Rom Pawlpi Hemih Paul Laikuat 1 - Zanniat Bible

¹ Khrih Jesuh ai cengfa le a nalang, Pathian in a thuthangpha phuangtu tuhin ril ai a komi kaimah Paul in lai ning kuat ing.

² Lai Thianghlim songah nganhnak bangin cia Thuthangpha heh Pathian in a prophette hnenai a tiamciahnak i.

³ Ciami Thuthangpha heh Amah ai Fapa, kin Bawipa Jesuh Khrih ai thula i: Minung a ihnak lamah ani tu David ai tesinfa songin a suakmi i.

⁴ Pathian a ihnak le a thianghlimhnak lamah tu, thihhnak in thoruai leh manin Pathian ai Fapa a ihnak tu huham thawmlian ngai thawn larruai zo i.

⁵ Khrih caah le amah thawmin mi zongzong in sanghnak nai ai hlun benhnak tuhin Pathian in a nalang ihnak covo i pe i.

⁶ Cia hmuahhmuah songah ningmah Rome khua ai umtute khai Jesuh Khrih ai i tuhin Pathian ai komi ah ning tel tlang ve i.

⁷ Ciamanin Rome khua ai umtu, Pathian ai ithnak mite le a minung i tuhin a komi ning veksen hnenah he laikuat heh ngan ing. Kin Pathian le Bawipa Jesuh khrih ai ninghiohnak le daphnak ning hnenah um tu hram seh.

Anghnak Sawngen

⁸ Laivum pumpuhluk ah ning sanghnak thu a thang manin ning veksen caah Jesuh Khrih thawmin i anghnak thu Pathian hnenah rel hmasa ing.

⁹ Amah fapa ai Thuthangpha heh i thinlung hmuahhmuah in rel ai i ruaihmi Pathian in ciami i relhnak thu heh a dik i, ti i lingpui i. I sawngen cang fangin ning hai lo ing ti khiah Amah Pathian in ling i.

¹⁰ Pathian in remruat lekhaw vel khat tal tu ning tlawng thil tuhin Amah hnenah ngen ṭiode ing.

¹¹ Zaimantifangin ning cakruaitu tuhin Pathian rauhla lam lehsawng ning kawm tuhin i hiam ngai i.

¹² Ciatihin i tifangin i sanghnak in ningmah ai sanghnak thazang cakruai ai ning sanghnak khai i thazang hatruai tuh ve i, i tihnak i.

¹³ U le naute, hemi heh hih tu ngio ih: vel tampui ning tlawng tuhin tum zo ing, ikhalselai tlawnsuak thil tuh loin i dawntu zaimaw um ngiode i. A dang Gentile mi lakah lungthlengtu i nairuai ben bangin, ningmah lakah khai lungthlengtu um tuh heh i hiam ze i.

¹⁴ Zaimantifangin mi zongzong hnenah ṭuanvo laiba nai ing: mifim le mivoi hnenah ituseh, laithiam le zaikhai thiam lo mite hnenah ituseh, laiba nai ing.

¹⁵ Ciamanin Rome khua ai a umtu ningte hnen ahkhai Thuthangpha phuang i hiam ngai i.

Thuthangpha Ai Huham

¹⁶ Thuthangpha heh zakthipui hrimhrim lo ing: zaimantifangin a sangtu hmuahhmuah nun ohnak a ngahhnak tuhin Pathian ai huham i. A hmasa ah Judah mi caah i ai Gentile mi ca ahkhai i ve i.

¹⁷ Kontih bangin i tifangin, Pathian in Amah le minung lakah remhnak zaibang in bawn i, ti larruai i; ciami tu a hampan in a tonghnak tian sanghnak thawmin i. Lai Thianghlim inkhai, “Sanghnak thawmin thiamcoruai mite tu nung tuh i,” ti i.

Minung Sualhnak

¹⁸ Pathian thinrawhnak tu minung sualmawhhnak le phatlohnak hmuahhmuah vumah vancung in lar i; cia minung phatlohnak tu thudik ling thil lohnak tuhin a dawntute i.

¹⁹ Ciamanin Pathian ai cawhhnak tawk tlang i; zaimantifangin Pathian Amah in a fiangruai zo bangin minung in Pathian lingthilhnak tu fiang ngai in lar i.

²⁰ Pathian in he laipua a bawn ai panin hmu thil lohnak a nundan ituseh, kumzangza in a naihnak a huham le Pathian a izia ituseh, fiang ngai in hmuthilhnak i. Pathian ai thil bawnhnak tepawl vumah hmu thil i. Ciamanin aisu inkhai mawhhluk tuh nai lo i.

²¹ Pathian tu ling tlang i, ikhalselai upat hmaison tlak inapui upat hmaisonhnak pe tlang lo i, a vumah anghnak thu khai rel tlang lo i. Amahte ruathnak sawn thulovang in cang sek ai amahte thinlung kualawngpui tu thimhnak in dim i.

²² Kin fim i ti dun napui mivoi i.

²³ Kumzangza nung Pathian bia sawn loin a thi thai minung, vaniu, ramsa le a bok ai vak thai ramsate bangin bawnhnak zukte sawn bia tlang i.

²⁴ Ciamanin ciabang minungte tu amahte thinlung ai hiamhnak thil ningdulkul hurhnakte bawn tuhin Pathian in kham nuam loin hlat i. Cen pakhat le pakhat vumah zakthikul thil khiah bawn dun i.

²⁵ Pathian ai thudik thula heh thudon ah thleng tlang i; Bawntu Pathian bia loin bawnhnak thilri sawn ruaih ai bia tlang i. Bawntu sawn khiah kumzangza in thangphat tuhhnak i. Amen

²⁶ Ciatih bangin bawn manin Pathian in minung tu zakthikul ihnak amahte taksa hiamhnak hlun tuh lawlaw in lon i. Nupang rin in nupang ihnak thil khiah a dan bangin hmang loin cin le dan nai loin nu le nu sualpui dun i.

²⁷ Ciabang thotho in pasalte inkhai nupang thawn pawl dun dan hlum tlang ai amahte taksa hiamhnak manin pa le pa sualpui dun i. Pasal in pakhat le pakhat ningdulkul thil sual bawn tlang manin ciami ai hlawhman heh amahte vumah hleng i.

²⁸ Hemi minungte in Pathian linghnak ngaingai tu amahte thinlung songah umruai nuam lo manin thinlung rimhnak hlun tuh lawlaw in Pathian in lon i. Ciamanin bawn tuh lohnak thilte bawn tlang i.

²⁹ Anite tu hnophnak le phatlohnak a phunphun, pamhaphnak le sualhnak a phunphun in dim tlang i; iksikhnak, mirekhnak, tawngdunhnak, mi zawlhnak le leple hrokhrawlhnak in dim tlang i. Ka tam tlang ai,

³⁰ pakhat le pakhat relsia dun i. Pathian hmuhhehkul in nung i, hngal i, puar i, mah veve porh dun i, phatlohnak bawn tuhin lampui a phunphun si i, nu le pa thu ngai lo i;

³¹ a hnawm le pha thiathiamhnak thinlung nai lo i, amahte thukhamhnak hlun tlang lo ai midang ninghiohnak le ruatsahhnak zaikhai nai lo i.

³² Hemi bangin a nungtute tu thi tlak hrimhrim i, tiin Pathian dan pehnak um i, ti khiah ling tlang hlen i. Ciahlaiah he bangtluk thil sual a bawn lek zolo in midangte in bawn fangin khai lungkhim tlang i.