Suahhlannak 14 - Zanniat Bible

Tipui San Tanhnak

¹ Bawipa in Moses hnenah,

² “Israel mite tu khel lam let tuhin le Pi Hahiroth hmai, Migdol le Tifingriat karlak ah Baal Zephon lam hoi in zancam tuhin rel tu. Cia hmun Tipui San kamah zancam tuseh.

³ Ciafangin Pharoah in, “Israel mite tu vansang in vakvai ai nelrawn ah tang ihang,’ tiin ruat tuh i.

⁴ Cen Pharoah ai thinlung tu ruhruai tuhai Israel mite heh ning hnawh tuh i. Ciafangin Pharoah le a ralkapte neh tuhai ciami in i hming i thangruai tuh i. Ciafang ian in Egypt mite in kaimah heh Bawipa ing tiin i ling tlang tuh i,” tiin ti i. A relhnak bangin Israel mite in bawn tlang i.

⁵ Egypt kumpibawi hnenah Israel mite tlan zo sek thu a rel fangin, amah le a kuthnia tlangsuakte tu thinlung thleng lehsal ai, “Kin bawnciahnak heh ziang i?” “Zaimanin kin sal ihnak in Israel mite suakruai ising?” tiin ti tlang dekdo i.

⁶ Ciafangin Pharoah in a raltawnghnak a siphuhlengte heh thuam pairuai cialep ai a ralkapte khai fehpui i.

⁷ A pha ber rillephnak siphuhlengte za ruk, le a vumah ralbawi pakhat ṭen to in le a dang Egypt mite ai siphuhlengte inkhai hnawh tlang i.

⁸ Bawipa in Pharoah ai thinlung ruhruai manin, ralpha ngai ai a fehtu Israel mite khiah a hnua an hnawh tlang i.

⁹ Egypt mite in amahte siphuh hmuahhmuah thawn Pharoah ai siphuhleng a mawngtute le a ralkapte thawn Israel mite khiah hnawh ai Pi Hahiroth hiangai Baal-zephon hmai Tipui San hiangah man i.

¹⁰ Pharoah in man taito khiah Israel mite in hmu fangin thinlau tlang ai Bawipa hnenah au in kap tlang i;

¹¹ Cen Moses hnenah, “Egypt ramah hlanmual um lo manin heta nelrawn ramkhing ah thi tuhin kin hoi isim? Egypt ram an kin suah ai na thil bawnhnak heh sik tu!

¹² Egypt ramah kin um lai in hetih ang cang tuh i, tiin na ti cia tho lo i ing maw? ‘Kin hnaihnok mah; Egypt mite hnenah sal cang sawn nga ing,” na ti ang tho ing? Hemi nelrawn ramkhing ah thi tahin sal cang kin hiam sawn i,” tiin ti tlang i.

¹³ Ciafangin Moses in Israel mite hnenah, “Lau mah ih; kho ngai in ding tu ilai, tunnia ah ning o tuhin Bawipa ai bawn tuhhnak sik tu ih. Tunnia ning hmuhnak Egypt mite heh hmu tuh nawn lo ihang i si.

¹⁴ Ningmah ca Bawipa in ning tawng sah tuh i. Ning bawn tuhhnak zaikhai um lo i. Thinnuamniu in um tu ih,” tiin ti i.

¹⁵ Bawipa in Moses hnenah, “Zaimanin i hnenah au tlang hnelhno i si? Israel mite heh hmai lamah nor tuhin rel tu.

¹⁶ Na faikiang dang tulai, tifingriat vumah na ban pharh tu. Cen ti khiah khan dun tuhai Israel mite tu lai ro vuman vak thil tuh i.

¹⁷ Egypt mite thinlung tu ruh roh in bawn tuhai ning hnuacang in ning hnawh tuh i. Ciafangin Pharoah le a ralkapte le a siphuhleng le a mawngtute neh tuhai ciami in i hming i thangruai tuh i.

¹⁸ Ciatihin anite i neh fangin Egypt mite in Bawipa ing ti khiah i ling tuh i,” tiin ti i.

¹⁹ Israel ralkap burpui hmai lamah feh ngiotu de Pathian ai vancungmi tu thawn teu ai hnua lam sawn in khor i. Amahte hmaicang ai um mairo zual khai hnua lam sawn ah thawn ai

²⁰ Egypt ralkapte le Israel mite burpui karlak ah thawn i. Mairo um ai Egypt ralkapte ca khuathim ai Israel mite ca ahcen khuavar i. Ciamanin zankhuavar nong dun thil veve loin um tlang i.

²¹ Moses in tifingriat vumah a ban pharh fangin, Bawipa in nisuah lamai hlivua raw roh zuangruai ai zanvar a zuang hnuaah tipui hnia lamai lai ro dak i. Tipui khiah khan ai,

²² Israel mite tu ti pui song lai ro vuman vak i. A sir le sir ah tipui khiah bangkhang bangin tung i.

²³ Cen Egypt mite inkhai Pharoah ai siphuh hmuahhmuah le a siphuhlengte le a mawngtute thawn tipui songah hnawh thotho i.

²⁴ Zing lam khuavar dawn fangin Bawipa in mai zual le mairo zual vuman Egypt ralkapte heh sik ai thinpit vansang thai in bawn i.

²⁵ A siphuhleng ke hmuahhmuah heh tarruai sek ai harsa ngai in thawn thil fangfang i. Ciafangin Egypt ralkapte in, “Bawipa in Israel mite lam bawm ai kin tu kin tawng i, tlan ngasing,” tiin ti tlang i.

²⁶ Cialak ah, Bawipa in Moses hnenah, “Tifingriat vumah na ban pharh tulai Egypt mite le a siphuhlengte le a mawngtute vumah tipui let tuhai pil tuh sek i,” tiin ti i.

²⁷ Cen Moses in a ban heh tipui vumah pharh ai zing khuavar fangin tipui tu let ai amah kel in cang leh i. Egypt mite tu tlansuak tum in tipui pel khalselai Bawipa in tipui songah lon sio i.

²⁸ Tipui tu kop dun leh ai tifingriat song tianin Israel mite a hnawhtu, Pharoah ai ralkap hmuahhmuah le a siphuhleng le a mawngtute khai khuk sio i. Pakhat khai luat lo i.

²⁹ Ikhalselai Israel mite tu a sir le sir ah Tipui khiah bangkhang bangin tung ai tifingriat songai lai ro vuman fehsuak i.

³⁰ Cia nia ah Egypt mite kut songin Israel mite tu Bawipa in osuak ai Egypt mite ai mithi luang heh Israel mite in tipui hiangah hmu tlang i.

³¹ Zaitluk huham lian thawn Bawipa in Egypt mite tawng i ti Israel mite in fiang ngai in hmu manin Bawipa khiah kih tlang i; ciamanin Bawipa le a sal pa Moses vumah rinsanhnak nai tlang i.