Seemthawhnak 14 - Zanniat Bible

Abram In Lot Humhnak

¹ Cialaitak in kumpibawite pa li: Babylonia kumpibawi Amraphel, Ellasar kumpibawi Ariok, Elam kumpibawi Chedorlaomer le Goiim kumpibawi Tidal in,

² a dang kumpibawite panga: Sodom kumpibawi Bera, Gomorrah kumpibawi Birsha, Admah kumpibawi Shinab, Zeboiim kumpibawi Shemeber Le Bela (ihlahle Zoar) kumpibawite thawn tawng dun i.

³ Tunai Tipui Thi tihnak Siddim nelrawn ah cia kumpibawite panga khiah kom dun ai phiar tlang i.

⁴ Anite tu kum hlaihnih song Khedorlaomer in uk zo ai a kum hlaithumhnak ah amah tawng tuhin ral a thotute i.

⁵ A kum hlailihnak ah Khedorlaomer le a phiartute tu amahte ralkap veksen thawn tawng ai Ashtaroth Karnaim ah Rephaim neh i, Ham ah Zuzim neh i, Kiriathaim zawllai ah Enim neh ai,

⁶ runsiat nelrawn hiangai umtu Elparan tian, Serih tlang vumai Hor mite khai neh sio i.

⁷ Cen hnua lamah let ai Kadesh (ihlahle Enmishpat) a hleng fangin Amalech mite ram a veksen lang kong ai Hazazon Tamar ramai umtu Amor mite khai neh sek i.

⁸ Ciafangin Sodom, Gomorrah, Admah, Zeboiim le Bela khua ai kumpibawite in amahte naihnak ralkapbur hmuahhmuah khawm ai,

⁹ Elam kumpibawi Khedorlaomer, Goiim kumpibawi Tidal, Babylonia kumpibawi Amraphel le Ellasar kumpibawi Ariok tepawl thawn kumpibawite panga le kumpibawite pali tawng dun dekdo i.

¹⁰ Siddim nelrawn tu yinan ek suakhnak khurte in dim ai, Sodom le Gomorrah kumpibawite tu raltawnghnak in tlan fangin cia khurte songah tlok diamdo i. A dang kumpibawite pathum tu mualtlang lamah tlan i.

¹¹ Kumpibawite pali in Sodom khua le Gomorrah khua songai thil hmuahhmuah, aih le din rong tianin lang ai tlan sek i.

¹² Sodom khua songai a umtu Lot khai a naihnak hmuahhmuah thawn pom ai tlanpui i.

¹³ Ikhalselai raltlantu pa pakhat heh Hebrew mi Abram hnenah hleng ai Lot pom thu rel i. Abram tu Amor mi Mamre ai cianghlim thingkung hiangah um i. Amor mi ai unaute tu Eskhol le Aner i ai amahte unau thum in Abram ṭantute i.

¹⁴ Abram in a songkhat pa pom thu a za fangin a minungte kokhawm ai pasalpui ciang za thum le hlairiat suak tlang ai ralte tu Dan khua tian hnawh i.

¹⁵ Cia hmunah Abram ai minungte tu bur hnih in khan ai zan fangin ralte heh tawng ai neh i. A ralte tu Damascus khua sak lamai Hobah tian hnawh tlang i.

¹⁶ A songkhat pa Lot le Lot ai naihnak hmuahhmuah le nupangte le ralpom mi a dangdang thawn sut sio ai tlungpui sek i.

Melkhizedek In Abram Hmuifu Pe I

¹⁷ Abram tu Khedorlaomer le a dang kumpibawite nehhnak in a tlung lehsal fangin Sodom kumpibawi in Shaven phairawn (kumpibawi phairawn tiin kohnak) an hmuak i.

¹⁸ Ciafangin Salem kumpibawi Melkhizedek inkhai sang le cabitti keng ai Abram hmuak ve i. Melkhizedek tu Hmualnaiber Pathian ai suangbawi khai i ai Abram khiah hmuifu hetihin pe i:

¹⁹ “Thawmlianber Pathian, Lai le van bawntu in, Abram heh hmuifu pe tuseh.

²⁰ Na ralte vumah nehhnak na petu, A Thawmlianber Pathian heh thangphat in um tuseh,” tiin ti i. Cen Abram in ralkut in a longhnak hmuahhmuah songin sawm ah pakhat Melkhizedek pe i.

²¹ Cen Sodom kumpibawi in Abram hnenah, “Na longhnak thilri hmuahhmuah heh nangmah in cotu; ikhalselai minungte tu kaimah i pe leh tu hram,” tiin ngen i.

²² Ikhalselai Abram in, “Lai le van Bawntu Hmualnaiber Pathian hmaiah na banpharh in thukham tu:

²³ Nangmah ai hmuahhmuah; thiampawl le kedawl ri ai panin zaikhai lang tuh lo ing. Ciamanin ‘Abram lianruaitu heh kaimah ing,’ ti thil tuh lo isi.

²⁴ Kaimah ca zaikhai lang tuh lo ing. I minungte in amahte in ai le dingciahnak le i ṭanpuitute ai covo ian lang tuh ing; cen Ener, Eskhol, le Mamre inkhai amahte covo lang tuh ve i,” tiin Sodom kumpibawi hnenah ti i.