Ruth 3 - Zanniat Bible

Ruth In Pasal Tawk I

¹ Cen Naomi in Ruth hnenah, “I fanu, inn ce tuhin le nunnuam tuhin na tawlrel sah tuh ing.

² Na lingciahnak bangin, a nupang napertute thawn na naperhnak lo naitu Boaz heh kin songkhat i. Cen ngai tu, ani tu tun zan ah fangcilhnak ah barley fang zap tuh i.

³ Ciamanin takhlu tulai, rimhmui khai mat tulai, na hnikpon pha ber sil tu. Cen fang a zaphnak ah feh tu; ikhalselai a ding a ai hlanah ciata ah na um lam khiah na ling maseh.

⁴ Cen a it fangin a ithmun khiah hnikhnaih tu. A mitmu fangin feh in a ke lam a pon lik tulai a hiangah it tu ve. Cen amah in ziang bawn tuh isi ti na rel tuh i,” tiin ti i.

⁵ Ciafangin Ruth in, “Na relhnak bangin bawn tuh sio ing,” tiin Naomi khiah ti i.

⁶ Ciamanin Ruth tu Boaz ai fangzaphnak hmunah feh ai a ni ruaihnak bangin bawn sio i.

⁷ Cen Boaz tu ai le ding in nunnuam in um ai, barley fang tampui dahhnak ah feh ai it i. A mitmu fangin Ruth khai thawmvang nai loniu in Boaz hnenah feh ai a ke khuhhnak pon a lik hnuaah a hiangniu ah it ve i.

⁸ Zan seulai fangin Boaz khai phawk ai a sirlam a her fangin a ke hiangniu ah nupang pakhat a it hmu ai a ngaihsunur i.

⁹ Ciafangin Boaz in, “Aisu isi?” tiin zawt i. Ruth in, “Na umhlawh nu Ruth ing. Na songkhat ngaingai ing ai i tlantu tuh isi. Na pon hmur niu i thuap tu ve,” tiin Ruth in ti i.

¹⁰ Ciafangin Boaz in, “Ruth, Pathian in hmuifu na pe tuseh. Na ni Naomi hnenai na bawnhnak tahin tunai na bawnhnak khiah songkhat itdunhnak larruai amam isi. Milian ituseh, mifarah ituseh, tlangval deuh pasal tuhin si lo isi.

¹¹ Ciamanin zaikhai lau mah. Nupang pha na ihnak heh khua songmi hmuahhmuah inkhai na ling sio i. Na daihhnak hmuahhmuah na bawt tuh sio ing.

¹² Na songkhat ngaingai i ihnak heh a dik rori i. Ikhalselai kaimah tahin a nong sawn mi, na songkhat tlantu, pasal pakhat um i.

¹³ Tun zan tu heta ah um tulai thangha ah cia na songkhat pa in nangmah ca songkhat ai ṭuanvo lang nuam maw nuam lo hliahruai tuh ing. Lang nuam lekhaw pha i; lang nuam hlah lekhaw a nungmi Pathian hming sal in thu na kham ing: Nangmah ca ṭuanvo heh kaimah in lang tuh ing. Khuavar tian heta ah it tu hlen,” tiin ti i.

¹⁴ Ciamanin zing lam tian a hiangah it i. Ikhalselai a hiangah Ruth it i, ti mi in ling tuh Boaz in daih lo manin Ruth tu khuavar hlanah tho i.

¹⁵ Cen Boaz in, “Na korfualpui hawk tulai heta ah phah tu,” ti i. A tihnak bangin Ruth in a korfualpui hawk ai phah i. Boaz in barley fang han hnih tluk pe ai phurruai i. Cen Ruth tu inn ah tlung i.

¹⁶ Inn a hleng fangin a ni Naomi in, “I fanu, kontih ihang? tiin zawt i. Ciafangin Ruth in Boaz hnenai a hmuhnak le a linghnak hmuahhmuah rel i.

¹⁷ “Ciahlaiah na lolek ai tlung tuh tu cang lo i tiin barley fang hezah i sum i,” tiin Ruth in ti i.

¹⁸ Cen Naomi in, “I fanu, cia thu a hliah hlanah thin nuamniu in um tu. Hemi thu tu tunnia ah Boaz in fiangruai tuh i, um tuh menma lo i,” tiin ti i.