Suahhlannak 3 - Zanniat Bible

Pathian in Moses Ko I

¹ Moses tu Midian ramai suangbawi a pu Jethro ai tuu le mete khal de i. Vaikhat ah a sumhnamte heh nelrawn ah fehpui ai Pathian mual Sinai tihnak ah hleng i.

² Pathian ai vancungmi hnuh songin mai in a hnenah lar i. Moses in sik ai hnuh tu maiko hluahhlo napui kang lo i, ti khiah hmu i.

³ Ciafangin, “Ngaihsunurkul thil a nong in sik tuh ing. Zaimanin hnuh tu kang lo ini?” tiin ti i.

⁴ Moses ai a nong deuhdeuh heh Bawipa in hmu fangin hnuh songin, “Moses, Moses!” tiin ko i. Moses in, “Bawipa, heta ah um ing,” ti i.

⁵ Ciafangin Pathian in, “A nong ah kawi mah. Na kedawl hawk tu; zaimantifangin na ding hmun heh hmun thianghlim i.

⁶ “Kai tu na pupate ai Pathian ing. Abraham ai Pathian, Isaac ai Pathian le Jacob ai Pathian ing,” tiin ti i. Cia sawng fangin Moses inkhai a hmai hup i; zaimantifangin Pathian khiah sik ngam lo i.

⁷ Cen Bawipa in, “I minungte Egypt ramai cawhhnak heh fiang ngai in hmu zo ing. Sal uktute kut songin luat tuhin amahte auhnak aw khai za zo ing. Amahte tuarhnak hmuahhmuah khai ling sah ing.

⁸ Ciamanin Egypt mite kut songin suahtu tuhin le ciami ram an suak ai rampha le ramkau ah hlenpuitu tuhin hleng ihang ing. Cia ram tu hnawiti le khoitizu luang hmun ram, tuh ahcen Canaan mi, Hit mi, Amor mi, Perizz mi, Hiv mi le Jebus miphunte umhnak ram i.

⁹ Israel mite ai kaphnak aw tu i hnenah hleng ai, Egypt mite in zaitlukin nauneh i, tikhai hmu zo ing.

¹⁰ Ciamanin i minung Israel mite Egypt ram songin suah tuhin nangmah heh Pharoah hnenah na hlat tuh ing,” tiin ti i.

¹¹ Ciafangin Moses in Pathian hnenah, “Kai tu aisu ing ai Egypt ram an Israel mite suahruai tuhin Pharoah hnenah feh tuh ing?” tiin ti i.

¹² Pathian in, “Na hnenah kaimah um tuhai na hlattu kaimah ai i ihnak a larruaitu heh hemi i tuh i: Egypt ram an Israel mite na suahpui fangin, hemi mual vumah i bia tuh i si,” tiin ti i.

¹³ Cen Moses in Pathian hnenah, “Israel mite hnenah kawi in ‘Ning pu le ning pa ai Pathian in ning hnenah i hlat i,’ i ti fangin, ‘A hming aisu i?’ tiin iti selai akontih in rel tuh ing?” tiin ti i.

¹⁴ Ciafangin Pathian in, “Kai tuKaimah ing. Kaimah a imi in ning hnenah i hlat i, tiin Israel mite hnenah rel tuh isi,” tiin Moses hnenah ti i.

¹⁵ Cen Pathian in Moses hnenah hetihin rel lala i. Bawipa, ning pu le ning pa ai Pathian, Abraham ai Pathian, Isaac ai Pathian le Jacob ai Pathian in ning hnenah i hlat i tiin Israel mite hnenah rel tuh isi. Hemi tu kumzangza in i hming i ai hmai lam san minung hmuahhmuah inkhai ciatihin i ko tuh i.

¹⁶ Feh in, Israel konghoitute kokhawm tulai anite hnenah, Bawipa, ning pupate ai Pathian, Abraham, Isaac le Jacob ai Pathian heh i hnenah lar ai hetihin ning rel tuhin i ruai i! ‘Ning hnenah kawi awng zo ai Egypt mite in ning vumai bawnhnak khiah hmu zo ing.

¹⁷ Ciamanin reem ning tuarhnak Egypt ram an ning suah tuh le Canaan mi, Hit mi, Amor mi, Perizz mi, Hiv mi le Jebus mite umhnak ram ning hlengpui tuhin ruatcat zo ing. Cia ram heh hnawiti le khoitizu luanghnak ram i,” tiin rel tuh isi.

¹⁸ Na relhnak thu heh na ngai sah tuh i. Cen Israel mite hotute thawn Egypt kumpibawi hnenah feh tu ilai a hnenah, “Hebrew mite ai Pathian, Bawipa in i tawk zo i. Ciamanin ni thum song nelrawn ramkhing ah feh tlang tuhai Bawipa kin Pathian hnenah hibawl sel thil tuhin kin hlat tu,’ tiin ngen tuh isi.

¹⁹ Ikhalselai kut thawmlianpui thawn tlirh lo fangin tu Egypt kumpibawi in a feh ning siang tuh lo i, ti ling ing.

²⁰ I hathnak hmang tuhai i bawn tuhhnak ngaihsunurkul thilte in Egypt mite heh cawh tuh ing. Ciahnua fangin ning hlat tuh i.

²¹ Ciahlaiah i minungte khiah Egypt mite ai upat tlak in bawn tuhai Egypt ram an ning suak fangin ning kut lekin suak tuh lo i si.

²² Israel nupangte hmuahhmuah in amahte innsong ai umtu Egypt nupang hnenin ituseh, amahte innhnen ai Egypt mi hnenin ituseh, hnikpon le hlawnthil, sui le ngun ngen tuhai, ning fanute le ning fapate in sil tuseh. Ciatihin Egypt mite tu a thilri hmuahhmuah lang sah tuh sek i si,” tiin ti i.