Suahhlannak 23 - Zanniat Bible

Dikcanghnak Le Felhnak

¹ “A dik lo thuthang than tuh lo i si. A mawhmi bawm nuam in a dik lo thu rel mah.

² Thilsual bawn tuhin mirual sawn hlun tuh cuang lo i si. Thuheng dun hmunai thurelhnak ah mi tamsawn ai lungkhimhnak bawn nuam in a dik lomi thu rel mah.

³ Mifarah pa ai thu a rel fangin a farah manin bawm deuh cuang mah.

⁴ “Ning ral ai kawlpaw ihlahle laak vaivak in tawk le i sikhaw a hnenah tlut tuh i si.

⁵ A siphuh heh a thilrit manin bual lekhaw hlum in zam sah tuh lo i si; a siphuh heh tho bawm tuh i si.

⁶ “Ningmah lakai farah nauta ai thu ning rel fangin cawh tuh lo i si.

⁷ Thudik loin midang sualpuh tuh lo i si. Mawhhnak a nai lomi rek tuh lo i si. A rektu um lekhaw zuah tuh hrimhrim lo ing.

⁸ Nawhthuh lang tuh lo i si; zaimantifangin nawhthuh aitu in, a nawhthuh aihnak in a mit cawruai manin, thudik hmu thil nawn lo ai mawh nai lomi ai lampui khai pitruai sio i.

⁹ “Ramdang mikhual zohsuam mah ih; ningmah khai Egypt ramah ramdang mikhual cang rih awng ai mikhual heh zaibang i ti ling zo i si.

Kum Sarihhnak Le Ni Sarih Nia

¹⁰ “Kum ruk song ning lo ah hlaici cing tu ilai, a suakhnak heh khawm tu ih.

¹¹ Ikhalselai kum sarihhnak tu cawlumruai tu ilai lo songai pomi zaikhai khawm mah ih. Lo songah a pomi um lekhaw ningmah lakai mifarahte in khawm tuhai a valhnak heh ramsa zuvate in ai tu menma hang seh. Ciatih bang thotho in ning cabit vuandum le ning olive vuandum khai bawn tuh i si.

¹² “Niruk song naper tuhai ni sarih nia tu cawlum tuh i si. Ciatihin ning kawlpaw le ning siphuhte khai cawlum tuhai, ning hnenumte le ning mikhualte khai thathar ngah tlang tuh i.

¹³ Ning hnenai i relhnak hmuahhmuah heh ngai tu ih. A dang khuavangte hming heh a sal khai sal mah ih; anite hnenah saw khai ngen mah ih.

A Lianpui Puaite Phunthum

¹⁴ “Kum khat songah kaimah upathnak ah puaite pathum bawn tuh i si.

¹⁵ Col tello sang puai bawn tuh i si. I rel cia bangin ni i tiamhnak Abib hla ah ni sarih song col tello sang ai tuh i si; zaimantifangin cia hla ah Egypt ram an suak i si. Kut lolek in i hmaiah aisu khai kawi tuh lo i si. Kutken thawn i bia tuhin kawi tu ih.

¹⁶ “Ning lo ai ning cinghnak rong khawm cu ai a hmasaber ning khawm fangin Rongthar Puai bawn tuh i si. Cen kum bo ai ning cabit vuan le ning lo songin thingthaite ning khawm fangin Rongkhawm puai bawn tuh de i si.

¹⁷ Ningmah lakin pasal hmuahhmuah in kum khat vel thum, he puai can ah, kaimah Bawipa ning Pathian hmaiah kawi tuh de i si.

¹⁸ “I hnenah hibawlhnak sel ai sumhnam ning pe fangin col roihhnak sang hmang tuh lo i si. Kaimah ca ning bawnhnak puai ah ning rohnak sumhnam ai sathaute heh a thangha tian val tuh lo i si.

¹⁹ “Ning lo ai ning langhnak a pha ber rongthar tepawl heh Bawipa ning Pathian ai inn songah koih tuh de i si. “Tuu faniu tu a pui hnawiti in suang tuh lo i si.”

Thukhamhnak Le Thuzirhhnak

²⁰ “Ning lamtluanah ning kilkhawltu tuhin le ning ca i pai cia ramah kong ning hoitu tuhin ning hmaiah vancungmi pakhat hlat tuh ing.

²¹ Ani tu upat tu ilai a relhnak thu heh ngai in hlun tuh i si. Ani tu kin daih lo i tiin ralsan tuh lo i si. Zaimantifangin kaimah in hlat ing. Ralsan pang le i sikhaw ning ngaithiam tuh hrimhrim lo ing.

²² Ikhalselai amah thu ngai ai i relhnak hmuahhmuah bawn le i sikhaw ning ralte heh kaimah in tawng tuhai ning raltute heh i ral cang tuh ve ing.

²³ I vancungmi heh ning hmaiah feh tuhai Amor mi, Hit mi, Perizz mi, Canaan mi, Hiv mi le Jebus mite ai ramah ning hoi tuh i. Ciamite heh kaimah in siatsuah tuh sek ing.

²⁴ Ciamite ai khuavangte heh bia mah ilai anite hmaiah ning lu ut tuh lo i si. Hemite ai bawndan in bawn tuh lo i si. Anite ai khuavangte heh siatsuah tuseh ilai a khuarum tepawl khai cek sah tusek ih.

²⁵ Ning tu Bawipa ning Pathian bia tuh i si; Ti le rong in hmuifu ning burh tuhai ning hnenin urhnak heh ning lang sah tuh sek ing.

²⁶ Ciami ning ramah nupang in fazulh ti um tuh lo ai facing ti khai um tuh lo i. Ning san khai ning sauruai tuh ing.

²⁷ Ning tawngcaitute heh kaimah i kih tuhin a vumah naper tuh ing. Ning tawngcaitute lakah buaihnak hlengruai tuhai ning ralte heh khel lamah let tuhai tlanruai tuh sek ing.

²⁸ Ning hmaiah a laukul khoipuite hlat tuhai Hiv mi, Canaan mi le Hit mite heh ning hleng hlanah ning hnawt sah tuh sio i.

²⁹ Kum khat songah hnawt tuh lo ing, zaimantifangin ramkhing ah cang pang tuhai ramsate pungzai in ning ca tam ze pang tuh i.

³⁰ Ning pungzai amam ai ram pumpuhluk ning lang ben hlanlo, tlawm niuniu in hnawt tuh cekco ing.

³¹ Ning ramri tu Tipui San ai panin Mediterranean tifingriat tian kauruai tuhai hlang lam nelrawn in Euphrates runpui tian sauruai tuh ing. Ciami ram songai a ummi minungte vumah huham ning nairuai tuhai hnawt tuh sek i si.

³² Amahte thawn ituseh, a khuavangte thawn in ituseh lungkhimhnak bawn tuh lo i si.

³³ Ning ram songah umruai tuh lo i si; umruai le i sikhaw i vumah sualhnak ning bawnruai tuh i. Amahte khuavangte bia le i sikhaw ning bahsual tuh tengteng i,” tiin ti i.