Suahhlannak 20 - Zanniat Bible

Thupehnakte Sawmkhat

¹ Pathian in anite hnenah hetihin rel i;

² “Kai tu ning saltanghnak Egypt ram an ning suakruaitu Bawipa ning Pathian ing.

³ “Kaimah siarlo Pathian dang bia tuh lo i si.

⁴ “Vancung ah ituseh, lailung vumah ituseh, laihnia ti songah ituseh a um mite hmuihmel cuangin ningmah ca milim bawn tuh lo i si.

⁵ Milim bia tuh lo i si; a hmaiah ut khai ut mah ih; zaimantifangin kai tu Bawipa ning Pathian ing ai umhlah nai Pathian ing. Kaimah i huatu vumah a sualhnak manin dantat tuhai amahte ai tesinfate san, santhum sanli tianin cawhkuan hlengruai tuh ing.

⁶ Ikhalselai kaimah i ittu le i thukhamte a hluntute vumah cenin i ithnak catloin san thawng tampui tianin hlengruai tuh ing.

⁷ “Bawipa ning Pathian ai hming heh hngalsakhnak in sal tuh lo i si; zaimantifangin Bawipa kaimah in i hming ciatihin a hmangsualtute khiah dantat tuh ing.

⁸ “Sabbath nia a ciang niu in ul tuh i si.

⁹ Niruk songah ning naper hmuahhmuah per tu ih;

¹⁰ ni sarih nia tu Sabbath nia i ai Bawipa ning Pathian ca i. Cia nia ahcen naper tuh lo i si, ningmah ituseh, ning fate ituseh, ning salte, ning sumhnamte le ning khua songai a umtu ramdang mi khai ituseh naper tlang maseh.

¹¹ Niruk songah Bawipa in van le laipua, tipui le a songai a ummi zongzong bawn ai a ni sarih nia ah cawlum i. Ciamanin Bawipa in sabbath nia tu hmuifu pe ai amah caah thianghlimruai i.

¹² “Ning nu le ning pa upat tu ih; ciatihin Bawipa ning Pathian ai a ning pehnak laivum ah san sau in ning nung tuh i.

¹³ “Mi rek mah ih.

¹⁴ “Kangkawm sualhnak bawn mah ih.

¹⁵ “Ruko mah ih.

¹⁶ “Na ompuite lakah a hman lo lingpuitu cang mah ih.

¹⁷ “Mi thil ot mah ih. Mi inn ituseh, mi nupui le mi salte ituseh, a kawlpawte, a siphuhte le midang ai naihnak hmuahhmuah ot tuh lo i si,” tiin ti i.

Israel Mite Thinlau I

¹⁸ Israel mite in khuari le Thirhlung tumhnak thawm za tlang ai vantlingtleleuh zutzo le maikhu suak hluahhlo mualtlang a hmu fangin lau ze in hlawng tlang biakbo i. Ciamanin a hlapui ah ding tlang i.

¹⁹ Cen Moses hnenah, “Nangmah in kin hnenah pong tulai na ngai tuh i ing, Pathian kin hnenah pong fangin kin thi tuh sek rori i,” tiin ti tlang i.

²⁰ Ciafangin Moses in anite hnenah, “Lau mah ih! zaimantifangin Pathian tu ning in amah kihzah ngio tuhin ning cu tuhin kawi ngawn i,” tiin ti i.

²¹ Ikhalselai Israel mite tu lamhlapui ah ding tlang thotho i. Pathian umhnak mainim hiangah tu Moses ian feh i.

Puleng Hrang Dante

²² Bawipa in Moses hnenah, “Israel mite hnenah hetihin rel tu: “Ning hnenah van vuman pong ai i hmu zo i si.

²³ Kaimah thawn kom cih ai bia tuhin ngun ai bawnhnak khuavang milim ituseh, sui ai bawnhnak khuavang milim ituseh ningmah ca bawn tuh lo i si.

²⁴ lai in bawnhnak puleng kaimah caah bawn tu ilai a vumah ning maitai hibawlhnak le ning pawlkom hibawlhnakte, ning tuu le kawlpawte in hibawl tuh de i si. I bia tuhai i relhnak hmunah kawi tuh de ai hmuifu ning pe tuh ing.

²⁵ Kaimah ca lungto puleng ning bawn fangin thirkhem hmangin solh tuh lo i si. Zaimantifangin ningrimtiar pang tuh i si.

²⁶ I puleng ning sa fangin a vumah kaihnak tuhin kaipum tiang tuh lo i si; ning sa ai ning kai fangin ning zahmawh dakruai sual pang tuh i si, ti i,’ tiin rel tu,” tiin ti i.