Seemthawhnak 12 - Zanniat Bible

Pathian In Abram Ko I

¹ Pathian in Abram hnenah, “Na ram, na miphun le na pa ai inn hlum tulai kaimah ai hmuh tuhhnak ramah feh tu.

² Tefa tampui na pe tuhai miphun lianpui na cang tuh i. Hmuifu na burh tuhai na hmingthangruai tuh ing; ciatihin mihmuifu i tuh isi.

³ Hmuifu na petu heh hmuifu pe thun tuh ing, Ikhalselai cuk na camtu heh cukcam thun tuh ing: Nangmah hmuifu i pe angin, Laivum mi hmuahhmuah in hmuifu i ngen tuh i,” tiin ti i.

⁴ Abram tu kum sawmsarih le kum nga a khim fangin, Bawipa ai ruaihnak bangin, Haran khua an suak i. Lot inkhai hlun ve i.

⁵ Abram tu a nupui Sarai le a nau ai fapa Lot le Haran khua ai a naihnak salte le amahte naih hmuahhmuah thawn Canaan ramah feh tlang i. Canaan ram a hleng hnuaah,

⁶ Abram tu feh betbo ai hmun thianghlim Shechem khua Moreh tihnak hmunai cianghlim thingkung ah hleng i. Cia can ah cia ramah Canaan mite um lai i.

⁷ Bawipa tu Abram hnenah lar ai, “Na tesinfa hnenai i petuhhnak ram khiah he ram i,” tiin ti i. Cen ciata ah Abram in a hnenai a lartu Bawipa ca puleng pakhat tiang i.

⁸ Cia hnuaah Abram tu hlang lamah, Bethel khua an nisuah lam tlang vum ramah thawn ai nitlak lamah Bethel, nisuah lamah Ai khua, cia karlak ah riahbuk sa i. Ciata ahkhai puleng pakhat tiang ai Bawipa bia i.

⁹ Cen hlang lam Negev ram lamah riahbuk pakhat hnua pakhat sa in thawn zianzo i.

Abram Egypt Ram Hleng I

¹⁰ Cia ramah a roh ngai in rian tlung ai rong aih tuh nai lo manin Abram tu Egypt ramah camkhatniu um tuhin feh i.

¹¹ Egypt ramri a hleng banghma fangin a nupui Sarai hnenah, “Nang tu nupang hmel pha isi.

¹² Egypt mite in na hmu fangin Abram nupui i, ti tuhai nangmah co nuam in kaimah lehlam i rek pang tuh i.

¹³ Anite in na zawt lekhaw a farnu ing ti tuh isi. Ciatihin nangmah manin i luat tuhai phatak ngai in i sik tuh i,” tiin ti i.

¹⁴ Egypt ram song a lut fangin Egypt mite in, “Sarai tu mimawi i,” ti tlang panpan ihang.

¹⁵ Bawite inkhai hmu tlang ve ai a mawidan heh amahte kumpibawi hnenah rel ai kumpibawi inn ah fehpui i.

¹⁶ Sarai manin Egypt kumpibawi in Abram heh phatak ngai in tuamhlawm ai tuu le me, kawlpaw le laak le kalaukte a rualrual in sum ai sal tampui khai pe i.

¹⁷ Ikhalselai Sarai tu kumpibawi inn ah a hleng manin Bawipa in kumpibawi le a inn songai ummi zongzong vumah a laukul ngai urhnak hlengruai i.

¹⁸ Ciafangin Pharoah kumpibawi in Abram ko ai, “Zaimanin hetihin i bawn isi, zaimanin i nupui i tiin, fiangniu in i rel lo isi?

¹⁹ Zaimanin i farnu i tiin ti isi? I farnu i tiin na ti manin i nupui tuhin lang ing. Tun rang ngai in na nupui heh lang tulai tlan tu ih,” tiin ti i.

²⁰ Pharoah in a kuthnia mi hnenah thupe ai Abram ciah a nupui Sarai le a naihnak hmuahhmuah thawn Egypt ram an hnawt i.