Suahhlannak 4 - Zanniat Bible

Moses Hnenah Huham Pe I

¹ Moses in, “Ikhalselai Israel mite in i thu i sang tuh lo ai i relhnak i ngai sah loin, ‘Bawipa tu na hnenah lar lo i iti lekhaw, akontih in ti tuh ing,” tiin ti i.

² Ciafangin Bawipa in a hnenah, “Na kut ah ziang awh isi?” tiin Moses khiah zawt ai, “Faikiang pakhat awh ing,” tiin Moses in sawn i.

³ Cen Bawipa in, “laipua lakah lon tucuk,” tiin ti ai Moses in a lon fangin rul ah cang i. Ciafangin Moses tu a khel ah let i.

⁴ Ikhalselai Bawipa in, “Na kut suah tulai a mai in pom tu,” tiin Moses khiah ti i. Cen Moses inkhai a kut suah ai a pom fangin a kut vumah faikiang in cang lehsal i.

⁵ Ciafangin Bawipa in, “Hemi tu Israel mite hnenah amahte pupate ai Bawipa Pathian, Abraham ai Pathian, Isaac ai Pathian le Jacob ai Pathian khiah na hnenah lar zo i, tiin sangthilhnak tuhin i” tiin ti i.

⁶ Cen Moses hnenah Pathian in thu rel lala ai, “Na kut khiah na angki songah thun tucuk,” ti i. A ti bangin Moses in thun i. A kut a suah leh fangin phar sio ai vur bangin a ngomi hmaihma in a kut dim sio i.

⁷ Cen Bawipa in, “Na kut khiah na angki songah thun leh tucuk,” ti i. A ti bangin Moses in thun i. A kut a suah leh fangin a taksa dang bangin cang leh i.

⁸ Ciafangin Bawipa in, “A hmasa ai sullam naimi hnikhnaihhnak pom thil loin sang thil lo inkhai a pahnihhnak sullam naimi hnikhnaihhnak man talah na sang tuh i.

⁹ Hemi hnikhnaihhnak pahnih hnuaah sang tlang thotho lo ai na relhnak khai na ngai sah hlah lekhaw Nile runti lang tulai lai rum vumah burh tu. Ciafangin Lai rum vumah na burhhnak ti ciah thi ah cang tuh i,” ti i.

¹⁰ Moses in Bawipa hnenah, “Bawipa, kai tu i fehruai hram malaw, Thurel thiam khai i awng lo ing. Nangmah in na i tawk hnua ahkhai thurel thiam cuang hlai lo ing. Santlai lo ing ai i pong i fung ai pong i hak fawn i,” tiin ti i.

¹¹ Ciafangin Bawipa in, “Minung tu aisu in karuh pe ini? Aisu in nangong le pongaa heh bawn i?, Aisu in khuahmuthilhnak pe ini? Ihlahle aisu in mit cawruai i? Bawipa kaimah ilo ing maw!

¹² Ciamanin feh tu; na ponghnak ah na bawm tuhai na pong tuh khai na rel tuh ing,” tiin ti i.

¹³ Ikhalselai Moses in, “Bawipa, ning i hio tulai midang pakhatkhat hlat tu sawn,” tiin ti i.

¹⁴ Ciafangin Bawipa khiah Moses hnenah thinraw ai, “Levi mi na unau Aaron um ilo im? Amah ciah pong thiam ngai i ti ling ing. Thungai in tifangin ani tu na tawk tuhin kawi laitak i ai na tawk tuh khiah a tha tho ngai i.

¹⁵ Amah thawn ning pon dun hnuaah a pong tuh rel tuh isi. Ning pahnih in ning pong tuh heh kaimah in ning bawm tuhai ning pahnih in ning bawn tuh khai ning rel tuh ing.

¹⁶ Mi hnenah nangmah aiawh in Aaron in pong tuhai ani tu na hmurka cang tuh i. Nang tu amah ca Pathian ang na cang tuhai a pong tuh reltu tuh isi.

¹⁷ Hemi faikiang na kut ah awh tulai ngaihsunurkul bawnhnak in hmang tu,” tiin ti i.

Moses Tu Egypt Ramah Let I

¹⁸ Cen Moses tu a pu Jethro hnenah feh lehsal ai, “Egypt ramai i songkhatte nung tlang nalai maw ti sik tuhin Egypt ramah let tuhin i hlat tu hram,” tiin ti i. Cen a pu Jethro in a lungkhim ai, “Cak niu in feh tu,” tiin ti i.

¹⁹ Bawipa in Moses tu Midian ramai a um laiah. “Tun tu Egypt ramah let tuhang; zaimantifangin na rek nuamtute thi zo sek ihang,” tiin ti i.

²⁰ Ciamanin Moses in a nupui le a fapate keng ai laak vumah toh ai Egypt ramah letpui i. Pathian ai pehnak faikiang khiah awh meng i.

²¹ Cen Pathian in Moses hnenah, “Tun tu Egypt ramah tlung tuh na imanin bawn tu i tihnak ngaihsunurkul hmuahhmuah heh Pharoah hmaiah bawn tuh sio isi. Ikhalselai Pharoah ai thinlung tu ruhruai tuhai i minungte feh siang tuh lo i.

²² Ciafangin Pharoah hnenah, “Israel tu i fapa upa ber i.

²³ Kaimah i bia thai tuhin i fapa hlat tu, na ti napui hlat siang lo isi. Ciamanin na fapa upa ber rek tuh ing, tiin Bawipa in ti i,’ tiin rel tu,” tiin ti i.

²⁴ Lamlak ai amahte zancam hmunah Bawipa in Moses heh tawk ai rek tum i.

²⁵ Ciafangin Zipporah in lung sandir pakhat lang ai a fapa zarhtan sah i. Ciami lung sandir in Moses ai keruh tok ai Zipporah in, “Nang tu zarhtanhnak thisan suakruaitu i pasal isi,” tiin ti i.

²⁶ Ciamanin Bawipa in Moses nunhnak zuah i. Zarhtanhnak thisan manin a nupui Zipporah in, “Nang tu zarhtanhnak thisan suakruaitu i pasal isi,” a tihnak i.

²⁷ Cen Bawipa in Aaron hnenah, “Moses tawk tuhin nelrawn ah feh tu,” tiin ti i. A ti bangin Bawipa ai tlang thianghlim ah Moses tawk tuhin feh i. Cen Moses a tawk fangin thut i.

²⁸ Moses in Bawipa in a hlat sawng fangin a hnenai a relhnak hmuahhmuah le Bawipa in ngaihsunurkul a bawnhnak le thu a pe mite khai a khimniu in Aaron rel sio i.

²⁹ Cen Moses le Aaron tu Egypt ramah feh kawm ai Israel mite konghoitute kokhawm ai,

³⁰ Bawipa in Moses hnenah a relhnak thu hmuahhmuah heh amahte hnenah Aaron in rel i. Cen mizapui hmaiah Moses in ngaihsunurkul a phuncang bawn i.

³¹ Ciatihin mizapui in sang tlang i. Cen Bawipa khiah amahte vumah ngaihharhnak nai ai reem tuarhnak tepawl khai hmu zo sio i, ti khiah ling fangin a hmaiah ut in bia tlang i.