zaikhai nai nawn lo i.

¹⁷ “Bawmhnak daih in i ban pharh ing, Ikhalselai aisu inkhai i bawm lo i. Bawipa in ralte ko i, Khuahacang in i hnenah i kawi tlang i. Amahte lakah zaikhai ilo ing, Ningdulkul thil menma ing.

¹⁸ “Ikhalselai Bawipa tu dik i, A thu eltu i awng zo manin. Aw miphunte i ngai tu ih; I tuardan heh sik tu ih. I leng le valte pairal zo sek i, Salpomhnak hmun ram hlapui ah.

¹⁹ “I ṭantute ko ing, Ikhalselai i bawm nuam tlang lo i. Suangbawi le hotute thi i, Khuapui song lamtluanah ah. Amahte pumpui nung nuam in, Rong a si hmunah.

²⁰ “Aw Bawipa, I vansang zia heh i sik tu; I nun ai a tuardan heh. Thin i ur ai lung i khoi i, Kaimah in na ral sual manin. Lampui vumah rekdunhnak um i, Inn songah khai thihhnak hleng i.

²¹ “I aihramhnak aw i ngai sah tu, I hnemtu aisu khai um nawn lo i. I ralte diriam tlang i, Kaimah vumah hnawmcanhnak na hlengruai manin. Na thukhamhnak nia tu hlengruai tu taito law, I tuar bangin i ralte in tuar tu ve seh.

²² “Amahte bawnhnak hmuahhmuah na hmaiah lar tu sio seh; Amahte phatlohnak hmuahhmuah khai! Anite tu cawh tu, I sualhnak manin nangmah in i cawh zo bangin. Vansang in aihram ing, Thin i pit i,” ti i.