Seemthawhnak 25 - Zanniat Bible

Abraham Ai A Dang Tesinfate

¹ Abraham in nupui dang hoi lehsal ai a hming Katurah i.

² Katurah thawn a naihnak fate tu Zimran, Jokshan, Medan, Midian, Ishbak le Shuah i.

³ Cen Jokshan ai fapate tu Sheba le Dedan i ai Dedan ai naihnak fate tu Asshurim, Lethusim le Leummim i.

⁴ Midian ai fapate tu Ephah, Epher, Hanock, Abida le Eldaah i. Amahte veksen in Katurah ai fate i.

⁵ Abraham in a naih hmuahhmuah Isaac pe i.

⁶ Ikhalselai a thi hlanah a nunawn ai fapate hnenah lehsawng zem ai Isaac thawn um tlang tuh loin hmundang nisuah lam ramah fehruai sek i.

Abraham Thihnak Le Vuihnak

⁷ Abraham tu kum za le kum sawmsarih le kum nga tian nung i.

⁸ Hlombawr khakhun hnua tian nung ai cia hnuaah thi ai, a miphunpuite hnenah taikhawm leh i.

⁹ Hit mi Zohar ai fapa Epharon hnenai a laihnak lairam, Mamre nisuah lam Makpelah lungkhukua songah a fapate Isaac le Ishmael in phum kawm i.

¹⁰ Hit miphunte hnenin amah Abraham in a laiciahnak ram i. A nupui Sarah thawn a pahnih in ciata ah phum kawm i.

¹¹ Abraham thi hnua fangin a fapa Isaac tu Pathian in hmuifu pe ai Beer-lahai-roi namkum hiangah um i.

Ishmael Ai Tesinfate

¹² Sarah ai sal nu, Egypt mi Hagar thawn cawihnak Abraham fapa Ishmael ai fasuante tu a hnia lamai bangin i.

¹³ Ishmael ai fapate hming a sangsang in, upa ber tu Nabaioth, cen Kedar, Adbeel, Mibsam,

¹⁴ Mishma, Dumah, Massa,

¹⁵ Hadad, Tema, Jetur, Naphish le Kedemah i.

¹⁶ Hemite heh Ishmael ai fapate i ai amahte khua le amahte umhnak ram hming tu amahte hming suang in bawnhnak i. Anite tu miphunte hlaihnih sentu cang tlang i.

¹⁷ Ishmael tu kum za le kum sawmthum le kumsarih nung i. A thi fangin a miphunpuite thawn taikhawm tlang i.

¹⁸ Ishmael ai tesinfate tu Egypt ram nisuah lam, Assyria ram fehhnak lam Havilah le Shur karlak ai ramah um i. Abraham ai tesinfa hnenah um loin a dangniu in um tlang i.

Esau Le Jacob Tehnak Thu

¹⁹ Abraham ai fapa Isaac tluanthu tu hetihin i.

²⁰ Masopotamia ram Aram mi Bethuel ai fanu, Laban ai farnu Rebecca a hoi fangin Isaac tu a kum sawmli i.

²¹ Rebecca in fa nai lo manin Isaac in Bawipa hnenah sawnget de i. Bawipa in a sawngenhnak a za fangin Rebecca in naupai i.

²² A pum songah faphir pai ai heng dun hnelhno de i, ti a ling fangin a thinhar in, “Hetih lekhaw nun man nai lo ing?” tiin ti i. Cen Bawipa hnenah sawngen i.

²³ Bawipa in, “Na pum songah miphunte pahnih pai isi; Ral dun phun hrimhrim in te kawm tuh i; Pakhat tu a khatta tahin a tha hat tuhai, A upa sawn in nauta sawn ai cengfa cang tuh i,” tiin ti i.

²⁴ Rebecca tu a nihla a khim fangin nau a phir in nai i.

²⁵ A suak hmasa pa tu misan i ai a ruang pumpalah hmul nai i. Ciamanin a hming Esau tiin bawn i.

²⁶ A naupa a te fangin a upa Esau ai kedo awh meng kongin suak i. Ciamanin a hming Jacob tiin bawn i. Fapa a nai fangin Isaac tu kum sawmruk i.

Esau In Fa Upa Covo Zuar I

²⁷ Cen amahte unau in khang kawm zianzo ai Esau tu sakap thai i ai hampalak vak a hiamthaitu cang i. Jacob tu midap niu i ai inn lek ah um menma de i.

²⁸ A sakaphnak sa ai de manin Isaac in Esau heh daih deuh i. Ikhalselai a nu Rebecca in Jacob daih sawn i.

²⁹ Nikhat ah Jacob in pe tihang a suang laitak ah Esau tu hampalak a sazulhnak in tlung i.

³⁰ A rikam ze manin a nau Jacob hnenah, “Ril i kam ze lawmlam i, na tihang san niu ka khat tal i pe tu,” tiin ngen i. (Ciamanin Edom tiin a kohnak i).

³¹ Ikhalselai Jacob in, “Na fa upa covo i pe tulai rong na pe tuh ing,” tiin ti i.

³² Ciafangin Esau in, “Na pe tuh ing; rikam in i thi dawn ai, i covo tu kaimah ca ziang hnempui i,” tiin ti i.

³³ Cen Jacob in, “I covo na pe tuh tengteng ing, tiin thutiam hmasa rih tu,” tiin ti i. Ciatihin Esau in thutiam ai a fa upahnak covo heh Jacob hnenah zuar i.

³⁴ Cen Jacob in sang le pe tihang a suanghnak pe i. Esau in ai le ding hnuaah tho ai feh i. Fa upa ihnak covo zaisiar loin um i.