Seemthawhnak 33 - Zanniat Bible

Jacob In Esau Tawk I

¹ Jacob in Esau tu minung za li thawn kawi a hmu fangin a fate heh Leah, Rachel le a nusunte pahnih hnenah umruai sek i.

² A nusunte pahnih le a fate tu hmasaber ah dah i; a sontu ah Leah le a fate dah ai a hnuataber ah Rachel le Joseph dah i.

³ Amah Jacob tu a hmasaber ah vak ai vel sarih tian a hmai laikhun in lu a ut hnuaah a upa hnen hleng i.

⁴ Ikhalselai a upa Esau in Jocob hmu fangin a tawk tuhin dawp ai Jacob heh huam lio i; a hawng in kuah ai thut i. Cen amahte pahnih in kap kawm i.

⁵ Cen Esau tu khuaher ai nupangte le naupangte hmu i. “Na hnenai nupang le naupangte tu aisute i?” tiin zawt i. Ciafangin Jacob in, “Na cengpa kaimah heh Pathian in ning i hio manin a pehnak i fate i,” tiin ti i.

⁶ Cen a nusun le a fate kawi ai upathnak pe in ut tlang i.

⁷ Cia hnuaah Leah le a fate ut tlang i; a hnuataber ah Joseph le Rachel kawi ai ut kawm i.

⁸ Cen Esau in, “Mitua ai sumrual i hmuhnak tu ziang sullam i,” tiin zawt i. Jacob in, “I bawipa, na ngaihharhnak i ngah tuh hrang i,” a ti fangin,

⁹ Esau in, “I daih zah nai ve ing, i nau; nangmah ai heh nangmah in nai tu,” tiin ti i.

¹⁰ Jacob in, “Ciatihin tu i maseh, na mithmai pha i coruai lesikhaw i lehsawng pehnak i sang sah tu hram. Tun in i vumah na thinlung tluang ngai in um ai na mithmai hmu heh Pathian ai mithmai hmu bang i.

¹¹ Ninghioniu in nangmah ca i koihhnak lehsawng heh co tu hram; Pathian in ning i hio ai i kulhnak hmuahhmuah i pe i,” tiin ti i. Ciatihin a sang sah hlanlo langruai belbo i. Cen Esau in sang sah i.

¹² Cen Esau in, “Coilaw kin feh tuh hmunah feh ngahang sing. Kaimah in kong ning hoi tuh ing,” tiin ti i.

¹³ Ikhalselai Jacob in, “Bawipa, kin fate heh naupang ze lai i; Cen kin tuu le kin kawlpawte khai ruat kul i; hnawifawp lai ciang i. A khaltute in ni khat ah a hla ze hnawt fangin thi tuh sek i.

¹⁴ Ciamanin bawipa, nang hmaiah feh hmasa tu; Sair ramah na hnen i hleng tian, sumhnam le naupangte a vak ben tawk in na hnawh tuh i ing,” tiin ti i.

¹⁵ Ciafangin Esau in, “Ciatih ilekhaw na hnenah i minungte a hrek in na hlup tuh ing,” tiin ti i. Ikhalselai Jacob in, “Na thu ruatthiam vumah nangmah naihhla, bawipa, ikhalselai anite tanglawk kul tuh lo i,” tiin ti i.

¹⁶ Ciamanin Esau tu Sair ramah cia nia ah let teu i.

¹⁷ Jacob tu suak ai Sukkoth khua lamah feh i. Ciata ah amah ca tuhin inn sa ai, a sumhnam hrang a khawk bawt i. Ciamanin cia hmun heh a hming Sukkoth tiin bawn i.

¹⁸ Jacob tu Masopotamia ram an a let fangin Canaan ram Shechem khua ah himniu in hleng i. Shechem khua hnarpua ah pon in inn sa i.

¹⁹ Cia hmun heh Shechem ai pa Hammor ai tefate hnenah ngun tangka zakhat in lai i.

²⁰ Ciata ah puleng tiang ai a hming ah El, Israel ai Pathian, tiin bawn i.