Suahhlannak 32 - Zanniat Bible

Sui Kawlpaw Lim

¹ Moses tu tlang vumah can raipui um ai tolh leh zual lo ti khiah Israel mite in a ling fangin Aaron hnenah kawi ai a hnenah, “Egypt ram songai kin hoisuaktu mihingpa Moses khiah ziang cang i ti ling lo ising; ciamanin kin konghoitu tuhin khuavang pakhat kin bawt tu,” tiin ngen tlang i.

² Cen Aaron in, “Ning nupuite ning fapate le ning fanute vuhhnak sui bilvuhte hawk sah tusek ilai i hnenah koih tu ih,” tiin ti i.

³ Ciamanin anite veksen in a sui bilvuhte tu hawk sek ai Aaron hnenah koih tlang i.

⁴ Aaron in bilvuhte heh lang ai mai in sui er ai kawlpaw niu lim bawn i. Ciafangin mizapui in, “Aw Israel mite! Egypt ram an ning suahtu ning khuavang khiah hemi i,” tiin ti tlang dekdo i.

⁵ Ciatihin au tlang dekdo heh Aaron in a hmu fangin kawlpaw lim ai hmaiah puleng pakhat tiang ai, “Thangha tu Bawipa songlawihnak tuhin rong ai puai bawn tuh ising,” tiin thuthan i.

⁶ Ciamanin Israel mite tu a thangha zingniu ah maitai hibawlhnak hrangah sumhnam ro ai pawlkom hibawlhnak hrang ahkhai sumhnam koih tlang i. Cen Israel mite in ai le ding in mitsih mawi lo tianin nuamthaih in um tlang i.

⁷ Ciafangin Bawipa in Moses hnenah, “Rang ngai in tolh tu; zaimantifangin Egypt ram an na hoisuakmi na minungte tu amahte mualphohnak bawn tlang zo i.

⁸ Hlun tuhai thu i pehnak lampui in a rang ngai in pial tlang zo i; amahte ca sui in kawlpawlim bawn in bia ai a hnenah hibawlhnak sel tlang zo thliahthlo i. Cen, ‘Aw Israel, Egypt ram an ning hoisuaktu khuavang tu hemi i,’ tiin ti tlang dekdo i.

⁹ Hemi minungte tu i linghnak i ai lungruh ze i.

¹⁰ Ciamanin a kham i tum mah, thin i raw ze manin siatsuah tuh sek ing. Cen nangmah le na tesinfate tu miphun lianpui ah na bawn tuh ing,” tiin ti i.

¹¹ Ikhalselai Moses in Bawipa a Pathian khiah ninghio ngen ai, “Aw Bawipa, hathnak le huham thawn Egypt ram an na luatruaimi na minungte ai vumah zaimanin na thinraw tuh i si?

¹² Israel mite tlang vumah thiruai nuam le siatsuah tuh sek in Pathian in Egypt ram an suakruai i,” tiin Egypt mite in na ti tuh lo im? Na thinraw dapruai tulai na thin heh ṭhum tu hram law; ciatih ai siatsuahhnak heh na minungte vumah hlengruai hram malaw.

¹³ Na salte Abraham, Isaac le Jacob hih tulai, zaitlukin amahte hnenah na hming rori in thukham ai, ‘Van vumai arsi zah in ning tesinfate tam tuh i. I thukham cia bangin he ram hmuahhmuah heh ning tesinfate hnenah pe tuhai a zomzet in amahte ai i tuh i,’ na tihnak tu hih tu hram law,” tiin ti i.

¹⁴ Ciamanin Bawipa khiah a thin sup ai a rel cia siatsuahhnak heh a minungte vumah hleng loin um i.

¹⁵ Moses tu tlang vuman tolh ai a hmai hnih ai nganhnak thukham lungtlepte pahnih awh i.

¹⁶ Hemi lungtlepte tu Pathian bawnhnak i ai a vumai lainganhnak tu Pathian thupehnak, Pathian amah rori ai kherhnak i.

¹⁷ Cen mizapui authawm khiah Joshua in a za fangin, “Kin cam hmun ah ral tawngdunhnak thawm za ing,” tiin Moses hnenah ti i.

¹⁸ Ciafangin Moses in, “Ciami thawmvang tu ral neh thangphathnak la ilo i; amahte ralsung ai kaphnak awthawm khai ilo i. Kai i zahnak tu la sa thawm sawn i,” tiin ti i.

¹⁹ Moses tu amahte riahbuk nong deuhdeuh ai kawlpawlim le minungte lam dekdo khiah a hmu fangin a thinraw roh i. Ciafangin a awhhnak lungtlepte heh sep ai tlangham ah khoi sek i.

²⁰ Amahte bawnhnak kawlpawlim khiah lang ai mai ah a tai hnuaah a vut cang thai in rial dek ai ti vumah phulh i. Cen ciami ti khiah Israel mite dingruai i.

²¹ Cen Aaron hnenah, “Zaitluk thil na vumah a bawn tlang manin hetluk lawmlam in thilsual bawnruai i si?” tiin Moses in zawt i.

²² Ciafangin Aaron in, “I bawipa, i hnenah na thinraw hram malaw. Hemite tu zaitlukin thil sia bawn tuhin tum de i ti ling isi.

²³ I hnenah kawi tlang ai, “Kin konghoitu tuh khuavang pakhat in kin bawt tu; zaimantifangin Egypt ram an kin hoisuaktu mihingpa Moses tu ziang cang zo i ti ling lo ising,’ tiin iti tlang i.

²⁴ “Aisu in sui nai i si,” tiin i zawt fangin, sui hlawnthil amahte naihnak hmuahhmuah hawk ai i pe tlang i. Ciami suite khiah kaimah in mai ah er ai kawlpawlim heh suak ang menma,” tiin ti i.

²⁵ Mizapui tu kilkhawl thilh tuh nawn lo i, ti khiah Moses in hmu i; zaimantifangin a hiang cingkim ah kihkul ral tampui um cing in Israel mite tu Aaron in milim bia tuhin hlat zo ihang.

²⁶ Ciamanin amahte riahbuk kotka ah Moses heh ding ai, “Bawipa lamah aisu ṭang tuh i? Bawipa lamah a ṭang nuamtute hmuahhmuah i hnenah kawi tu ih,” tiin a rohpui in au i. Ciafangin Levi mite tu a hnenah kawi tlang ai Moses in anite hnenah,

²⁷ “Bawipa Israel ai Pathian in, ‘Ning Levi mite, ralvang pakhat ṭen in lang tu ilai, helam ai panin riahbuk a khatta lam tian feh tu ih, ning unaute ituseh, ning rualpui le ning ompuite khai ituseh, rek tusek ih,’ tiin ti i,” tiin rel i.

²⁸ Ciafangin Levi mite in Moses ai thupeciahnak bangin bawn tlang ai cia nia lek ah minung thawng thum rek tlang sek i.

²⁹ Cen Moses in Levi mite hnenah, “Bawipa ca suangbawi naṭuantu tuhin ning fapate ituseh, ning unaute ituseh ning rekhnak in tunnia ah ning pum pe zo i si. Ciamanin Bawipa in tunnia ah hmuifu ning burh i,” tiin ti i.

³⁰ A thangha ah Moses in Israel mite hnenah, “Sualhnak lianpui bawn zo i si. Ikhalselai Bawipa hnen tlang vumah kai tuhai, ning sualngaithiam tuhin a hnenah ngen tuh ing,” tiin ti i.

³¹ Ciatihin Moses tu Bawipa hnenah feh ai, “Aw Pathian, zaitluk sualhnak lianpui he minungte in bawn zo i ti ling i si. Amahte caah sui in khuavang bawn tlang zo i.

³² Ikhalselai amahte sualhnak khiah ngaithiam tu hram law. Na ngaithiam tuh lohnak tahin na minungte hming na khumhnak laibu songin i hming i phiat tu hram sawn,” tiin ngen i.

³³ Ciafangin Bawipa in Moses hnenah, “I vumai a sualtu lek i laibu songin a hming phiat tuh ing.

³⁴ Ciamanin tun tu i hmuh tuhhnak hmunah fehpui tu. Sik tu, i vancungmi in kong ning hoi tuhai ni khatkhat a can a khim fangin amahte sualhnak manin cawhkuan pe tuh ing, ti hih tu ngio,” tiin ti i.

³⁵ Cen Bawipa in Israel mite vumah ursia hlengruai i, zaimantifangin kawlpawlim bawt tuhin Aaron khiah ruai tlang manin i.