Suahhlannak 15 - Zanniat Bible

Moses Ai La

¹ Cen Moses le Israel mite in hemi la heh Bawipa hnenah sa tlang i, “Ngaihsunurkul in na neh manin, Bawipa hnenah la sa tuh ing; Ti songah siphuh le a totute lon zo sek i.

² Bawipa tu i hathnak le i thazang i, I otu khai amah i, I Pathian i ai, thangphat tuh ing; I pa ai Pathian a thupui zia cawimawi tuh ing.

³ Bawipa khiah ralnehtu i, A hming tu Bawipa i.

⁴ “Pharoah siphuhleng le a ralkapte, tifingriat songah lon sek i. A kuthnia tlangsuak phapha pawl, Tipui San songah phum sek i.

⁵ Tipui thuk in khuk sek i; tithuk songah lungto bangin pil sek i.

⁶ Na kiahhan lam ban thahat tu, Maw Bawipa ngaihsunurkul ze i. Na kiahhan lam ban thahat tu, Ralte a seusektu i.

⁷ A roh ngai na mi nehhnak in, Na raltute tu lon sek isi; Na thinrawhnak mai bangin a ko fangin, anite tu fangcang kuangro bangin kang sio i.

⁸ Na hnar na phit fangin, Tipui tu a tungtun in pum isi, Tiluang heh bangkhang bangin ding i, A thuk ngai tifingriat tu Tikhal bangin khal sek i.

⁹ Kin ralte in, ‘Hnawh tuhai; man tuh ngawn ing, Amahte hlawnthil hmuahhmuah, khan tuh sek ai, Amahte hnenin i daihhnak hmuahhmuah i daih zah in lang tuh ing, i ralvang lang tuhai, cihmit in rek tuh sek ing,’ ti i.

¹⁰ Ikhalselai vel khat hai na hawh fangin, Tifingriat in khuk sek i. A laukul tipui songah, Suantum bangin phum teu i.

¹¹ Aw Bawipa, laivum ai khuavangte lakah. Na bangtu aisu um nitur? Thianghlimhnak ah na kihkul, Songlawihnak ah na laukul, thil tibenhnak ah ngaihsunurkul;

¹² Na kiahhan lam ban pharh ai, Kin ralte tu laipua in thon sek i.

¹³ Na ithnak ah rinsantlak isi, Na tlan cia mite konghoi isi; Na hathnak in na minungte heh, Na hmun thianghlim tian khor isi;

¹⁴ Laivum ram cangcang in na ling ai, thinlau in hlawng tlang i, Naukai ur ai thinlau bangin, Filistin mite tu a thinlau tlang i;

¹⁵ Edom ramai uktute tu, lauhnak thawn thinpit tlang i; Moab ramai mithahat pawl, thinlau in hlawng i; Canaan ramai umtute khai, a ralphahnak bo zo i;

¹⁶ Kihhnak le thinlauhnak thawn dim i, Na ban thahat a hmu fangin, lungto bangin mer loin ding tlang i, Maw Bawipa na luatruaihnak Na minungte in kan hlan tian.

¹⁷ Nang in konghoi tuhai, Na tlang vumah bir tuh isi, Maw Bawipa na umhnak tuhin na bawnhnak hmunah, Maw Bawipa nangmah ai na sahnak, biakinn ah fehpui tuh isi.

¹⁸ Bawipa tu kumzangza in kumzangza tian kumpibawi cang tuh i,” ti i.

Miriam Ai La

¹⁹ Egypt siphuhte, siphuhleng le a mawngtute tu Israel mite hnawh in ti songah a lut fangin, Bawipa in ti khiah kopruai leh ai anite tu khuk sek i. Ikhalselai Israel mite tu tifingriat songai lai ro vuman vak tlang i.

²⁰ Aaron ai farnu, nupang prophet, Miriam in khuang pakhat lang ai a dang nupangte inkhai khuang tum kongin lamai Miriam hlun tlang i.

²¹ Miriam in anite hnenah, “Bawipa hnenah la sa tu ih, Songlawi ngai in neh zo i; Siphuh le siphuh vumto ralkapte tu, tipui songah tlok zo sek i,” tiin sa i.

Ti Kha

²² Moses in Israel mite tu timtuahruai cialep ai Tipui San in feh tuhin hoi i. Cen Shur nelrawn ah feh tlang i. Nithum song nelrawn ah feh napui hang ai ti tawk tlang lai lo i.

²³ Ciatihin Marah ah hleng napui ciata ai tidap tu a kha cikhling imanin ding thil lo i. Ciamanin Marah tiin a kohnak i.

²⁴ Ciafangin Moses hnenah, “Akontih in ding tuh i ing” tiin cam tlang i.

²⁵ Moses tu a rohpui in Bawipa hnenah sawngen ai Bawipa in Moses hnenah thingtan pakhat hmuh i. Ciami thingtan heh Moses in tidap songah a lon fangin ti tu kha nawn lo i. Ciata ah Bawipa in cu ai amahte hlun tuhhnak dante pe i.

²⁶ Bawipa in, “Kaimah ning Bawipa le ning Pathian thu a felniu in ngai ai thudik i tihnak bawn in i thukham hlun in i dan hmuahhmuah ul le i sikhaw, Egypt mite hnenai i hlengruaihnak urhnak hmuah khiah pakhat khai tuar tuh lo i si. Kai tu ning cakruaitu Bawipa ing,” ti i.

²⁷ Cia hnuaah ciami cirhtite hlaihnih le tuumkungte sawmsarih umhnak Elim ah hleng tlang i. Ciata ai ti kamah buk zar tlang i.