Suahhlannak 39 - Zanniat Bible

Suangbawi Ca Hnikpon

¹ Suangbawite in hmun thianghlim songah na ruaih can ah a sil tuhin tuuhmul a mepian, a sannum le a san hnikpon songlawi bawn tlang i. Moses hnenah Bawipa ai thupeciahnak bangin Aaron ca ahkhai hnikpon cianghlim bawn tlang i.

² Hawngorh angki cianghlim heh sui, mepian, sannum le a san tuu hmul le a phiarhnak pon mankhung thawn bawn i.

³ Sui tu a tlep a tlep in a tan hnuaah a mepian, a sannum, a san thiamri lakah mawi ngai in coih thil tuhin a pa niuniu in tan leh i.

⁴ Ciami hawngorh angki sihhnak ah kodar bat rite pahnih thawn zom dun i.

⁵ Mawi ngai in takhnak elpen heh ciami kodar bat rite pahnih thawn zom dun i. Moses hnenah Bawipa ai thupeciahnak bangin he elpen khai sui, a mepian, a sannum, a san tuuhmul le a phiarhnak pon mankhung thawn bawn i.

⁶ Lungmankhung san heh tat ai a cingkim ah sui in khap i. Lung vumah mi hming a kher de bangin Jacob ai fapate hlaihnih hming heh ciami lungmankhung san vumah kher i.

⁷ Moses hnenah Bawipa ai thupeciahnak bangin, Israel miphunte hlaihnih aiawh lungmankhung ai cang tuhin kodar bat rite vumah ciami lungmankhung pawl heh bet i.

Suangbawi Sang Ai Kangbet

⁸ Hawngorh angki bangin mawi ngai in coihhnak kangbet khai bawn tlang i. Sui, a mepian, a sannum, a san tuuhmul le a phiarhnak pon mankhung pawl in bawn i.

⁹ A sau le a kau camra dun in hlep hnih in hlep i; Zung kua tia sau le kau i.

¹⁰ Ciami kangbet vumah lungmankhung tluan li in bet i. Tluan khathnak ah a san, a mepian le a sannum lungmankhung in bet i.

¹¹ A tluan hnihhnak ah tangphaw, a pawl le diamond lungvar bet i.

¹² Tluan thumhnak ah a sannum, a san le a tleumi lungmankhung bet i.

¹³ Tluan lihnak ah a tangphaw, a sannum le a varmi lungmankhung bet i.

¹⁴ Lungvar phun hlaihnih bet ai a vumah Jacob ai fapate hin hlaihnih hming khet sio i. Hming khenhnak bangin kher ai lungmankhung pakhat vumah Israel miphun pakhat hming ṭen khet sio i.

¹⁵ Kangbet hrang rihual bangin hualhnak sui ciang in sui khi bawn i.

¹⁶ Sui tlangkhapte pahnih le sui kualte pahnih bawn ai suikualte pahnih tu kangbet ai a vum lam a ning veve ah bet i.

¹⁷ Ciami suikualte pahnih ah sui rite pahnih khit ai,

¹⁸ sui rihual khat lam hmur pahnih heh sui tlangkhapte pahnih ah khit i. Ciatihin hawngorh angki ai hmai lam kodar bat vumah sui tlangkhapte pahnih khiah khaih i.

¹⁹ A dang suikualte pahnih bawn ai kangbet hnia lam ning veve ah a songlam hmur hawngorh angki sangtu ah sih i.

²⁰ Suikualte pahnih bawn lala ai hawngorh angki hmai lam kodar bat hnia lamah khit ai pha bik in takhnak elpen a vum lamah sih i.

²¹ Kangbet vumai suikualte pahnih tu hawngorh angki ai suikualte pahnih thawn a mepian rihual in pen ai ciamanin kangbet heh elpen vumah dolh tuh loin, Moses hnenah Bawipa thupeciahnak bangin kangbet khiah bet hliang i.

A Dang Suangbawite Thuam Bawt I

²² Hawngorh angki hnia ai silhnak angki fualpui tu a mepian tuuhmul ciang in bawn i.

²³ Angki fualpui ah lu munhnak kua pakhat bawn i. Ciami kua a cingkim heh a sil fangin zik tuh loin a rong kam liang i.

²⁴ Ciami angki hnia lam hmur tu a mepian, a sannum le a san tuuhmul le pon mankhung pawl in tale thai zuk cuangin coih i.

²⁵ Sui ciang in sengserelte bawn ai tale thai karlak hnia lam hmur cingkim ah sengserelte khaih i.

²⁶ Moses hnenah Bawipa ai thupeciahnak bangin suangbawi na ruaih ai a silhnak angki fualpui ai a hnia lam hmur cingkim ah tale thai zuk coihhnak le sengserel khaihhnak um i.

²⁷ Aaron le a fapate ca pon mankhung ai takhnak angkite bawn sah i;

²⁸ cen lupawng le lukhuk khai pon mankhung in bawn ai, bongbi com pawl tu a phiarhnak pon mankhung in bawn i.

²⁹ Elpenhnak tu Moses hnenah Bawipa ai thupeciahnak bangin a phiarhnak pon mankhung le a mepian, a sannum, a san tuuhmul thawn mawi ngai in coih liang i.

³⁰ Sui ciang in calbet cianghlim bawn ai a vumah lai khenhnak vumah laingan bangin a vumah, “Bawipa hnenah pehnak,” tiin ngan i.

³¹ Moses hnenah Bawipa ai thupeciahnak bangin ciami calbet tlep khiah lupawng vumah pen cih i.

Naper Ben Tlang I

³² Bawipa umhnak Ponhlam heh ben i. Moses hnenah Bawipa thupeciahnak bangin Israel mite in bawn tlang sio i.

³³ Bawipa umhnak Ponhlam le a thilrite, pon kilhhnak, bangkhang le bangphaite, a tungkhuam le a hniaphahte;

³⁴ a vum khuh hrang tuucang phaw a san ai erhnak, a khuk sintu ah saphaw pha le a khaptu tuhin pon pha mankhung pawl;

³⁵ lung tlephnihte dahhnak Thutiam Kuang le a sin le a laangte;

³⁶ cabuai le cabuai ai thilri le Pathian ca selhnak sang;

³⁷ sui ciang ai bawnhnak maivarhnak khuam, a maivarhnak, a maivarhnak a tluan ai dah tuhhnak pawl, a thilri dangdang le maivarhnak siti,

³⁸ sui ai bawnhnak puleng, thaupawh tuhhnak siti, yihmui rimur, hlam song luthnak dawngkham ponzar,

³⁹ dar ai bawnhnak puleng le khoseng bang ai bawnhnak darpek, a laangte le a thilri hmuahhmuah, kutsomhnak le a hniaphah;

⁴⁰ kulhhnak ponzar, kulhhnak khuam le khuam hniaphahte, luthnak ponzar, a rihualte le ponhlam thil bathnak, Pathian umhnak Ponhlam songai naper fangin a kulhnak thilri hmuahhmuah;

⁴¹ Hmun Thianghlim songai naper fangin suangbawite ai silhnak hnikpon songlawi, suangbawi na a ruaih fangin Aaron le a fapate ai sil tuhhnak hnikpon cianghlim pawl khiah Moses hnenah koih tlang i.

⁴² Moses hnenah Bawipa ai thupeciahnak bangin Israel mite in naper ben tlang zo i.

⁴³ Amahte bawnhnak hmuahhmuah heh Moses in phatak niu in sik ai Bawipa thupeciahnak bangin phatak ngai in bawn i, tiin hmu i. Ciamanin ciamite heh Moses in hmuifu pe i.