Rom Pawlpi Hemih Paul Laikuat 8 - Zanniat Bible

Rauhla Songai Nunhnak

¹ Tun tu Khrih Jesuh thawn pawlkommi caah sual thukhanhnak in luat zo i.

² Zaimantifangin Khrih Jesuh thawn pawlkomhnak thawmin nunhnak kin petu Rauhla ai dan in sualhnak le thihhnak dan songin kin luatruai zo i.

³ Minung ihnak heh a ṭawnṭai ze manin dan ai a bawn thil lohnak khiah Pathian in bawn i. Amah a Fapa hlat rori in minung ihnak songai ummi sualhnak khiah hnawl sah i; ciami a Fapa heh sualhnak hnawmruai ta tuhin minung ihnak thawn hleng i.

⁴ Hemi bangin Pathian in a naperhnak tu minung dan thawn nung loin Rauhla daihhnak in a nungmi kinmah songah dan ai ruaihnak a dik le a dikcang mite khimruaihnak tuh hrangah i.

⁵ Minung ihnak ai ruaihnak bangin a nungtute ai thinlung tu minung ihnak ai daihhnak in uk i. Rauhla ruaihnak bangin a nungtute thinlung tu Rauhla ai daihhnak in uk ve i.

⁶ Minung ihnak in ukhnak mite ai tawk tuhhnak tu thihhnak i; Rauhla ai uk mite ai co tuhhnak tu nunhnak le daphnak i.

⁷ Ciamanin mi pakhat minung ihnak ai ukhnak tu Pathian ai ral i. Zaimantifangin Pathian ai dan heh hlun lo i; a hlun hiam lo lek ilo in a hlun ben lo i.

⁸ Minung ihnak ai dan a hluntute in Pathian angruai ben lo i.

⁹ Ikhalselai ning tu ning minung ihnak ai daihhnak bangin nung lo i si; Pathian ai Rauhla tu ning songah um taktak lekhaw Rauhla ai ruaihnak bangin nung sawn i si. Aisu khai Khrih ai Rauhla a nai lotu heh Khrih ai ilo i.

¹⁰ Khrih ning songah nung lekhaw Rauhla heh ning caah nunhnak i; zaimantifangin sualhnak manin ning ruangpui tu thi tuh napui ning tu Pathian thawn remruai zo mi i si.

¹¹ Thihhnak in Jesuh a thoruaitu Pathian ai Rauhla ning songah nung lekhaw thihhnak in Khrih a thoruaitu Pathian in ning songah a Rauhla a umruaihnak thawmin a thi thai ning taksa ruangpum heh nunhnak pe tuh i.

¹² Ciamanin u le naute, minung kin ihnak dan ai daihdan in nung tuhhnak ilo ising.

¹³ Minung ning ihnak dan daihzawng in nung le i sikhaw ning thi tuh i; ikhalselai sualhnak ning bawnhnak tepawl heh Rauhla bawmhnak in rek le i sikhaw ning nung tuh i.

¹⁴ Pathian Rauhla ai konghoi mite tu Pathian ai fate i.

¹⁵ Zaimantifangin Pathian ai ning pehnak rauhla heh sal ah ning bawntu tuh Rauhla ilo ai thinlau ai ning bawntu khai i fawn lo i. Ciami Rauhla in Pathian ai fa ah ning cangruai ai Pathian hnenah, “Abba, I Pa,” tiin kin authilhnak thazang kin petu khai Rauhla i.

¹⁶ Ciatih kin auhnak in Pathian ai Rauhla in kin rauhla pehzom ai Pathian ai fa kin ihnak khiah fiangruai i.

¹⁷ Fa kin imanin Pathian in a minung caah a dahciahnak hmuifu a cotu tuh ising; cen Pathian in Khrih caah a dahciahnak khai Khrih thawn co tlang tuh ising. Zaimantifangin Khrih tuarhnak a tuar ve ilesingkhaw a songlawihnak khai kawmpui tuh ve ising.

Hmai lam Songlawihnak

¹⁸ Tun can ai harsa kin tuarhnak heh kin hnenai a lar tuhlai songlawihnak thawn santeh tlak ah ruat hrimhrim lo ing.

¹⁹ Pathian ai a fate a larruai tuh can khiah semsuahmi hmuahhmuah in umlam tlang ngai i.

²⁰ Zaimantifangin semsuahmi thil hmuahhmuah heh tumtekhnak um loin pairal tuh menma in lairel cia i. Ciami tu amahte ai daihhnak ilo in Pathian ai daihhnak in i. Ikhalselai umlamhnak um lai i.

²¹ Nikhatkhat ah a semsuahmi hmuahhmuah heh ziamral tuh saltanghnak in luatruai tuh sio ai Pathian fate ai cohnak a songlawi luathnak kawmpui leh tuh ve i.

²² Tun can tian semsuahmi hmuahhmuah in naukai ur aihnak bangin ai tlang i ti ling ing.

²³ Semsuahmi lek ilo in Pathian lehsawng hmasaber Rauhla co ai a teptu kinmah khai he kin taksa ruangpui luathnak tuh le Pathian fa canghnak tuh iang in kin pumsa songlam in ai tlang au tlang ve ising.

²⁴ Zaimantifangin umlamhnak in ohnak ising. Kin umlamhnak tu hmu thil lesingkhaw umlamhnak ngaingai ilo i. Aisu in a mit ai hmuthilhnak heh umlam awng ini?

²⁵ Ikhalselai kin hmu awng lohnak umlam lesingkhaw thinsauniu in iang tlang ising.

²⁶ Ciatih bang thotho in kin tu a ṭawnṭai mi kin imanin kin bawm tuhin Rauhla hleng i. Akontih in sawngen tuh ising ti rin kin ling lo laiah, hmurka inrin relsuak thil lohnak aihramhnak thawn Rauhla in kin caah Pathian hnenah kin ngen sah i.

²⁷ Cen kin thinlung hmutu Pathian in Rauhla ai ruathnak heh ziang i ti ling i; zaimantifangin Pathian daihdan in a mihingte caah Rauhla in Pathian hnenah kin ngen sah i.

²⁸ Zaizongza ah Pathian in amah a ittu le amah ai tumtekhnak bangin a komi caah amahte phathnak ah naper i, ti ling ising.

²⁹ Pathian in a ril cia mite tu a Fapa hmuihmel keng tuhin thia cia i; ciatihin unau tampui lakah a Fapa heh upa ber ihnak tuhin i.

³⁰ Ciamanin Pathian ai a thia cia mite tu ko khai ko i. Cen a ko mite tu thiamcoruai ai a songlawihnak khai kawmpui i.

Khrih Songin Pathian Ai Ithnak

³¹ Hemi hmuahhmuah kin ling hnuaah zai rel tuhlai ising? Pathian kin lamah ṭang lekhaw aisu in kin tawng thil tuh i?

³² Kin tawng tu heh Pathian ilo i, a Fapa naihsun rin zuah loin kin veksen caah pe zo i! Amah ai Fapa rori rin pe lekhaw thil dangdang khai a lovang in kin pe tuh lo im?

³³ Pathian ai rilmi a minungte tu aisu in mawhhluk thil tuh ini? Pathian amah in thiamcoruai zo heh in!

³⁴ Aisu in mawh phurh thil tuh ini? Khrih Jesuh in mawh phurh tuh lo i; ani tu amahte caah thi ai thoruai leh hnuaah Pathian kiahhan lamah um ai kin caah Pathian hnenah ngen i.

³⁵ Ciatih ilekhaw aisu in Khrih ai ithnak thawn kin khan thil tuh i? Harsahnak ituseh, tuarhnak ituseh, reemhnak ituseh, rikamhnak ituseh, hnikpon nai lo farahhnak ituseh, lauhnak le thihhnak ituseh, kin khan thil tuh i maw? Khan thil hlah!

³⁶ Lai Thianghlim songah, “Nangmah manin sunnivui rekhnak tawk i ing; Ro tuhin ruathnak tuu bang i ing,” tiin um i.

³⁷ Hemi bang inapui kin ittu ai thawmin he thil hmuahhmuah vumah kin tu nehtu tahin kin uak deuh i.

³⁸ Zaimantifangin amah ai a kin ithnak in zai inkhai kin khan thil tuh lo i, ti khiah fiangniu in kin sanghnak i; thihhnak in ituseh, nunhnak in ituseh, vancung ai a umtu vanmi le uktu le huham naitute in ituseh, tun san in ituseh, hmai lam san in ituseh, thunaitu

³⁹ lailung vumai ummi in ituseh, laihnia ai umhnak in ituseh, semsuahmi thil hmuahhmuah in ituseh, kin khan thil tuh lo i. Kin Bawipa Jesuh Khrih songin kin naihnak Pathian ai ithnak in kin khanthaitu aisu khai um lo i.