Suahhlannak 2 - Zanniat Bible

Moses Tehnak

¹ Ciami can dungah Levi mi pakhat in a hinpui fenu pakhat hoi i.

² A nupui in naupai ai fapa nai i. Fapa mawi bik i ti khiah a nu in hmu fangin hla thum song thup i.

³ Ikhalselai thup thil nawn lo fangin phaipeng ai takhnak bawm pakhat lang ai ti lut thai loin cinghnai le khoirep mat i. A songah nauniu hlim ai runpui varkam ai phaikuang kualak ah dah i.

⁴ Ziang cang ni ngai maw tiin a u nu in lamhla thah hmun an hlir ngio i.

⁵ Ciafangin Pharoah ai fanu tu takhlu tuhin runpui ah kawi ai a hnenum nupangte tu varkam ah vak tlang lianglo i. Pharoah ai fanu in phaikuang kualak ai bawm a hmu fangin lang tuhin a hnenum nu ruai i.

⁶ Pharoah ai fanu in bawm a hong fangin nauniu tu kap hnelhno in a um khiah hmu i. A poidan aw, “Hebrew nauniu ina e!” tiin ti i.

⁷ Ciafangin a unu in, “Naulentu tuhin Hebrew nupang pakhat ko ngang maw? tiin zawt i.

⁸ Ciafangin Pharoah ai fanu in, “Ko ta tu,” ti i. Feh ai nauniu a nu rori koh i.

⁹ Ciafangin Pharoah ai fanu in, “Hemi nauniu heh len tulai a len man na tham tuh ing,” tiin ti i. Ciamanin cia nauniu tu a nu in lang ai phatak ngai in len de i.

¹⁰ Nauniu tu a khang deuh fangin a nu in Pharoah ai fanu hnenah fehpui ai Pharoah ai fanu in a fapa cangruai i. “Ti songin i suahhnak i,” tiin ti ai a hming ah Moses bawn i.

Midian Ramah Moses Tlan I

¹¹ Can rai deuh ai, Moses a upa deuh fangin a miphunte hnenah leng i. Ciatihin a leng fangin a miphunpuite tu Egypt mite in khengkhebel in naper har ngai perruai khiah hmu i. Ciahlaiah a phunpui Hebrew mi pakhat khiah Egypt pa in a vit laitak hmu i.

¹² A hiang cingkim sik ai aisu khai hmu lo fangin Egypt pa ciah rek lio ai, a luang heh siatnawi songah thup i.

¹³ A thangha ah a phunpuite hnen a leng lala fangin, Hebrew mite pahnih tawng dun dekdo hmu i. Ciafangin a mawhtu deuh pa hnenah, “Zaimanin na miphunpui lala vit isi?” tiin ti i.

¹⁴ Ciafangin ani in, “Aisu in kin vumah uktu le thukhantu tuhin na bawn i? Egypt pa na rek bangin i rek tum isim?” tiin ti i. Ciafangin Moses tu a thinlau ai, “I bawnhnak midang in i lingtu um zo i!” tiin ti i.

¹⁵ Pharoah in ciami thu a za fangin Moses rek tum i. Ikhalselai Moses tu tlan teu ai Midian ramah um tuhin feh i. Midian ram a hleng fangin tikhur pakhat hiangah cawlum i.

¹⁶ Midian ramai suangbawi Jethro in fanute pasarih nai i. A fanute tu tikhur ah kawi ai, a pa ai tuu le me ca ti cawi ai a sumhnamte ti dinghnak tikuang songah thun tlang i.

¹⁷ Ciafangin tuukhalte hleng ai hnawt i. Ikhalselai Moses in nupangte heh bawm ai a tuurual khiah ti tul sah i.

¹⁸ Cen amahte pa hnen tlung fangin a pa in, “Zaimanin tunnia tu khuahma ngai in tlung thil zual i si?” tiin zawt i.

¹⁹ “Egypt mi pakhat in tuukhalte hnenin kin o manin i, tiin ti tlang i. “Kin ca ti kin cawi ai sumhnamte khai ti tul i,” tiin rel tlang i.

²⁰ Ciafangin a pa in, “Akonah um i? Zaimanin ciami pa tu hlum lio i si? Ko tu ilai kin hnenah rong ai tuseh,” tiin a fanute ruai i.

²¹ Ciatihin Moses tu Midian ramah um ai Jethro in a fanu Zipporah khiah Moses ai nupui tuhin pe i.

²² Zipporah in fapa nai ai, “Tluangdang ramah ramdang mi ing,” tiin a hming ah Gershom bawn i.

²³ Kum tampui hnuaah Egypt kumpibawi thi i. Ikhalselai Israel mite tu saltuarhnak manin au in rung tlang lai thotho i. Ciatihin amahte auhnak aw heh Pathian hnenah hleng ai,

²⁴ amahte runghnak aw khiah Pathian in za i. Cen Abraham, Isaac le Jacob hnenai a thutiamhnak khai hih i.

²⁵ Israel mite saltuarhnak khiah Pathian in hmu ai anite vumah panhlahhnak nai i.