Suahhlannak 30 - Zanniat Bible

Yihmui Rimur Taihmun Puleng

¹ “Yihmui rimur taihnak ah lawithing in puleng tiang tuh i si:

² Dong khat sau, dong khat kau, a sau a kau a camra dun in dong hnih sang tuh i. Thingzum ning munhnakte tu puleng thawn peh dun tuh sio i.

³ A vum le a ning pa li le thingzumte munhnak tu sui in khut tuh sio ai a cingkim heh sui in khap tuh zianzo i si.

⁴ A phurhnak laangte awhtu tuhin suikual pahnih bawn tu ilai a hmur hnia, a sirlam pahnih ah mun tu ih.

⁵ Hemi laangte tu lawithing in bawn tu ilai sui in khut tuh i si.

⁶ A sin nai Thutiam Kuang hmai ai a khaihnak ponzar hmaiah puleng heh dah tuh i si. Ciata ah ning tawk tuh ing.

⁷ Aaron in maivarhnak a sik fangin ciami puleng vumah zingsiar in yihmui rimur mai in tai tuh de i.

⁸ Zan lamai maivarhnak a thleng fangin khai yihmui rimur heh mai in tai tuh de i. Hemi yihmui rimur ning selhnak tu sankhat hnua sankhat catloin bawn tuh de i si.

⁹ Hemi puleng vumah hlengruai tuh loin khamhnak yihmui ituseh, maitai hibawlhnak ai selhnak sumhnam ituseh, hibawlhnak ai selhnak rong ituseh, dah tuh lo ai khamhnak dinti hibawlhnak dinti khai burh tuh lo i si.

¹⁰ Kum khat vel khat, Aaron in thingzumte ning munhnak vumah sualngaithiamhnak hrang hibawlhnak ai hmanghnak sathi thawn ciami puleng heh thianghlimruai tuh i. Hemi khai sankhat hnua sankhat bawn tuh de i. Bawipa hnenai pehnak a thianghlim semkhim puleng cang tuh i,” tiin ti i.

Bawipa Umhnak Ponhlam Hrang Siah

¹¹ Bawipa in Moses hnenah,

¹² “Israel mite mipum ning siar fangin Bawipa hnenah mi zongzong in luangtlanhnak man pe tu ṭen seh; zaimantifangin mipum siar laitak ah amahte hnenah siatsuahhnak a hleng tuh lohnak hrang i.

¹³ Mipum siarhnak laibu songai a teltu hmuahhmuah in hmun thianghlim cuai a khaihnak ai a khaihzah in pe tu ṭen seh. Hemi tu Bawipa hnenah hibawlhnak imanin mi veksen in pe tuseh.

¹⁴ Kum kul le a vum lam hmuahhmuah in mipumsiarhnak laibu songai telh cih imanin he paisa heh Bawipa hnenah pe tu ṭen seh.

¹⁵ Ning nunhnak man Bawipa hnenah ning pe fangin milian le mifarah hlaihdanhnak um loin a bang ṭen in pe tu ih.

¹⁶ Israel mite hnenin he paisa heh khuai tu ilai Kaimah umhnak Ponhlam songai kilkhawlhnak hrangah hmang tuh i si. Bawipa in Israel mite tu hih tuh ngio in le ning nunhnak ca pehnak paisa i tuh i,” tiin ti i.

Kutke Somhnak Darhleng

¹⁷ Bawipa in Moses hnenah,

¹⁸ “Kut ke somhnak tuhin hleng pakhat dar in bawn tuhai a kedo khai dar in bawn tuh i si. Pumkhawmhnak hlam le maitai hibawlhnak puleng karlak ah ciami darhleng heh dah tu ilai a songah ti thun tu ih.

¹⁹ Aaron le a fapate in amahte kut ke somhnak tuhin ciami ti khiah hmang tuh i.

²⁰ Bawipa hnenah maitai hibawlhnak sel tuhin pumkhawmhnak hlam song a lut fangin le suangbawi na ruaih tuhin puleng a nong fangin amahte in hemi ti thawn som lekhaw thi tuh lo i.

²¹ Amahte thi lohnak tuhin kut le ke heh som tuh tengteng i. Hemi tu amahte le a tesinfate tianin kumzangza in hlun tuhhnak dan i,” tiin ti i.

Pawhhnak Thau Le Yihmui Rimur

²² Bawipa in Moses hnenah,

²³ “Yihmui phun pha ber pawl; cinghnai pawng kul, a rimhmui sinamon thinghnai pawng hra, a rim hmui futi pawng hra,

²⁴ lawithing hnai pawng kul, (biakinn cuai khaihnak ai tehhnak fekfek) le olive thau khuat nga lang tu ih.

²⁵ Hemite tu yihmui rawithiam mi ai roihhnak bangin rawi tu ilai pawh tuhhnak thau in hmang tu ih.

²⁶ Ciami thau in Kaimah umhnak Ponhlam le Thutiam Kuang,

²⁷ sang dahhnak cabuai le a thilrite, maivarhnak khuam le a thilrite, yihmui rimur maitai hmun puleng le,

²⁸ maitai hibawlhnak puleng le a thilri hmuahhmuah le kut somhnak hleng le a hniaphahte khiah pawh tuh sio i si.

²⁹ Ciatihin hlam songai thilrite tu Pathian ca thianghlimruai tu ilai a thianghlim ber thil zarh ah cang tuh i. Ciami thilrite a khingtu hmuahhmuah thianghlim tuh ve ai a zarhmi cang tuh i.

³⁰ Cen Aaron le a fapate heh thau pawh tu ilai kaimah ca suangbawi ṭuan thil tuhin thianghlimruai tuh i si.

³¹ Cen Israel mite hnenah, ‘Hemi pawh tuhhnak thau thianghlim heh ning ca sankhat hnua sankhat ai pawh tuhhnak a thianghlimmi thau i tuh i.

³² Mi menma vumah burh tuh lo ai he thau thianghlim bangin yihmui rimur le thau rawi in hmang tuh lo i si. A thianghlimmi thau imanin a thianghlim i tiin ruat tuh i si.

³³ Hemi thau bangin a bawn cungtu le suangbawi siarlo midang vumah a hmangtu hmuahhmuah khiah a miphun songin lon tuar tuh i si,” tiin ti i.

Yihmui Rimur

³⁴ Bawipa in Moses hnenah, “Yihmui rimur a phunphun; stakte, onikha, galbanum le a sitmi frankincense yihmuite in a zahvek ṭen in lang tu.

³⁵ Ciamite tu yihmui bawn thiam mite ai a bawndan bangin felniu in rawi tulai yihmui rimur ah bawn tu. Ciami khiah ci thawn roih tulai, a ciangfai tuh le a thianghlim tuhin alruai tu.

³⁶ A hrekkhat tu a vut pha bik cang thai in seu tulai, a hrekkhat tu kin tawk dun tuh hmun, Ponhlam songai Thutiam Kuang hmaiah hibawlhnak ah sel tuh i si. Ciami yihmui rimur tu a thianghlim bikraw in ruat tuh i si.

³⁷ Ciami yihmui rimur bangin ningmah ca bawn in hmang tuh lo i si. Hemi yihmui rimur tu Bawipa hnenah pe cia a thianghlim i ti khiah ling tu ih.

³⁸ Mi pakhatkhat in ciami yihmui rimur bangin bawn ai hmang lekhaw a miphun songin lon tuar tuh tengteng i,” tiin ti i.