Ruth 1 - Zanniat Bible

Elimelech Innsang Moab Ram Hleng

¹ Thukhantute in Israel ram a uk laiah amahte ram songah rian tlung i. Ciamanin Judah ram Bethlehem khua ai a ummi pasal pakhat tu Moab ramah um tuhin a nupui le a fapate pahnih thawn feh tlang i.

² Ciami pa hming tu Elimelech i; a nupui hming tu Naomi i ai a fapate pahnih hming tu Mahlon le Chilion i. Ani tu Ephrath hin i. Moab ramah hleng ai um tlang i. Moab ramah a um laiah,

³ Elimelech tu thi ai Noami heh a fapate pahnih thawn hmaitong in um i.

⁴ A fapate pahnih in Moab fenu hoi kawm i. Pakhat ai hming tu Orpah i ai a dang pakhat hming tu Ruth i. Cen cia ram songah kum hra tluk a um tlang hnuaah,

⁵ Mahlon le Chilion tu thi kawm lala ai Naomi tu pasal lo le fapa loin amah pakhatniu lekin tang i.

Naomi Let Ai Ruth In Hlun I

⁶ Bawipa in a minungte hmuifu pe ai rong tampui nai i ti khiah Moab ram a um laiah Naomi in za i. Ciamanin a mote thawn Moab ram hlum tuhin tum tlang i.

⁷ Cen Judah ramah let tuhin hmunkhat in feh tlang i.

⁸ Ikhalselai lam lakah Naomi in, “Ning inn ah let tu ilai ning nute hnen veve ah tlung kawm tu ih. Kaimah le i thihsan zo mite vumah ning pha bangin Bawipa tu ning vumah pha tu ve seh.

⁹ Cen pasal nai leh in thinnuam in nung thil tuhin Bawipa in hmuifu ning pe tuseh,” tiin anite hnenah ti i. Ciamanin Naomi in cak niu in tlung tu ih, tiin thut kawm i. Ikhalselai a fapate ai nupuite pahnih a rohpui in kap kawm dekdo ai,

¹⁰ “Kin zam lio malaw; na miphunte hnenah na hlun tuh i ing,” tiin ti kawm i.

¹¹ Ciafangin Naomi in, “I lo i, i fanute; let kul rori i si. Zaimanin i hnenah feh ning nuam i? Ning pasal tuhin fapate nai thil tuh nawn ing maw?

¹² Inn ah tlung tuhang ih; pasal nai leh tuhin i tar zo ihang. Cen umlamhnak um lai i, tiin tun zan ah pasal nai in fapate nai khal inglai,

¹³ a patling hlanlo ning pasal tuhin iang ben tuh i sim? Pasal dang nai tuh ning dawntu ah cang tuh sawn lo im? I fanute, a cang thil lo i ti ling hlen i si. Bawipa in mibawngsia ah i bawn ai ning caah lung i sia ze i,” tiin ti i.

¹⁴ Cen anite tu cawm roh in kap kawm thotho i. Cen Orpah in a ni heh cak niu in tiin thut ai a miphunte hnenah let i. Ikhalselai Ruth tu let loin a ni khiah pom meng i.

¹⁵ Ciafangin Naomi in, “Ruth, na pasal unau ai a nupui tu a miphun le a khuavang hnenah let zo i. Nang khai amah thawn inn ah tlung ta tu,” tiin ti i.

¹⁶ Ikhalselai Ruth in, “Nangmah na hlum ai let tuh i ruai mahang. Na hnenah feh tuh ve ing. Na feh hmuncang ah feh tuh ve ing; na umhnak cangah um tuh ve ing. Na miphun heh i miphun cang tuhai na Pathian heh i Pathian cang tuh ve i.

¹⁷ Na thi hmunah thi tuh ve ai ciata ah i phum tu ve seh. Nang le kai tu thihhnak siarlo ziang inkhai kin khan maseh. Thu dang manin khek tuhin lung i khim pang lekhaw Bawipa in cawhhnak a laukul i vumah hlengruai tuseh,” tiin ti i.

¹⁸ Ciatihin feh ve a tum ngio khiah Naomi in a hmu fangin zaikhai pong lo ihang.

¹⁹ Anite pahnih tu feh kawm ai Bethlehem khua ah hleng kawm i. Anite hleng thu za fangin khuasong mite tu a multing lungawi in um tlang murhmo i. Cen a unaute in, “Naomi i aw sim?” tiin zawt tlang lianglo i.

²⁰ Ciafangin Naomi in, “Naomi, tiin i ko mahang ih. Marah, tiin i ko tu sawn ih; zaimantifangin Cungnungber Pathian in lungsiapui tlak in i bawn zo i.

²¹ Heta in i feh laiah nainung le a semkhim in feh awng ing; ikhalselai tunah Bawipa in i letpui leh fangin i kut lolek in hleng leh ing. Hetihin Cungnungber Bawipa in i hnong ai i hnawmcan fangin zaimanin ning in, Naomi, tiin i ko lai i si?” tiin ti i.

²² Ciatihin Naomi tu a fapa ai nupui Moab nu Ruth thawn Moab ram an hleng leh ai barley fang a at sawngniu ah Bethlehem khua ah hleng kawm i.