Rom Pawlpi Hemih Paul Laikuat 7 - Zanniat Bible

Hoidunhnak In Santehhnak

¹ U le naute, ning tu ning veksen in dan thu lingtu ning imanin tunin ning hnenah i rel tuhhnak heh ning lingciahnak i. Minung tu a nun song ian dan in uk i, ti ling hlen i si, i lo im?

² Santehhnak ah, pasal nai nupang pakhat tu a pasal a nunsong ian dan in uk i; a pasal thi lekhaw hoidunhnak dan in luat i.

³ Ciamanin a pasal a nung lai in pasal dang thawn um kawm lekhaw kangkawm sualhnak a bawntu mi hlotlau i; ikhalselai a pasal thihsan lekhaw midang a paa leh ita inkhai kangkawm hlotlau sualhnak bawntu i nawn lo i.

⁴ U le naute, ningmah ai thula ahkhai ciatih bang thotho i. Dan thu rel lesingkhaw, Khrih ruangpum ai taksasem ning i zo manin a thimi i si. Ikhalselai tunin Pathian caah a thai pha ning thai thil tuhin thihhnak in thoruai leh mi pa ai ihang si.

⁵ Zaimantifangin, kin minung nundan bangin kin nung laiah kin taksa ai sualhiamhnak khiah dan in kin taksa songah merruai ai a thai kin ngahhnak tu thihhnak i.

⁶ Ikhalselai tunin tu dan in kin luat zo i; zaimantifangin sal kin cangruaitu dan hrangah mithi i zo ising. Lai ai nganhnak dan hlun hniaah ilo in Rauhla lampui thar ah Pathian na ruaih tlang ising.

Dan Le Sualhnak

⁷ Ciatih ilekhaw akontih in ti tuh ising? Dan hrimhrim heh sualhnak i, ti tuh ising maw? Ti lamlam hlah! Sualhnak heh sual i ti kin lingruaitu heh dan i. Dan in, “Midang thil ot mah,” i ti ta hlah selai midang thil ot heh zai i ti ling tuh lo ing.

⁸ Ikhalselai sualhnak in cia thukham heh hmang ai i pumsa songah daihhnak le hiamhnak a phunphun suakruai i. Dan um lohnak ah sualhnak khai thi i.

⁹ Kaimah khai he dan tel loin a nung awngtu ing; ikhalselai thukham a hleng fangin sualhnak tu nung ai kai tu i thi i.

¹⁰ Nunhnak petu tuh tihnak thukham heh kai ca ahcen thihhnak i.

¹¹ Sualhnak in can pha ngah ai thukham hmang in i zawl ai i rek i.

¹² Ciatihin dan amah ngaingai tu cianghlim ai thukham khai cianghlim i, a dikmi i ai a pha ze i.

¹³ Ciatih ilekhaw a pha heh kai caah thihhnak lehlam ah cang i, tihnak i awm? I hrimhrim lo i! Thihhnak bawntu ngaingai tu sualhnak i. Sualhnak in sualhnak zia taktak fiang ngai in larruai tuhin phathnak hmang in thihhnak i vumah hlengruai i. Ciamanin thukham ai sualhnak tu tihikkul sualhnak i tiin larruai i.

Minung Songlam Buaihnak

¹⁴ Dan tu rauhla lam thil i ti ling ising; ikhalselai kai tu tisa mi ing ai sualhnak ai sal cang tuhin zuarmi ing.

¹⁵ Thil i bawnhnak heh a sullam ling de lo ing; zaimantifangin i bawn nuamhnak bawn de lo ai i daih lohnak sawn bawn de ing.

¹⁶ Bawn i hiam lohnak bawn de manin dan tu a dik i, tiin lungkhimpui ing ti lar i.

¹⁷ Ciamanin hetih ai a bawntu ngaingai heh kaimah ilo ing; i songai umtu sualhnak sawn i.

¹⁸ Minung i ihnak taktak songah phathnak zaikhai um lo i, ti ling ing. Zaimantifangin thil pha bawn tuh heh i thin songah um khalselai thil pha bawn thil hrimhrim lo ing.

¹⁹ I bawn hiamhnak thil pha bawn loin i bawn hiam lohnak thil hnawm lehlam sawn bawn ing.

²⁰ Bawn i hiam lohnak bawn lengkhaw a sullam tu a bawntu heh kaimah ilo ing ai i songai a nungmi sualhnak sawn i, neh tihnak i.

²¹ Ciamanin i songai thil umdan ling ing; thil pha bawn i hiam fangin i ril ngahhnak tu thil sual ian i.

²² I song muril in Pathian ai dan ah i ang i.

²³ Ikhalselai i taksa songah napertu ve dan dang um i; cia dan tu i thinlung songin thil pha tihnak a tawngtu dan i. Ciami in i taksa songin napertu ve sualhnak ai dan hniaah sal bangin i tangruai i.

²⁴ Mi thinnuam lo ze ing! thihhnak lampui a fehtu he taksa pum in aisu in i o tuh ini?

²⁵ Pathian hnenah thangphathnak um tuseh; Pathian amah in kin Bawipa Jesuh Khrih thawmin i o zo i. Kaimah ihnak dan tu hetih bangin i. Kaimah in i thinlung ian in Pathian dan hlun ing; ikhalselai minung i ihnak taktak in sualhnak dan hlun ing.