Seemthawhnak 21 - Zanniat Bible

Isaac Tehnak

¹ A thukham cia bangin Bawipa in Sarah tu hmuifu pe ai,

² Sarah in naupai ai Abraham a hlombawr hnuaah fapa nai i. Pathian ai rel cia zo bangin a can hleng fangin fapa nai i.

³ Abraham in a fapa heh Isaac tiin a hming bawn i.

⁴ Cen Pathian ai thupe cia bangin Abraham in Isaac heh niriat a khim fangin a zarhtan i.

⁵ Isaac a te awng fangin Abraham tu kum zakhat i.

⁶ Sarah in, “Pathian in anghnak le hnihnak i pe zo i. Hemi thu a zatu hmuahhmuah in i ang bawm tuh i,” tiin ti i.

⁷ Ciahlaiah, “Sarah in a fapa hnawifawh tuhlai i tiin Abraham hnenah aisu tal in rel awng nitur im? Ikhalselai a tarpui hnuaah amah ca fapa nai zo ing,” tiin Sarah in ti i.

⁸ A fapa tu khang deuhdeuh ai nau hnawihlat nia ah Abraham in rongdo puai lianpui bawt i.

Hagar Le Ishmael Hnawthnak

⁹ Nikhat ah Egypt nu Hagar le Abraham ai nai cia Ishmael le Sarah ai fapa Isaac heh laileng kawm phetpho i.

¹⁰ Ciami heh Sarah in a hmu fangin Abraham hnenah, “Hemi sal nu le a fapa heh hnawt tu. I fapa Isaac ai co tuh na rothil heh he sal nu ai fapa in co thil tuh lo i,” tiin ti i.

¹¹ Ciafangin Abraham tu a thinhar i, zaimantifangin Ishmael khai a fapa thotho i.

¹² Ikhalselai Pathian in Abraham hnenah, “Ciami na fapa le Hagar ca na donhar in um mah. Sarah ai na rel bangin bawn tu; zaimantifangin i thukham cia bangin siar cawk lo na tesinfate tu Isaac songin suak tuh i.

¹³ Na sal nu ai fapa hnen ahkhai tefa tampui pe tuhai miphun lianpui cang tuh i. Zaimantifangin ani khai na fapa i ve i,” tiin ti i.

¹⁴ A thangha zingniu in Abraham tu tho ai Hagar hnenah rong le ti thawlkhat pe i. A fapa Ishmael heh Hagar putruai ai fehruai i. Ciatihin Hagar tu feh ai Beersheba ramcar ah vakvai i.

¹⁵ A ti kenghnak a bo fangin a fapa heh hamphung hniaah dah ai,

¹⁶ “I fapa thi tuh cenin sik ngam lo ing,” ti kongin feh ai kaih zakhat hla hmun dungah to ngio i. Ciatihin a to kongin kap i.

¹⁷ Cen Pathian in nauniu kap aw za ai Pathian vancungmi heh vancung in a hnenah, “Hagar, zaimanin vansang in um isi? Na thinlau mah. Pathian in nauniu aw za zo i.

¹⁸ Tho tu; na nauniu lang tulai ngamruai tu. A tefate tu miphun lianpui ah bawn tuh ing,” tiin ti i.

¹⁹ Ciafangin Pathian in Hagar mitvarruai ai namkum pakhat hmu i. Ciata ah feh ai a tithawl dim in ti thun ai a fapa heh ti pe i.

²⁰ Pathian in umpui ai a fapa tu khang betbo i. Paran ramcar ah um ai sakap mi cang i.

²¹ Cen a nu in a nupui tuhin Egypt nu hoi sah i.

Abraham Le Abimelech lungkhimhnak

²² Cialaitak in Abimelech tu a ralkap uktu bawi Fikol thawn Abraham hnenah kawi kawm ai, “Na bawnhnak hmuahhmuah ah Pathian in na umpui i.

²³ Ciamanin kaimah le i fate thawn le i tesinfate khai kin zawl tuh loin Pathian hmaiah thukham tu. Na hnenah sangtlak in um zo ing ai nangmah inkhai kaimah vumah le he na umhnak ram vumah sangtlak mi na ihnak tuhin thukham bawn tu,” tiin ti i.

²⁴ Ciafangin Abraham in, “Thukham ing,” tiin ti i.

²⁵ Cen Abimelech ai hnenumte in amahte sut cia namkum thu heh Abraham in Abimelech hnenah pon salh i.

²⁶ Abimelech in, “Hemi thu ling awng lo ing. Nangmah inkhai i rel awng lo isi; tun heh a hmasaber i zahnak i,” tiin ti i.

²⁷ Cen Abraham in Abimelech heh tuu le kawlpaw sum ai amahte pahnih in lungkhimhnak bawn kawm i.

²⁸ Ciahlaiah Abraham in tuu nuniu lu sarih lang ai tumce in dah i.

²⁹ “Zaiman hetihin dah isi? tiin Abimelech in a zawt fangin,

³⁰ Abraham in, “Hemi namkum co awngtu heh nangmah isi, tiin iti thil tuhin he tuu nuniu lu sarih heh i sang na kul i,” tiin sawn i.

³¹ Ciamanin ciami hmun heh Beersheba tiin ko i; zaimantifangin amahte pahnih thutiam dun hmun i.

³² Ciatihin Beersheba ah lungkhimhnak a bawn kawm hnuaah Abimelech le a ralkap uktu bawi Fikol tu Filistin ramah tlung kawm i.

³³ Cia hnuaah Beersheba ah Abraham in thingkung pakhat bir ai kumzangza a nungmi Pathian Bawipa bia i.

³⁴ Ciatihin Filistin ram songah Abraham tu a raipui um i.