Suahhlannak 9 - Zanniat Bible

Sumhnamte Thihnak

¹ Cen Bawipa in Moses hnenah, “Pharoah hnenah feh tulai a hnenah, ‘Hebrew mite ai Pathian Bawipa in, hetihin ti i: Kaimah i bia thil tuhin i minungte hlat tu.

² Hlat siang loin hen thotho lesikhaw,

³ a rohpui in na cawh tuhai na sumhnam: na siphuhte, na laakte, na kalaukte le na kawlpawrual, na tuurual le na merual vumah urhnak pha lo tla tuh i.

⁴ Israel mite ai sumhnam le Egypt mite ai sumhnam tu hlaihdan tuhai, Israel mite ai sumhnam tu pakhat khai thi tuh lo i.

⁵ Bawipa in a can tiam cia ai thangha rori ah hlengruai tuh i,’ tiin rel tu,” tiin ti i.

⁶ Bawipa ai relhnak bangin a thangha ah hleng ngaingai ai Egypt mite ai sumhnam hmuahhmuah pul sek i; ikhalselai Israel mite ai sumhnam tu pakhat khai thi lo i.

⁷ Pharoah in cia thula heh zong ai Israel mite sumhnam tu pakhat khai thi lo i ti khiah ling i. Ikhalselai Pharoah ai thinlung tu ruh thotho ai Israel mite feh tuh heh daih hrimhrim lo i.

Uihlut Ma

⁸ Cia hnuaah Bawipa in Moses le Aaron hnenah, “Tapkha ai vutkuang huam hnihthum dung in rut tu ilai Pharoah ai hmaiah ciami vutkuang heh Moses in van ah vorh tuseh.

⁹ Egypt ram song hmuahhmuah ah laivut bangin piak tuh sio ai khuahacang ah uihlut ma suakruai tuhai minung le ramsate ciah hmaihma tuh zungzo i,” tiin ti i.

¹⁰ Ciatihin vutkuang khiah tapkha in lang ai Pharoah hmaiah ding kawm i. Moses in vutkuang heh van ah vorh ai minung le ramsa vumah uihlut ma po zungzo i.

¹¹ Egypt ramai dawithiam mite tu Moses hmaiah suak ben tlang lo i, zaimantifangin a dang Egypt mite bang thotho in anite khai uihlut ma po ve bial manin i.

¹² Ikhalselai Pharoah thinlung khiah Bawipa in ruhruai thotho i. Moses hnenah Bawipa ai a rel cia bangin Israel mite tu fehruai nuam cuang lo i.

Rial

¹³ Cen Bawipa in Moses hnenah, “Zingniu in feh tulai Pharoah tawk ta tu. Cen a hnenah, “Hebrew mite ai Pathian, Bawipa in na hnenah, “I minungte in kaimah i bia thil tuhin hlat tu.

¹⁴ Tun ṭum tu na kuthnia tlangsuakte le na minungte vum lek zolo in nangmah vum hrimhrim ah laipua vumah kaimah bang aisu khai um lo i ti ning ling tuhin a rohpui in ning cawh tuh ing.

¹⁵ Nangmah le na minungte vumah i kut dang in urhnak hlengruai inglai nang tu hnawmcan zo i tuh isi.

¹⁶ Ikhalselai laipua vum hmuahhmuah ah i hmingthanghnak zai thil tuhin i hathnak na hmuh ai na nunhnak na zuah lai ing.

¹⁷ Ikhalselai nang incen i minungte vumah na puarthau thotho ai hlat nuam cuang lo isi.

¹⁸ Ngai tu, thangha tun camcu fangin Egypt ram tluanthu ai a um awng kel lo rial a rohpui in tlaruai tuh ing.

¹⁹ Ciamanin, sumhnam ituseh, thil dang hmuahhmuah ituseh, sumpua ai umhnak hmuahhmuah khum tuh sio in thupe tu. Sumpua ai umtu minung le sumhnamte vumah rial tla tuhai inn songah khum lomi hmuahhmuah thi tuh sek i,’ tiin rel ta tu, tiin ti i.

²⁰ Bawipa ai ponghnak a ling fangin Pharoah kuthnia ai tlangsuakte a hrek tu thinlau tlang ai amahte salte le sumhnamte heh inn songah khum tlang i.

²¹ Ikhalselai a hrekkhat incen Bawipa ai ponghnak khiah zaisiar cuang loin a salte le a sumhnamte ciah sumpua ah hlum sio i.

²² Cen Bawipa in Moses hnenah, “Na kut van ah pharh tulai Egypt ramsong hmuahhmuah ai minung ituseh, sumhnam ituseh, lo songai rongkung vum tianin rial sarha tla tuh i,” tiin ti i.

²³ Cen Moses in a faikiang heh van ah dang ai, Bawipa in vantlingtleleuh le khuari le rial thawn laipua khiah burh dekdo i.

²⁴ A roh ngai in rial sarha tla i ai vantlingtleleuh tu khuahacang ah kap zurhzo i. Egypt ram a um panin ciami heh a roh ber khuahu i.

²⁵ Egypt ram pumpalah sumpua ai ummi zongzong, minung ituseh, ramsa ituseh, rial in siatsuah sek i. Lo songai rongkung hmuahhmuah tlu sek ai hampalak ai thing kung hmuah khai ek sio i.

²⁶ Goshen ram Israel mite umhnak lek him i; rial mukhat bangkhai tla lo i.

²⁷ Ciafangin Pharoah in Moses le Aaron ko ai, “Tun ṭum tu kaimah i sual ai Bawipa tu dik i. Kaimah le i minungte kin mawh i.

²⁸ Bawipa hnenah sawngen kawm tu ih. Hemi khuari le rial heh i rim i kham zo i. Suak tuh hrimhrim i si, thu ning kham ing. A rai ning um tuh khai kul lo ihang,” tiin ti i.

²⁹ Moses in Pharoah hnenah, “Hemi khuapui songin i suak sawngpah in Bawipa hnenah i kut pharh tuh ing. Ciafangin khuari lawm tuhai rial tla tuh nawn lo i. Ciatihin laipua heh Bawipa ai i ti ling tuh i si.

³⁰ Ikhalselai nangmah le na kuthnia tlangsuakte in Bawipa Pathian heh ning lau lai lo i ti ling ing,” tiin ti i.

³¹ Rial in vo kung le barley tu hnawmcan sek i. Zaimantifangin vo tu a par laitak i ai, barley khai a lua laitak i.

³² Ikhalselai sangvut le fangnem tu hnawm lo i. Zaimantifangin a lua cu hnua deuh i.

³³ Moses tu Pharoah hlum in khuapui songin suak i. Cen Bawipa hnenah a ban pharh in sawngen ai khuari le rial tla awl ai ruah khai hang i.

³⁴ Pharoah in ruah hang le rial tla nawn loin khuari tlektla khai lawm leh ti a hmu fangin sual leh ai a kuthnia tlangsuakte hnenah ṭang lala i.

³⁵ Moses hnenin Bawipa ai a rel cia bang thotho in Pharoah ai thinlung tu ruh amam ai Israel mite heh hlat nuam lo i.