Seemthawhnak 6 - Zanniat Bible

Minung Sualhnak

¹ Laivum pumpuhluk ah minungte tu pungzai amam ai fenu tampui khai nai i.

² Ciafangin Pathian ai fapate in ciami fenute mawi bikbik hmu fangin amahte daihhnak ril ai hoi tlang i.

³ Ciafangin Bawipa in, “Minung hnenah i rauhla heh kumzangza in umruai tuh lo ing, zaimantifangin taksa naimi i. Tunai panin kum za le kum kul tah tam nung tuh lo i,” tiin ti i.

⁴ Cia san le ciahnua san ahkhai Pathian ai fapate le minung ai fenute pawl dun ai naihnak fate tu tlami bangin a ham bikbik i. Anite tu hlanlai san ai hmingthang le ralpha bikbik pawl i.

⁵ Pathian in laipua vumai minungte hmuahhmuah heh a hrokhrawl in amahte thinlung ah ruathnak siava lekin dim i, ti a hmu fangin,

⁶ lailung vumah minung a bawn heh sir ai a thinhnawm i.

⁷ Ciamanin, “I bawnciahnak minung hmuahhmuah, konteng ah a um inkhai hnawmcan tuh sek ing. Ramsate le vaniute khai, a bok ai vak thai tianin hnawmcan leh tuh sek ing, a bawn ngah ta i sir i,” tiin ti i.

⁸ Ikhalselai Noah vum ahcen Bawipa a lungawi i.

^9-10 Noah ai fate tu hemite i: fapate pathum nai ai Shem, Ham le Japhet i. Noah tu mipha bik i ai cia san ahcen amah pakhat ian Pathian ai lungkhimmi i. Pathian thawn a um kawmtu i.

¹¹ Ikhalselai midang hmuahhmuah Pathian hmaiah siava ze ai hnawmhnak heh khuahacang ah karhzai amam i.

¹² Cen Pathian in laivum heh a pha lo ze in hmu i, zaimantifangin mi zongzong phatlohnak in dim i.

Noah In Lawng Bawn I

¹³ Cen Pathian in Noah hnenah, “Minung heh laipua vuman boruai tuhin ruat zo ing. Siatsuah tuh sek ing, zaimantifangin laipua heh sual bawnhnak in dim i.

¹⁴ Nangmah ca Cyprus thing pha phun in lawng bawn tu, A songah akhante tampui bawn tulai, a songlam le pualam farhnai noih tu.

¹⁵ Ciami lawng khiah pi za li le sawmnga sau, pi sawmsarih le pi nga kau, pi sawmli le pi nga sang in bawn tu.

¹⁶ A phukhuk bawn tulai a khuh le a bangkhang karlak khiah zung hlairiat in zuah tu. Cen thuah thum in bawn tulai a sir ah dawngkham bawn tu.

¹⁷ Lailung vumah tilawi tlungruai tuhai a nungmi hmuahhmuah siatsuah tuh sek ing. Lailung vumai a nungmi hmuahhmuah thi tuh sek i.

¹⁸ Ikhalselai nangmah thawn thukhamhnak bawn tuh ing. Na nupui le na fapate le a nupuite thawn lawng songah lut tuh i si.

¹⁹ Nung tuh ve in ramsa hinkhim in a nuu le a paa, khuah khat ṭen, lawng songah khum tu.

²⁰ Vaniu hinkhim songin pahnih ṭen, ramsa songin a ham ituseh a sen ituseh pahnih ṭen, a nung thilhnak tuhin lawng songah lutpui tu.

²¹ Ai pha ti le rong hinkhim in khawl tulai, nangmah le amahte ca dah tu. Hemi tu lawng songah ning aih tuh i,” tiin ti i.

²² Pathian ruaihnak bang rori in Noah in bawn sio i.