Seemthawhnak 23 - Zanniat Bible

Sarah Ca Hlanhmun Lai I

¹ Sarah tu kum za le kulhluan sarih nung ai,

² Canaan ram Hebron (ihlahle Kiriath-arba tihnak) khua ah thi i. Abraham tu Sarah thi manin lungsia in ul ai kap i.

³ Cen a nupui luang hiang in tho ai Hit mite hnenah,

⁴ “Kai tu a langniu ai a umtu mikhual mivakvai ing. I nupui phumhnak tuhin ning ram a tlawmniu tal i zuarh tu ih,” tiin ngen i.

⁵ Hit mite in,

⁶ “Bawipa, kin relhnak kin ngai tu, kinmah lakah nang tu milian ngai miuk isi. Kin naihnak hlanmual hmuahhmuah lakai a phaber hmunah na nupui heh phum tu. Na nupui phumhnak ah aisu inkhai kin hlanhmun ha tuh lo i ing,” tiin ti tlang i.

⁷ Ciafangin Abraham tu tho ai Hit mite hmaiah ut in,

⁸ “Hemi ramah i nupui phum tuh lung ning khim lekhaw Hit mi pa Zohar ai fapa Epharon in,

⁹ Makpelah lungkhukua i zuarh tuhin i ngen sah tu ih. A lungkhukua heh a lo tlukhmai ah um i. Hlanhmun nai tuh ve in ning veksen hmaiah a daihzah i ngen in i zuarh tu hram seh,” tiin ti i.

¹⁰ Ciatihin Hit mite tawk dun hmun khuasuah ah Epharon khai tel ve manin misenpui zak in Epharon in,

¹¹ “Bawipa, ciatihin tu i maseh, i ngai rih tu; i ram a veksen in na sum ai a songai lungkhukua khai nai cih tu. I miphunpuite hmai rori ah i loram heh na nupui phumhnak tuhin na sum ing,” tiin ti i.

¹² Ikhalselai Abraham tu mi veksen hmaiah a lu ut ai,

¹³ mizapui zak in Epharon hnenah, “Na thinlung ngaingai lekhaw i ngai rih tu: na lairam a veksen na lai tuh ing. A man i lang tu hram. Cen i nupui vui tuh ing,” tiin ti i.

¹⁴ Ciafangin Epharon in Abraham heh,

¹⁵ “Bawipa, i loram man tu ngun tangka za li lek i ai, nang le kai lakah zaikhai rel tlak lo i! Ciata ah na nupui phum tu,” tiin ti i.

¹⁶ Ciafangin Abraham heh a lungkhim ai, Hit mite hmaiah Epharon ai ngenhnak ngun tangka za li khiah sumpaitute hmanghnak cuai in teh ai pe i.

¹⁷ Ciatihin Mamre in nisuah lam Epharon ai Makpelah lairam tu Abraham ai cang sek ihang. A songai lo le khukua le thingkung hmuahhmuah khai amah ai cang sio i.

¹⁸ Ciami tawk dun hmunai a teltu Hit mi zongzong in Abraham ram i ti lingpui i.

¹⁹ Ciatihin Canaan ram ciami lungkhukua ah Abraham in a nupui Sarah khiah phum i.

²⁰ Ciamanin Hit mite ram awng ciami ram le a songai um khukuate heh Abraham ai ramah cang ai hlanmual in bawn i.