Suahhlannak 18 - Zanniat Bible

Moses Hnenah Jethro Leng I

¹ Midian ramai suangbawi, Moses ai pu Jethro in Moses le a minung Israel mite ca Pathian ai a bawnhnak tepawl le Egypt ram an Bawipa ai suahhnak thu khai ling sio i.

² Ciafangin Moses ai nupui, a pu hnenai a kuathnak, Zipporah heh Jethro in Moses hnenah fehpui i.

³ Jethro in Zipporah ai fapate pahnih, Gershom le Eliezer khai fehpui i. Moses in, “Tluang ramah ramdang mi ing,” tiin a fapa pakhat tu a hming ah Gershom bawn ai,

⁴ a pahnihhnak tu, “I pa ai Pathian tu i bawmtu i ai Pharoah ai ralvang in i osuak i,” ti ai a hming ah Eliezer bawn i.

⁵ Jethro tu Zipporah le a fapate pahnih thawn Pathian mual thiang hiangai Moses ai riahbuk nelrawn ramkhing lamah kawi tlang i.

⁶ Cen Moses hnenah a pu in, “Kaimah na pu Jethro heh na nupui le a fapate pahnih thawn kawi i ing,” tiin thuthan i.

⁷ Ciafangin Moses tu anite hmuak tuhin feh ai a tawk fangin a hmaiah ut ai thut i. Cen amahte nuncak le cok lo thula zawt dun hnuaah Moses ai hlambuk songah lut tlang i.

⁸ Moses in Israel mite manin Bawipa in Pharoah le Egypt mite vumai a bawnhnak tepawl heh Jethro hnenah rel sio i. Lamlak ah harsa a tawkhnak le Bawipa in a ohnak thu khai rel i.

⁹ Ciatihin Egypt mite kut songin a ohnak manin Bawipa ai phathnak thu a za fangin Jethro tu a ang ngai i.

¹⁰ “Pharoah le Egypt mite hnenin ning otu Bawipa thangphat tu ih. Egypt mite hnia ai saltuarhnak in a minungte a otu Bawipa thangphat tu ih.

¹¹ Bawipa tu a dang khuavangte tahin a lian sawn i ti thu ling ing; zaimantifangin Egypt mite in Israel mite vumah huahnak thawn a bawn laiah he thil hmuahhmuah heh bawn i,” tiin ti i.

¹² Cen Jethro in Pathian hnenah hibawlhnak le maitai hibawlhnak sel ai, Aaron le Israel mite konghoitute tu Moses ai pu Jethro thawn Bawipa hmaiah rong ai tlang i.

Thukhantute Ril I

¹³ A thangha ah Moses tu a minungte ai thukhan sah tuhin to ai, a hmaiah mi senpui tu zing lamin zan lam tian ding tlang i.

¹⁴ Moses ai pu Jethro in ciami a hmu fangin Moses hnenah, “Mipuite ca thil bawn na tumhnak tu akontih i? Zaimanin nangmah lek hetihin to ai midang hmuahhmuah na cingkim ah zing in zan tian ding tlang cuahco i?” tiin ti i.

¹⁵ Ciafangin Moses in, “Hetihin i bawn heh a kul hrimhrim i. Zaimantifangin Pathian ai a daihhnak ziang i ti ling nuam manin mi senpui tu i hnenah kawi tlang i.

¹⁶ Mi pahnih thu el dun fangin i hnenah kawi de ai ciafangin aisu mawh ai aisu mawh lo i, tiin thu relcat sah ai amahte hnenah Pathian thukham le dante heh rel de ing,” tiin ti i.

¹⁷ Ciafangin Jethro in, “Hemi thil tidan heh a dik lo i.

¹⁸ Nangmah le nangmah siatsuah dun tuhai mi senpui khai siatsuah tuh isi. Na bawnhnak a tam ze i. Nangmah pakhat lekin ti cawk tuh lo isi.

¹⁹ Ciamanin i thu i ngai tu. Ruathnak pha na pe tuhai na hnenah Pathian um tuh i. Nang tu Pathian hnenah mizapui ai palai i tuhai amahte thu heh Pathian hnenah hlen tuh isi.

²⁰ Cen Pathian thukham le dante heh amahte hnenah zirh tulai, na nuncan ziaza tuh le na bawn tuhhnak tu fiangniu in rel tu.

²¹ Ikhalselai thiltibenhnak a naitu mi hrekkhat ril tulai ciamite tu Israel mite hoitu tuhin dah tu. A thawngthawng, a zaza, sawmnga nga le sawmkhat khat ai hoitu i tuh i.

²² Ciamite tu a zomzet in mi senpui thukhantu i tuh i. Thu har deuhdeuh ciah na hnenah na hlen tlang tuseh. Ikhalselai thu nepnawi pawl tu amahte in rel tuseh. Ciatihin bawn lesi na thilrit na phur bawm ah cang tuhai na nuam tuh deuh i.

²³ Pathian ai daihhnak a i bangin ciatihin bawn lesikhaw nangmah le nangmah siatsuah dun tuh lo ai misenpui thu khiah relcat sah tuh sio manin amahte inn ah tlongtla in tlung tlang tuh i,” tiin ti i.

²⁴ Moses in Jethro ai thu khiah ngai sah ai a tihnak bangin bawn i.

²⁵ Israel mite songin thiltibenhnak a naitute ril ai mizapui hoitu tuhin dah ai. A thawngthawng, a zaza, sawmnga nga le sawmkhat khat ai hoitute i.

²⁶ Amahte nun songah catloin mizapui ai thukhantu ṭuan tlang i. Thu harsa pawl tu Moses hnenah hlenpui i. Ikhalselai thu nepnawi pawl tu amahte in rel i.

²⁷ Cia hnuaah Moses in a pu heh hnuksat ai Jethro tu a inn ah tlung leh i.