Suahhlannak 6 - Zanniat Bible

¹ Ciafangin Pathian in Moses hnenah, “Tunai panin Pharoah hnenah thil i bawn tuhhnak heh hmu tuh i si. Israel mite hlat tuhin i ban thahat in hnawt tuh ing. Thungai in tifangin i ban thahat ai hnawn hnua ahcen amah rori in a ram songin hnawt tuh i,” tiin ti i.

Pathian in Moses Ko I

² Pathian in Moses hnenah, “Kai tu Bawipa ing;

³ Cungnungber Pathian tiin Abraham, Isaac le Jacob hnenah lar awng zo ing. Ikhalselai anite hnenah Bawipa, tihnak i hming in lar dun lo ing.

⁴ Cen ramdang mi bang ai a umhnak awng Canaan ram ning pe tuh ing, tiin amahte thawn thutiam bawn zo ing.

⁵ Tunah Egypt mite ai sal tuhin pommi Israel mite au aw za ai i thutiam heh hih hlen ing.

⁶ Ciamanin nangmah in Israel mite hnenah i thu hetihin rel tu, ‘Kai tu Bawipa ing; Egypt mite el thil loin ning perruaihnak naper har songin ning luatruai tuh ing. Amahte sal ning ihnak songin ning o tuh ing. A tihikkul cawhhnak thawn amahte thukhan tuhai i ban thahat thawn ning huphim tuh ing.

⁷ I minung ah ning bawn tuhai Kai tu ning Pathian tuh ing. Egypt mite in ning vumai phurhhnak naper har songin ning suahtu Pathian ing ti khiah i ling tuh i si.

⁸ Abraham, Isaac, le Jacob hnenai i hming sal in i thukhamhnak ramah ning hlengpui tuh ing. Ciami ram khiah ning hnenah ning pe tuh ing. Kai tu Bawipa ing,’ tiin rel tu,” tiin ti i.

⁹ Pathian ai relhnak bangin Moses inkhai Israel mite hnenah rel i. Ikhalselai Moses ai thurelhnak heh ngai zuam lo i; zaimantifangin amahte sualhnak roh ze ai thinpit vansang sio manin i.

¹⁰ Ciafangin Bawipa in Moses hnenah,

¹¹ “Egypt kumpibawi hnenah feh tulai, Israel mite heh na ram songin suakruai tu hrimhrim, tiin rel tu,” tiin ti i.

¹² Ikhalselai Bawipa hnenah Moses in, “Israel mite inrin i thu i ngai hlah lekhaw, akontih in Pharoah in i ngai tuh i?” Pong lamah i hlawhsam ze i,” tiin ti i.

¹³ Cen Bawipa in Moses le Aaron tu Israel mite hoisuak tuh tengteng in a hlat mite i ti khiah Israel mite le Egypt kumpibawi rel tuhin ruai i.

Moses Le Aaron Suahkehhnak

¹⁴ Amahte hin ai sentute tu hetihin i. Israel ai fapa upa ber Reuben ai fapate ah Hanock, Pallu, Hezron le Karmi i. Hemite tu Reuben ai hin tesinfa sentute i.

¹⁵ Simeon ai fapate ah: Jemuel, Jamin, Ohad, Jakhin, Zohar le Canaan nu ai fapa Shaul i; Hemite tu Simeon ai hin sentute i.

¹⁶ Levi ai fapate hming tu, amahte tefate thawn: Gershon, Kohath le Merari i. Hemite tu Levi ai hin sentute i. Levi tu kum za le sawmthum le kum sarih nung i.

¹⁷ Gershon ai fapate tu: Libni le Shimei i ai anite in tesinfate tampui nai kawm i.

¹⁸ Kohath ai fapate tu Amram, Izhar, Hebron le Uzziel i. Kohath tu kum za le sawm thum le kum thum nung i.

¹⁹ Merari ai fapate tu Mahli le Mushi i. Hemite tu Levi ai hin tesinfate ai tluanthu kawm in i.

²⁰ Amram in a pa ai farnu Jokhebed hoi ai Aaron le Moses nai i. Amram tu kum za le sawm thum le kum sarih nung i.

²¹ Izhar ai fapate tu Korah, Nepheg le Zichri i.

²² Uzziel ai fapate tu Mishael, Elzaphan le Sithri i.

²³ Aaron in Amminadab ai fanu, Nashon ai farnu, Elisheba hoi ai Nadab, Abihu, Eleazar le Ithamar nai kawm i.

²⁴ Korah ai fapate tu Assir, Elkanah le Abiasaph i. Hemite tu Korah mi ai songkhatte i.

²⁵ Aaron ai fapa Eleazar in Putiel ai fanu lakah pakhat hoi ai Phinehas nai i. Hemite tu amahte hin ṭen in Levi miphun ai sentute i.

²⁶ Aaron le Moses tu Bawipa in, Egypt in Israel mite suahpui tu ih,” tiin a ruaimi i.

²⁷ Egypt kumpibawi hnenah Israel mite Egypt ram an suah tuh thu a reltute tu amahte thotho i.

Bawipa In Moses Le Aaron Thupehnak

²⁸ Egypt ramai Moses hnenah Bawipa in thu a rel fangin,

²⁹ “Kai tu Bawipa ing; i relhnak hmuahhmuah heh Egypt kumpibawi rel tu,” tiin ti i.

³⁰ Ikhalselai Moses in Bawipa hnenah, “Pong lamah i hlawhsam ze lawmlam i. Akontih in Egypt kumpibawi in i thu i ngai sah tuh i?” tiin ti i.