Suahhlannak 1 - Zanniat Bible

Israel mite Egypt Ram Ai Harsa Tuarhnak

¹ Jacob le amahte innsang ṭen thawn Egypt ramah fehtu a fapate hming tu:

² Reuben, Simeon, Levi le Judah,

³ Issakhar, Zebulun le Benjamin,

⁴ Dan, Naphtali, Gad le Asher i.

⁵ Jacob ai songsuak fate tu minung sawmsarih i. Joseph tu Egypt ramah um cia zo i.

⁶ Cia hnuaah Joseph tu thi ai, a ute veksen le ciami san song mite a veksen in thi tlang sek i.

⁷ Ikhalselai Israel mite in fate tampui pung ai Egypt ram dim in pungzai ai hat khai hat ngai i.

⁸ Cia can ah Egypt ramah Joseph ling lotu kumpibawi thar pakhat kai i.

⁹ Amah in a minungte hnenah, “Sik tu ih, Israel mite heh kin tahin tam hlaiah hat fawn ai kin caah a laukul i.

¹⁰ Ciamanin i ngai tu ih, Israel mite pungzai amam lohnak tuhin thinfimniu in thuruat kin cu ihang. Ral nai pang lesingkhaw kin ralte hnen lam sawn ah ṭang in kin tawng lekhaw kin ram songin suak thai pang i,” tiin ti i.

¹¹ Ciamanin anite thinpit thai in naper har bikbik perruaitu tuhin amahte vumah sal khawngtute dah i. Ciafangin Israel mite in rong khawihnak tuhin Pithom le Rameses khuapuite khiah Pharoah ca sa tlang i.

¹² Ikhalselai Egypt mite in cawh amam fangin Israel mite tu pungzai amam i. Egypt mite in Israel mite khiah hua ai kih fawn i.

¹³ Ciamanin sal rimsu in bawn i.

¹⁴ Nawngbek cokruai ai ukkhe bawn naper har perhnak manin anite nun har amam i. Naper har hinkhim khiah ninghiohnak nai loin khengkhebel in perruai i.

¹⁵ Cen Hebrew nupang a bawmtu naudongtu sayamate hnenah Egypt kumpibawi in thu rel i. Pakhat tu Shiphrah i ai a khatta tu Puah i.

¹⁶ Anite hnenah, “Hebrew nupang in fa nai ai ning tuamhlawm fangin nauniu pasalfa lekhaw rek tuh cuamco i si; nupangfa lekhaw rek tuh lo i si,” tiin ti i.

¹⁷ Ikhalselai naudongtu sayamate in Pathian kihzah manin kumpibawi ai thu khiah hlun kawm lo i. Pasalfate khai rek loin zuah i.

¹⁸ Ciamanin kumpibawi in naudongtu sayamate ko ai, “Zaimanin hetihin bawn ai pasalfate zuah sio i si?” tiin zawt i.

¹⁹ Cen anite in, “Hebrew nupangte tu Egypt nupangte bang ilo i. Cakvak ngai ai nau nai bai ngai de i; naudongtu kinmahte hleng man hlanah nau nai man ciamco de i,” tiin ti i.

²⁰ Pathian ai phathnak heh naudongtu sayamate hnenah hleng i. Ciatihin Israel mite tu pungzai ai mithahat bikbik cang tlang i.

²¹ Naudongtute in Pathian tu kihzah manin anite inkhai fate nai kawm veve i.

²² Ciafangin Pharoah in a ram mite hnenah, “Hebrew nupangte ai naihnak pasal fa hmuahhmuah heh Nile runpui songah lon tuh i si. Ikhalselai nupangfate tu lon loin zuah tuh i si,” tiin thupe i.