Suahhlannak 21 - Zanniat Bible

Sal Nai Dan

¹ “Hemi a hnia lamai dante tu Israel mite hnenah na pe tuhhnak i:

² Hebrew mi sal ning lai fangin kum ruk song ning sal cang tuh i. Kum sarihhnak fangin zaikhai kuan kul loin luat tuseh.

³ Sal a cang pan fangin nupui nai hlah lekhaw nupui nai loin luat tuseh; nupui nai cia ai hleng awng lekhaw a nupui thawn luat kawm tuseh.

⁴ Ikhalselai sal a cang songah a bawipa in nupui hoi sah ai fanu fapa cawi lekhaw a nupui le a fate tu a bawipa in ping tuhai amah lek luat tuh i.

⁵ Ikhalselai sal pa in, ‘I bawipa, i nupui le i fate it ing, luat i nuam lo i,’ tiin ti lekhaw,

⁶ a bawipa in Pathian hnenah koih tu selai dawngkham ah, ihlahle dawngkham tunah a fehpui hnuaah a bil ret sah tuseh. Ciatihin a nunsong in a sal cang tuhang seh.

⁷ “Mi pakhat in a fanu sal ai a zuar fangin sal pa bangin sal nu in luat thil tuh lo i.

⁸ Nupui tuhin a bawn tumtu a bawipa ai a thinkhing hlah lekhaw a pa in tlan thil leh tuh i. A bawipa in miphun dang tepawl hnenah zuar thil leh tuh lo i, zaimantifangin ciami heh thil mawi ilo i.

⁹ Ikhalselai sal ah lai napui a fapa nupui tuhin tum lekhaw a fanu tlukin ruat tuseh.

¹⁰ Cen nupui tuhin a hoi hnuaah nupui dang hoi lala lekhaw a nupui hlun a hlan ang thotho in rong, hnikpon le nupui a ihnak covo ngah tu thotho seh.

¹¹ Hemi thilte hin thum pe thil hlah lekhaw zaikhai kuan kul loin luat tuseh.

Tuahmawhhnak Thawn Peh Dun Dan

¹² “Midang thi tian ai a vittu heh rek tuar tuseh.

¹³ Ikhalselai rek hrim ilo ai tuahmawh ngah pang lekhaw ningmah ca i rilhnak hmunah tlan tuhai ciata ah relh tuseh.

¹⁴ Ikhalselai mi pakhat in a thinraw ai midang rek hrim lekhaw i puleng ah him nuam in relh khalselai duk tu ilai rek tu ih.

¹⁵ “Mah ai nu ihlahle, mah ai pa, a vittu heh rek tuar tuseh.

¹⁶ “Mi pakhat in midang pakhat zuar tuhin ituseh, sal can tuhin ituseh, a nuam lo cingin ru ai tlanpui lekhaw ciami pa heh rek tuar tuseh.

¹⁷ “Mah ai nu ihlahle, mah ai pa cukcamtu heh rek tuar tuseh.

¹⁸ “Mite pahnih tawng dun ai pakhat in a dang pakhat lungto in sep, ihlahle a kuttum in thong ai tuahmawh napui thi hlah lekhaw a vittu pa heh cawhkuan tuar tuh lo i. Ikhalselai a vithnak pa heh tho ben lo ai innkual i,

¹⁹ a cak hnuaah faikiang hmang kul tian lekhaw innkual song a nihlawh kuan tu selai a cak hlanlo kilkhawl tuhai bawm tuseh.

²⁰ “Mi pakhat in a sal nu ihlahle a sal pa heh fungkek in vit ai thi vut lekhaw a vittu heh cawhkuan tuar tuh i.

²¹ Ikhalselai a sal heh ni khat ni hnih nung lekhaw a bawipa khiah cawhkuan tawk tuh lo i. Zaimantifangin a sal heh a thilri i ai a thilri a sung khiah a mawi tawk cawhkuan ihang.

²² “Mite tawng dun ai nupui naupai tuahmawh ai amah thi lo napui nau hnawm lekhaw a tuahmawhtu pa in cia nu pasal ai ngen zah, thukhantu ai rel hnuaah kuan kul tuh i.

²³ Ikhalselai naupai nu tu tuahmawhhnak tawk manin thi lekhaw a nunhnak heh nunhnak in kuan tuseh;

²⁴ mit tu mit in, kam tu kam in, kut tu kut in, ke tu ke in,

²⁵ maitai tu maitai in, maliam tu maliam in, vithnak tu vithnak in kuan tuseh.

²⁶ “Mi pakhat in a sal nu ihlahle a sal pa a mit ah vit ai mitcaw lekhaw a mit man ah a sal heh luatruai tuseh.

²⁷ A kam hlok in vit lekhaw kam man ah a sal heh luatruai tuseh.

Sumhnam Naitute Ai Hlun Tuh Dan

²⁸ “Kawlpawcang in nupang ihlahle pasal pakhat khi ai thi lekhaw kawlpawcang heh a thi tian lungto in sep tuhai a sa ai tuh lo i si; ikhalselai kawlpawcang naitupa tu cawhkuan tuar tuh lo i.

²⁹ Ikhalselai ciami kawlpaw tu a he ze ai mi khit thai de manin a naitu pa heh rel cia zo napui khum loin hlat menma manin pasal ihlahle nupang khi in thi lekhaw, ciami kawlpaw heh lungto in a thi tian sep tu ilai, a naitu khai rek tuar tuseh.

³⁰ Ikhalselai rek loin cawhkuan tuh sawn in rel sah lekhaw a nunhnak tlan tuhin a cawhzah in kuan tu sio seh.

³¹ Cen kawlpawcang in suakthuan tualleng, nupang khai ituseh pasal khai ituseh khi in thi lekhaw a vumai dan thotho heh hlun tuseh.

³² Sal nu ihlahle sal pa khi in thi lekhaw kawlpaw naitu in sal naitu hnenah tangka sawmthum kuan tu selai kawlpawcang heh lungto in a thi tian sep tuseh.

³³ “Mi pakhat in khur co ai a khuk bawn lo manin ihlahle khur a hong cia in dah manin, kawlpaw ituseh laak ituseh tlok lekhaw,

³⁴ ciami sumhnam man heh kuan tuseh. Sumhnam a naitu hnenah paisa pe tu selai, a thitu sumhnam sa heh amah in co tuseh.

³⁵ “Mi pakhat ai kawlpawcang in midang kawlpawcang khi ai thi lekhaw amahte pahnih in a nungmi sawn kawlpawcang heh zuar tu selai a man khiah sem kawm tuseh. A thimi kawlpawsa khai sem kawm tuseh.

³⁶ Ikhalselai kawlpawcang a he ze ai mi khai khit thai de ti ling napui a naitu in khum hlah lekhaw kuan tuseh; a nungmi kawlpawcang heh a thimi kawlpawcang ca kuan tu selai, ciami a thimi kawlpawcang heh amah in ping tuseh.