Ruth 2 - Zanniat Bible

Boaz Lo Ah Ruth Feh I

¹ Naomi in a thi zo a pasal lamin songkhat nai ai ciami pa hming tu Boaz i. Boaz tu milian le upat tlak i.

² Ruth in Naomi hnenah, “Lo ah feh tuhai fang attute zamhnak fangka si rih tuh ing. I ninghiotu hnenah feh tuhai si tuh ing,” tiin ti i. Ciafangin Naomi in, “Feh tulai si tu laibang, i fanu,” tiin ti i.

³ Ciamanin Ruth tu lo ah feh ai rong khawmtute khel lamin hlun ai fangka khul betbo i. A fehhnak tu Elimelech songkhat Boaz ai lo i.

⁴ Khua a hnua deuh fangin Bethlehem khua an Boaz hleng i. “Bawipa tu ning hnenah um tu hram seh,” tiin rong khawmtute heh hnuksat i. Cen anite in, “Bawipa in hmuifu na pe tuseh,” tiin sawn tlang i.

⁵ Ciafangin Boaz in rongkhawm hotuber hnenah, “Khia nu tu akon lamai fenu heh i?” tiin zawt i.

⁶ A hnenum pa in, “Naomi in Moab ram an a tlung kawmtu nu i.

⁷ ‘Ninghioniu in rong khawmtute khel lamin hlun tuhai amahte zamhnak fangka si tuh ing,’ tiin i ngen i. Zingniu in tun tian per ai mitua niu ah hlam songah com i,” tiin rel i.

⁸ Ciafangin Boaz in Ruth hnenah, “I fanu, thu na rel tuh ing. Akonah khai feh mah; he lo song lek ah rong si tu. Heta ah um tulai i rong khawmtu nupangte lakah per tu ve.

⁹ Amahte rong khawmhnak sik tulai, fang attu pasalte tu nangmah na hnaihnok tuh loin tiam zo ing. Ti na hal lekhaw pasalte cawiciahnak thawl songai ding tu,” tiin ti i.

¹⁰ Ciafangin Ruth in a hmai laikhun in ut ai Boaz hnenah, “Zaimanin kaimah, miphun dang nupang heh he tlukin ning i hio ai i ruat isi?” ti i.

¹¹ Boaz in, “Na pasal a thi hnua ai panin na ni vumai na bawnhnak hmuahhmuah a veksen in mi in i rel sio i. Na nu le na pa le na suakhmun ram na hlumhnak le na hmu awng lohnak le na ling awng lomi miphun hnenah na kawihnak thu khai za zo sio ing.

¹² Hetihin na bawnhnak manin Bawipa in na rulthun tuseh. A kohlim hniaah himhnak na sihnak Bawipa, Israel Pathian ai lehsawng heh a semkhim in na pe tuseh,” tiin ti i.

¹³ Ciafangin Ruth in, “Ning i hio isi, bawipa. Na hnenum lakai pakhat rin tluk lo napui ingkhaw ponkam pha bik in i pon manin i lung i muang zo i,” tiin sawn i.

¹⁴ Sunsiah ai cu fangin Boaz in Ruth hnenah, “Kawi tulai sang ai tu ve; cabitti songah ciah in ai tu,” tiin ti i. Ciamanin Ruth khai fang attute lakah to ve ai Boaz in nimdentheu pe i. Kham ngai in a ai hnuaah a val khai um lai i.

¹⁵ Cen fangka si tuhin a feh hnuaah Boaz in a napertute khiah, “Fang pup lakah khai fang heh si tuseh, dawn mah ih.

¹⁶ Fangtel songin tlawmniu phok tu ilai a khul tuhin hlup tu hrim ih. A hau khai hau mah ih,” tiin thupe i.

¹⁷ Ciamanin Ruth in lo songah fangka zan lam tian si ai a ngahhnak hmuahhmuah heh a tal ben fangin han khat tha khim i.

¹⁸ A fang phur in inn ah tlung ai a fang khawmhnak heh a ni hnenah hmuh i. Cen a sunsiah val khai a ni hnenah pe i.

¹⁹ Ciafangin Naomi in, “Tunnia a konteng ah fangka si isi? Aisu lo ah per isi? Na ninghiotu pa heh Pathian in hmuifu pe tuseh,” ti i. Cen Ruth in, “Boaz tihnak pa lo ah per ing,” tiin Naomi heh rel i.

²⁰ Ciafangin Naomi in, “A nungmi vumah ituseh, a thi cia mi vum ahkhai ituseh, ninghiohnak a hlengruaitu ṭio Bawipa in Boaz heh hmuifuruai tuseh,” tiin ti i. Cen Ruth hnenah, “Boaz tu kin hinpui, kin songkhat ngaingai ina khaw. Kinmah kin kilkhawltu tuh khai amah i,” tiin ti i.

²¹ Ruth in, “I tuh peu i, ‘Rong khawm kin ben hlanlo i napertute hnenah per tu ṭiode,’ iti hngehnge i,” tiin a ni hnenah rel i.

²² Naomi in Ruth hnenah, “I bang, i fanu; midang lo ah feh lesikhaw zohsuam khai tuar mawh ngasi. Boaz lo ai nupangte hnenah naper heh a pha ber i,” tiin sawn i.

²³ Ciamanin Ruth tu Boaz ai napertute lakah naper per ai barley fang le sangvut a at ben hlanlo fangka si de i. Cen a ni hnenah um hlen i.