Seemthawhnak 43 - Zanniat Bible

Egypt Ramah Benjamin Fehpuihnak

¹ Canaan ramah rian tlung roh amam ai,

² Jacob ai innsangte tu Egypt ramai laihnak rong ai ai khawng zo sek fangin Jacob in a fapate hnenah, “Feh leh tu ilai kin ca rong lai tu ih,” tiin ti i.

³ Ciafangin Judah in, “Ning nau pa koihpui hlahle i sikhaw i hmel khai i hmu thil tuh lo i si, tiin Egypt ramai bawipa in fiang ngai in ralringhnak kin pe i.

⁴ Kin nau pa kinmah thawn hlat siang lesikhaw feh tuhai nangmah ca rong lai tuh i ing.

⁵ Feh siang hlahle sikhaw feh tuh lo i ing. Zaimantifangin ciami pa in ning naupa koih hlahle i sikhaw i hmu thil tuh lo i si, tiin kin ti ngio i,” tiin ti i.

⁶ Ciafangin a pa Israel in, “Zaimanin kaimah lam tlawmniu tal i ruat loin nau pakhat nai ilai ing, ti tiantian in ciami pa hnenah rel i si?” tiin ti i.

⁷ Cen a fapate in, “Ning pa nung lai awm? Unau dang nai lai aw i sim? tiin kinmah le kin innsang thu lek ciami pa in kin zawt ai, rel loin um thil lo i ing. Ning naupa i hnenah koih tu ih tiin kin ti tuhin ruat hrimhrim lo i ing,” tiin ti tlang i.

⁸ Ciafangin Judah in a pa hnenah, “Kin naupa tu kaimah thawn fehruai tu. Pai tuhai feh tuh ihang ing. Ciatihin kin bawn fang ian in nangmah le kin fate le kinmah khai ituseh rikam in kin thi tuh lo i.

⁹ Kin nau pa ca i nunhnak in thukham ing; mawh hluk tuh um inkhai kaimah in tuar tuh ing. Na hnenah cak le himniu in tlungpui leh hlahle ingkhaw i nun song hmuahhmuah na hmaiah mawhhluk tuar tuh ing.

¹⁰ Hetihin kin rai hlah selai Egypt ram feh in vel hnih rin let man tuh zo ihang ing,” tiin ti i.

¹¹ Ciafangin a pa in, ciatih tuh thotho lekhaw hetihin bawn tu ih; kin ram songai suakhnak lakah a phaber pawl thinghnai, khoitizu, aihre masala, khumkhal mu le mete thai tlawmniu ṭen in keng tu ilai ciami pa heh lehsawng pe tu ih;

¹² Ning dip songai tangka ning hmulehhnak khai khirh kul tuh manin a let hnih in keng tu ih. Paisa ning khirh sual i tuh i.

¹³ Pai tuhang ilai ning naupa khai ciami pa hnenah fehpui tu ih;

¹⁴ Ning u pakhat le Benjamin heh ning hnenah let siang thai tuhin Cungnungber Pathian in ciami pa heh ngaihharhnak nairuai tuseh. Kaimah in i fate pairalhnak tuar kul tuh hrimhrim ilengkhaw tuar bang menma hek ngang,” tiin ti i.

¹⁵ Ciamanin lehsawngte keng ai paisa khai a let hnih in keng i. Thilpai ai Egypt ramah feh tlang i. Benjamin khai keng ai Joseph heh tawk tlang i.

¹⁶ Amahte hnenah Benjamin tel khiah Joseph in a hmu fangin a hnenum pa hnenah, “Hemite tu i inn songah lutpui tu; sumhnam lu khat ro tulai suang tu. Zaimantifangin sun ah kaimah thawn rong ai tlang tuh i,” tiin ti i.

¹⁷ Joseph ai thupeciahnak bangin a hnenum pa inkhai bawn ai Joseph inn songah lutpui i.

¹⁸ Joseph inn a hleng fangin thinlau tlang helhhlo i. Zaimantifangin, “Hmasa rong kin lai fangin kin tangkate kin dip songah um manin heta ah kin kawiruai i. Sual kin si ai rinlopui in sal kin can tuh sek i. Kin laakte khai kin long tuh sek ibang hang,” ti dun i.

¹⁹ Ciamanin anite tu Joseph ai hnenum pa hnen dawngkham hiangah kawi tlang ai,

²⁰ “Aw bawipa, rong lai tuhin heta ah vel khat kawi awng zo i ing.

²¹ Kin tlung fangin kin cam hmun ah kin dip song kin sik fangin rong laihnak man paisa kin pehnak heh a khimniu in kin dip vumta ber ah hmu leh ṭen i ing. Cia tangka heh tunah keng leh i ing.

²² Cen rong laihnak tuh tangka dang khai keng pah i ing. Kin dip songah aisu in tangka kin thun sah lehsal i, ti ling lo i ing,” tiin ti tlang i.

²³ Ciafangin Joseph ai hnenum pa in, “Lau mah ih. Ning Pathian le ning pa ai Pathian in tangka heh ning dip songah ning thun sah i tuh i. Rong man tangka a khimniu in ngah ing,” tiin ti i. Cia hnuaah anite hnenah Simeon khiah suah i.

²⁴ Cen hnenum pa in anite unau tlang heh Joseph inn songah lutpui ai ke som tuhin tidap pe ai laakte khai rong paih sah i.

²⁵ Sun fangin Joseph kawi tuhai amahte thawn rong ai tlang tuh i, ti a ling fangin amahte kenghnak lehsawngte suah ai Joseph pe tuhin a cialep in dah tlang i.

²⁶ Joseph a hleng ngaingai fangin amahte kenghnakte heh a inn songah pe ai a hmaiah laikhun in lu ut tlang i.

²⁷ Cen Joseph in anite thula khimniu in a zawt hnuaah, “Kin hnua ai ning kawi fangin a hlombawr ngai ning tihnak ning pa thula i rel i si, tun tang zaitin um ini? Cak lai awm?” tiin zawt i.

²⁸ Ciafangin anite in, “Kin pa, na cengpa heh cak hlen lai i,” ti hnuaah khuk caicin in ut tlang i.

²⁹ Cen Joseph in a nau Benjamin hmu fangin, “A thula ning relhnak ning nauta ber pa tu amah ihang im? tiin ti ai, Pathian in hmuifu na pe tuseh, i fapa,” tiin ti i.

³⁰ Ciatihin a ti hnuaah Joseph tu rang ngai in a khan songah lut teu i, zaimantifangin a nau a hmu lehsal manin a lungzur i. Sup ben tau lo manin a inn songah tlum teu ai kap dekdo i.

³¹ A hmai hliam ben fangin suak leh ai a lungzur sup kongin, “Rong bawn tuhang ih,” tiin a hnenumte thupe i.

³² Joseph tu a tumce in rong bawn sah i; a unaute khai a tumce in bawt i; cen Joseph hnenah rongsimtu Egypt bawi upate khai a tumce in rong ai tlang i. Zaimanin Egypt mite a tumce in rong ai i ti fangin, Hebrew mite thawn rong ai khat heh zakthikul in ruat manin i.

³³ A unaute Joseph lam hoi in toruai ai amahte kum bangin upa ber in nauta ber tian a sangsang in to tlang hngeuhhngo i. Ciatih ai to khiah hmu fangin pakhat le pakhat sik dun tlang luplo i.

³⁴ Joseph cabuai ai umhnak rong heh lang ai a unaute hnenah belh i, ikhalselai Benjamin tu a ute tahin let nga tam in rong pe i. Ciatihin ai le ding tlang ai nuam ngai in um tlang i.