Suahhlannak 19 - Zanniat Bible

Israel Mite Sinai Mual Ah

¹ Israel mite tu Egypt ram an suak hnua hla thumhnak ni khat nia ah Sinai nelrawn ah hleng tlang i.

² Rephidim in suak ai Sinai nelrawn hleng fangin Sinai Mual hmaiah riahbuk zar tlang i.

³ Cen Moses tu Pathian tawk tuhin mual vumah kai i. Tlang vuman Bawipa in Moses ko ai a hnenah, “Jacob ai tesinfate Israel mite hnenah hetihin rel tu,

⁴ ‘Egypt mite vumah thil i bawnhnak heh nangmah in hmu zo ai ningte tu muvanlai in a ko vumah a faniu a thiar bangin i hnenah ning thiar ing, tikhai hmu zo i si. Ciatihin heta i hnenah ning hlenpui ing.

⁵ Tunin i thu ngai in i thutiam hlun le i sikhaw ningte tu i minung ning cang tuh i, Laivum pumpuhluk heh kaimah ai i, ikhalselai ning tu kaimah rilhnak, i minung tumce i tuh i si.

⁶ Ningte tu kaimah ca ian aphnak miphun thianghlim, suangbawi naṭuanhnak songah i ruaihtu miphun ning cang tuh i,’ tiin Israel mite hnenah rel tu,” tiin ti i.

⁷ Ciamanin Moses tu zukzu leh ai Israel mite hoitute kokhawm in Bawipa ai thupeciahnak hmuahhmuah heh anite hnenah rel i.

⁸ Ciafangin mizapui in, “Bawipa ai relhnak bangin bawn tuh sio i ing,” tiin hmunkhat in sawn tlang i. Moses in Israel mite ai thusawnhnak heh Bawipa hnenah rel lehsal i.

⁹ Ciafangin Bawipa in Moses hnenah, “Nangmah hnenah thu i rel fangin mizapui in na ling ai anite in na sang thil tuhin na hnenah mairo sah ngai songin kawi tuh ing,” tiin ti i. Cen mizapui ai thusawnhnak heh Moses in Bawipa hnenah rel leh i.

¹⁰ Bawipa in Moses hnenah, “Mipuite hnenah feh tulai, Bawipa bia tuhin cianghlim dun cia in tunnia le thangha um tlang tuseh. Amahte hnikpon sawp tu selai,

¹¹ tit nia fangin ralring cia in um tlang tuseh. Ciami nia ah mi veksen ai hmu thai in Sinai Mual ah zuktolh tuh ing.

¹² Sinai Mual a cingkim in mizapui ca ramri bawt tulai, ‘Tlang vumah kai tuh loin le tlangham khai dai tuh loin ralring tu ih. Mi pakhatkhat in dai lekhaw ciami pa ciah rekhnak tuar tuh i.

¹³ Ciami pa heh aisu inkhai dai loin lungto ai sephnak, ciahlahle thal ai saihnak tuar kul tuh i. Minung ita inkhai, ramsa ita inkhai, rek tuh i,’ tiin rel tu. Tuucang ki tum fang ian in miburpui heh mual vumah kai tlang tuseh,” tiin ti i.

¹⁴ Ciafangin Moses tu mual vuman tolh ai, Pathian bia tuhin mi senpui heh ralring tuhin ruai i. Amahte hnikpon sawp ai,

¹⁵ Moses in, “Tit nia tu ralring cia in um tu ih; nupang hnen ahkhai it tuh lo i si,” tiin ti i.

¹⁶ A ni thumhnak nia zing lamin mualvum ah khuari ai vantlingtleleuh zutzo i. Mairo sah ngai um ai Thirhlung cawm roh in tum aw thang i. Riahbuk ai umtu minung hmuahhmuah thinlau in hlawng tlang i.

¹⁷ Ciafangin Moses in mizapui heh hoi ai Pathian tawk tuhin amahte riahbuk in suakpui ai mual hamah ding tlang i.

¹⁸ Sinai Mual hmuahhmuah khiah maikhu in tuam sio i. Zaimantifangin Bawipa tu mual vumah mai in kawi i. Maikhu tu maipual khu bangin kai ai Sinai Mual khiah a pumpui in hlin dumdo i.

¹⁹ Tuucang ki tumhnak aw khai cawm amam i. Moses a pong fangin Pathian in khuari in sawn i.

²⁰ Bawipa tu Sinai Mual vumah a zuktolh fangin Bawipa in Moses heh mual phundir vumah hong tuhin ko ai a kohnak bangin kai i.

²¹ Ciafangin Bawipa in Moses hnenah, “Zukzu rih tu teu lai kaimah hmu nuam in ramri lan tuh loin mizapui khamhnak pe tu. Cialo fangin anite tampui thi tuh i.

²² I hnenai a kawitu suangbawite rin amahte veve cianghlim dun kul i; ciahlahle cawh tuh ing,” tiin ti i.

²³ Cen Moses in Bawipa hnenah, “Mizapui tu hong thil tuh lo i. Zaimantifangin hemi tlang heh ramri bawn tu ilai, mualtlang thianghlim ah dah tu ih’ tiin nangmah in thupeciahnak zo isi,” tiin ti i.

²⁴ Bawipa in, “Zukzu rih tulai na hnenah Aaron hongpui tu. Ikhalselai suangbawite le mizapui tu ramri lan hrimhrim maseh. Cialo fangin cawh tuh ing,” tiin ti i.

²⁵ Ciamanin Moses tu zukzu leh teu ai Bawipa relhnak heh mizapui hnenah rel i.