Rom Pawlpi Hemih Paul Laikuat 2 - Zanniat Bible

Pathian Ai Thukhanhnak

¹ Ciamanin i rual, aisu bang na ita inkhai midang na sawi fangin misual na i ve khiah pheh thil lo isi. Zaimantifangin midang thu a khantu heh thilsual bawntu bang thotho in misual na imanin mi thu na khanhnak ah nangmah lala misual cangruai dun isi.

² Hemi bang thil sual a bawntute vumah Pathian in amahte thu a khan fangin thil dik bawn i, ti ling ising.

³ Ciamanin i rual, midang in thil sual bawn tlang ai amahte thu na relhnak in nangmah heh anite lala bang isi. Pathian ai thukhanhnak i luat tuh i tiin ruat dun isim?

⁴ Ciahlahle Pathian ninghiohnak le a or thai zia le a thinsauhnak a thawmlian ngaingai heh zaikhai siarlo isim? Pathian ai ninghiohnak tu na sualsir tuhin na hoitu tuhin i, ti khiah fiang ngai in ling isi.

⁵ Ikhalselai nang tu thinlung na hak ai a kho bikraw i; ciamanin Pathian ai thinrawhnak le a dikmi thukhanhnak Nia ah na tawk tuhhnak cawhhnak tu tam tuh amam in nangmah in khawl isi.

⁶ Zaimantifangin Pathian in aisusu khai a bawnhnak bangin a bawnman pe tuh i.

⁷ Mi hrekkhat in thilpha bawn ṭiode ai songlawihnak, hmingphahnak le kumkhua nunhnak khiah si tlang i. Ciamite tu Pathian in kumkhua nunhnak pe tuh i.

⁸ Mi hrekkhat tu mah ca ian ruat ai a pha lo hlun hiam in a pha hnawl tlang i. Ciamite vumah Pathian ai a thinrawhnak tu mailing bangin burh tuh i.

⁹ A pha lo bawntute hmuahhmuah in harsahnak le aihramhnak tuar tlang tuh i; a hmasa a tuartu ah Judah mite i tuhai a hnuata ah Gentile mite i tuh ve i.

¹⁰ Ikhalselai thilpha a bawntu hmuahhmuah hnenah Pathian in songlawihnak, hmingphahnak le daphnak pe tuh i; a hmasa a cotu heh Judah mite i tuhai a hnuata ah Gentile mite i tuh i.

¹¹ Zaimantifangin Pathian in aisusu khai a bangvek in thukhan i. Aisu khai hlaihdan lo i.

¹² Gentile mite in Moses dan nai lo i; anite sual fangin Dan nai loin pai tuh sek i. Judah mite in Moses dan nai i; anite sual fangin dan bangin thukhanhnak tuar tuh i.

¹³ Pathian hmaiah midikcang tihnak mite tu dan songah a umtute amahte bil in a za lek ilo i; dan ai a ruaihnak bawnhnak sawn in i.

¹⁴ Gentile mite tu dan nai lo i; ikhalselai amahte suahkeh lingfimhnak in dan ai thupehnak bangin bawn tlang fangin dan nai khal hlah selai suahkeh lingfimhnak a naihnak heh amahte caah dan i ve i.

¹⁵ Amahte bawnhnak ziaza in dan ai ruaihnak thukham heh amahte thinlung songah ngan in um i, ti larruai i. Ciami heh a dik i ti a hnawm le pha thiathiamhnak in larruai i; zaimantifangin vai khatkhat ah amahte thinlung lala in mawhhluk ai vai khatkhat ah thiamcoruai i.

¹⁶ Ciamanin i phuanghnak Thuthangpha bangin hebang thinlung umdan heh Pathian in minung thupruk ruathnak thu a khan nia ai umdan tuh i.

Judah Mite Le Dan

¹⁷ Ciatih ilekhaw ningmah tang? Judah mi i ing ti dun aw i sim? Moses dan tu rinsan hlinhlen napui Pathian thu ahcen uar dun ngai i si.

¹⁸ Pathian in bawn tuseh ning tihnak tu ling tlang sio ai thil pha ril tuh khai dan songin zir cia zo i si.

¹⁹ Mitcawmi lam hmuhtu i ing ai thimhnak songah a umtute caah tleuhnak i ing, tiin sang tlang ngai i si.

²⁰ Mivoite zirhtu i ing ai zaikhai ling pumpalah lo pawl zirhtu i ing ti i si. Dan songah lingkhimhnak le thudik semkhim ngai in nai i ing tiin sang dun ngai i si.

²¹ Zirhtu sayate, midang tu zirh napui zaimanin ningmah zirh dun lo i si? “Ruko mah,” tiin zirh i si; ningmah tang ru aw i sim?

²² “Kangkawm sualhnak bawn mah,” ti i si; ningmah tang ning sual awm? Milim tu ningdul roh i si; i napui milim biahnak thilri tang ru aw i sim?

²³ Pathian ai dan nai i ing tiin uar dun roh i si, ilekhaw ciami dan bal in Pathian hnenah zakthihnak hlengruai aw i sim?

²⁴ Lai Thianghlim songah, “Ningmah Judah mite manin Gentile mite in Pathian hming thangsiat tlang i,” tiin um i.

²⁵ Dan hlun le i sikhaw ning zarhtanhnak heh man nai i; ikhalselai dan bal le i sikhaw zarhtan awng lo thawn ning bangvek thotho i.

²⁶ Zarhtan lo Gentile mite in dan songai umhnak thukham hlun lekhaw anite zarhtan lohnak khiah zarhtanhnak ah Pathian in ruat sah tuh lo im maw?

²⁷ Ciamanin ningmah Judah mite, zarhtan mite i si ai dan khai ngan cia fekfek in nai napui i sikhaw cia dan ning bal manin taksa in zarhtan lo napui dan a hluntu Gentile mite ai thurel mawhhlukhnak tawk tuh i si.

²⁸ Thungai in ti lesingkhaw, aisu i Judah mi taktak, zarhtantute tu? A pualam ian in Judah mi i ai zarhtan khiah taksa vum lek ah ilekhaw Judah mi taktak ilo i.

²⁹ A songlam sawn in Judah mi, thinlung zarhtantute khiah Judah mi ngaingai i. Ciami heh nganmi dan ai bawnhnak ilo i. Ciabangtluk mihing tu minung hnenin ilo in Pathian hnenin thangphathnak a ngahtu i.