Seemthawhnak 2 - Zanniat Bible

¹ Ciatihin laipua ituseh van khai ituseh, laivum ai umhnak hmuahhmuah le van vumai umhnak hmuahhmuah thawn Pathian in bawn sio i.

² Ni ruk songah Pathian in a naper ben ai ni sarihhnak nia ah a naperhnak in cawlum i.

³ A naper hmuah ben ai ni sarihhnak nia ah cawlum manin Pathian in cia nia heh hmuifu pe ai ni songlawi cangruai i.

⁴ Lai le van a bawnhnak thula tu ciatihin i.

Eden Vuandum

⁵ Bawipa Pathian in lai le van a bawn ben fangin laivum ah thing le hampa um lo i; hlaici po tuh khai um lai lo i; zaimantifangin Pathian in ruahsiruai lai lo i. Lovaitu tuh minung khai um lai lo i.

⁶ Ruahsi lai lo napui laipua songin ti suak manin laipua heh nelruai hliang i.

⁷ Cen Bawipa Pathian in laivut lang ai minung semsuah i. A hnar songah nunhnak haihawh hmut ai minung ah cang i.

⁸ Cen Bawipa Pathian in nisuah lamai umhnak Eden ah vuandum bawn ai cia vuandum ah a bawnhnak minung umruai i.

⁹ Thai pha a thaimi le a mawi ngai thingkung phuncang ciami vuandum ah poruai i. Vuandum laiteng ah nunhnak thingkung, thupha le thuhnawm thiathiamhnak thingkung khai poruai i.

¹⁰ Cen vuandum nelruaitu tuhin Eden vuandum songin runpui pakhat luang ai vuandum pua hleng fangin runpuite pali in khek tlang i.

¹¹ Pakhathnak runpui hming tu Pishon i ai Havilah ram a kimvel in luang i. Havilah ram ahcen sui um i.

¹² Havilah ramai sui tu a phun pha pawl i ai thinghnai mankhung le Oniks lungvar san khai um i.

¹³ A pahnihhnak runpui tu Gihon i ai Cush ram kimvel ah luang i.

¹⁴ A pathumhnak Runpui tu Tigris i ai Assyria ram nisuah lamah luang i. A palihnak tu Euphrates i.

¹⁵ Cen Bawipa Pathian in a semsuahhnak mipa heh lovaitu le kilkhawltu tuhin Eden vuandum ah umruai i.

¹⁶ Pathian in a hnenah, “Vuandum songai a um thingthai hmuahhmuah ai thil isi;

¹⁷ ikhalselai thupha le thuhnawm thiathiamhnak thingkung ai a thai cenin ai tuh bul lo isi. Ai lesikhaw na ai nia ah na thi tuh i,” tiin rel i.

¹⁸ Cen Bawipa Pathian in, “Minung amah lek ai um tuh heh pha lo i; amah bawmtu tuh a rualpui bawn sah tuh ing,” ti i.

¹⁹ Cen Pathian in laipua lang ai ramsa hinkhim le vaniu hinkhim ah bawn ai akontih in ko nitur maw tiin ciamipa hnenah fehpui i. Cen ciamipa in hming a bawnhnak ṭen bangin amahte hming cang tata i.

²⁰ Ciatihin ciamipa in hampalak ramsa hinkhim ituseh, innzuat sumhnam le van ai zuang thai vaniu hinkhim ituseh a hming bawt i. Ikhalselai amah ca tuhin a bawmtu le rualpui um lai lo i.

²¹ Ciamanin Bawipa Pathian in ciamipa heh mitmu muang ngai in mitmuruai ai a mitmu laitak ah a nakruh pakhat phok ai taksa in hu sah leh i.

²² Mi pa songai phokhnak a nakruh in nupang pakhat bawn ai mi pa hnenah koihpui i.

²³ Ciami pa in; “Tun fangin kaimah bang minung, I ruh ai bawnhnak ruh, I taksa ai bawnhnak i taksa tawk ing; Mipa songai langhnak imanin, Minu tiin ko tuseh,” tiin ti i.

²⁴ Ciamanin mipa in a nu le a pa hlum in a nupui thawn kop i. Ciatihin taksa pumkhat cang i.

²⁵ Anite pahnih in kawngkolh in um kawm napui zakthi kawm lo i.