Seemthawhnak 47 - Zanniat Bible

¹ Joseph tu Pharoah hnenah kawi ai, “I pa le i ute tu Canaan ram an tuute le kawlpawrual le amahte naihnak hmuahhmuah thawn hleng zo i. Tunin Goshen ramah um tlang i,” tiin rel i.

² Cen amah hnenah a fehpuihnak a unaute panga heh Pharoah hnenah hmuh i.

³ Ciafangin Pharoah in, “Ning tu ziang naper per i si?” tiin a zawt fangin anite in, “Bawipa, Kin pupate bangin kin khai tuukhal i ing.

⁴ Bawipa, he ramah hleng zo i ing. Zaimantifangin Canaan ramah rian tlung a roh ze manin kin sumhnamte hrangah hamhing peupeu rin um lo i. Ciamanin bawipa, ninghio niu in Goshen ah khuato kin siang tu,” tiin ti tlang i.

⁵ Ciafangin Pharoah in Joseph hnenah, “Tun tu na pa le na unaute hleng zo ai,

⁶ Egypt ram tu ningmah ai i. Goshen ramah um tuhang seh; kin ram songah a phaber hmun pakhat i. Cen amahte lakah rinsantlak mi um lekhaw i sumhnam khawngtu tuhin dah tu,” tiin ti i.

⁷ Cen Joseph in a pa Jacob heh fehpui ai Pharoah thawn tawkdunruai i. Jacob in Pharoah heh hmuifu pe i.

⁸ Cen Pharoah in, “Kum zaizah ihang si?” tiin zawt i.

⁹ Jacob in, “Laivum ah vakvai in kum za le sawmthum i nung zo i. I pupate vakvai kum zah lai lo ing. I kum tlawm napui i nunsong i san heh a har ze i,” tiin ti i.

¹⁰ Jacob in Pharoah heh hmuifu pe ai let i.

¹¹ Joseph in a pa le a ute tu Pharoah thupeciahnak bangin Egypt ram songai rampha hmun ber Rameses khuapui hiangah umruai i.

¹² A pa le a unaute le, a pa songkhat hmuahhmuah a nauta ber tianin Joseph in rong aih cawm liang i.

Joseph In Ram A Ukdan

¹³ Rian tlung roh amam manin laivum ram konteng ahkhai rong um lo ihang. Egypt le Canaan ramai minungte tu rikam ai thanau in um i.

¹⁴ Ciafangin Egypt le Canaan ram songai minungte rong laihnak paisa a veksen in Joseph in khawm sek ai Pharoah ai inn ah dah i.

¹⁵ Ram song mite a naihnak paisa a bo sek fangin Egypt mite tu Joseph hnenah kawi ai, “Rong kin pe tu. Kin paisa bo zo sek ihang. Zaital kin ruat sah hlahle sikhaw kin thi tuh sek i,” tiin ti tlang i.

¹⁶ Ciafangin Joseph in, “Ning paisa bo zo sek lekhaw ning sumhnam koih tu ilai rong in ning thleng tuh ing,” tiin ti i.

¹⁷ Ciamanin Joseph hnenah a sumhnamte siphuh, tuu, me, kawlpaw le laakte heh koih ai Joseph in rong in thleng i. Cia kum tu amahte sumhnam hmuahhmuah man ah rong pe i.

¹⁸ A hmai kum fangin Joseph hnenah kawi tlang lala ai, “Bawipa, pheh thil lo ihang ing, kin paisa bo zo sek ai kin sumhnam khai nangmah ai cang sio ihang. Bawipa, kin taksa ruangpui le kin loram siarlo na pe tuh zaikhai nai lo ihang ing.

¹⁹ Kin thi siang malai zaital kin ruat sah tu. Kinmah kin minung le kin loramte heh rong in kin lai tuhang. Pharoah sal in cang tuh sawn hang ai kin ram hmuahhmuah khai amah ai cang tusek hang seh. Rong loin kin thi tuh lo le kin loramte khai hampalak cang tuh loin rong le hlaici kin pe tu,” tiin ti tlang i.

²⁰ Ciafangin Joseph in Egypt ram songai loram hmuahhmuah heh Pharoah ca lai sek i. Rian roh ze manin Egypt mite hmuahhmuah in amahte loram zuar sek i. Egypt ram hmuahhmuah Pharoah ai cang sek i.

²¹ Egypt ram khat lam ning in a khat lam ning tian ai a umtu minungte hmuahhmuah khiah napertu sal ah cang sek i.

²² Joseph in a lai lohnak lairam tu suangbawite lairam lek i. Suangbawite tu a lairam zuar kul lo i, zaimantifangin Pharoah in pumcawmhnak pe i.

²³ Cen Joseph in Egypt mite hnenah, “Tunnia ah ningmah le ning loramte heh Pharoah ca ning lai zo sek ti hmu tlang i si. Heta ah hlaici ning ca um ai ning lo ah cing tu ih.

²⁴ Rongkhawm cu fangin seu nga ah seu khat Pharoah hnenah pe tu ih. A tanghnak hmuahhmuah ningmah ca tuh i; ning lo ai ning cing tuh hlaici le ningmah le ning songkhatte, ning fate pumcawmhnak hrang tuh i,” tiin ti i.

²⁵ Ciafangin anite in, “Nun kin o ngah zo isi; bawipa, kin vumah na pha ze ai kin tu Pharoah sal cang tuh i ing,” tiin ti tlang i.

²⁶ Ciamanin Egypt mite rong naihnak songin seu nga ah seu khat Pharoah pe tuhin Egypt ram songah Joseph in dan bawn i. Suangbawite ai lairamte tu Pharoah lairam in cang thil lo i. Cia dan heh tun tian hmang lai i.

Jacob Ai Hnuataber Thucah

²⁷ Israel mite tu Egypt ram Goshen ah ciatihin um tlang i. Mi nainung cang ai, lairam nai in pungzai tlang i.

²⁸ Jacob tu Egypt ramah kum hlaisarih um ai, a kum za le sawmli le kum sarih khim i.

²⁹ Cen Jacob tu a thi cu nong hang manin a fapa Joseph heh ko ai, “Na mithmai pha co ngah lengkhaw i hnenah thukham tu. Na kut heh i kal kualak ah dah tulai i vumah thupeu ngai in rinsantlak na i tuhin le Egypt ramah i phum tuh loin Bawipa hming in thu i kham tu.

³⁰ I thi fangin Egypt in i fehpui tulai i pu i pate bangin amahte hlanmual ah i phum tu,” tiin ti i. Joseph in, “Na ponghnak bangin bawn tuh ing,” tiin ti i.

³¹ Jacob in, “Bawn tuh rori ing tiin cukcam in thu i kham tu,” tiin ti ai Joseph in thukham i. Ciafangin Jacob in a khuahluan khunlu vumah ut in anghnak thu rel i.