Nehemiah 9 - Zanniat Bible

Mizapui In Amahte Sualphuang I

¹ Ciami hla ni kul hluanli nia ah Israel mite tu hmunkhat ah taikhawm tlang ai amahte sualsirhnak hmuh tuhin rong ul tlang i; buri pon sil tlang ai a lu vumah laivut phulh tlang i.

² Ramdang mite thawn rawi dun loin tumce in um tlang i. Cen ding tlang ai amahte le a pupate ai sualphuang tlang i.

³ Nazi pathum song Bawipa a Pathian ai Dan siarhnak heh ngai tlang ai ciahnua nazi pathum song amahte sualphuang in Bawipa a Pathian bia tlang i.

⁴ Levi mite caah sardonsang tiang sah ai ciami vumah Jeshua, Bani, Kadmiel, Shebaniah, Bunni, Sherebiah, Bani le Chenani mite ding tlang ai cawm ngai in Bawipa amahte Pathian ai hming ko tlang i.

⁵ Cen Levi mite: Jeshua, Kadmiel, Bani, Hashabnaiah, Sherebiah, Hodiah, Shebaniah le Pathahiah in khawm panhnak ah hetihin sal tlang i: “Ding tu ilai Bawipa ning Pathian thangphat tu ih, Kumzangza in kumzangza tian ani tu thangphat tu ih, A hming songlawi khiah mi zongzong in thangphat tu ih, Minung thangphathnak tu khim lo napui mi zongzong in thangphat tu ih,” ti tlang i. Cen Israel mite tu hetihin sawngen tlang i:

⁶ “Aw Bawipa, nangmah ian Bawipa i si, Van le arsite heh nangmah in bawn isi. Nangmah in lai le tipui le a songai a ummi zongzong nunhnak pe isi, Van ai umhnak hmuahhmuah in nangmah khiah ut in na bia tlang i.

⁷ Bawipa Pathian nangmah in Abram ril isi, Babylon ram Ur khua an ko isi; A hming tu Abraham tiin thleng isi.

⁸ Rinsantlak in hmu manin, amah thawn thukhamhnak bawn isi. Canaan ram pe tuhin thukham isi, Hit mi, Amor mi le Perizz mite Jebus mi le Girgash mite ai ram heh; A tesinfate ca tuhin ti isi. Na thukhamhnak bangin khimruai isi, A dikfelmi na imanin.

⁹ “Egypt ramai kin pupate A tuardan hmu isi, Tipui San ah bawmhnak amahte ngenhnak heh ling isi;

¹⁰ Pharoah engsan in khuaruahhar mangbangkul bawn isi, A kuthnia tlangsuakte le a ram minungte tawngcai in, Na minungte nauneh ze manin. Cialai ah nang in neh ai, tun ahkhai na hmingthang i.

¹¹ Tipui satcat ai na minung ca lampui bawt isi, Lai ro vuman fehpui isi. A dumtute tu tipui thuk songah tlok sek i, Tipui suar lakai lungto tlok bangin.

¹² Sun fangin khuanimpui in fehpui ai, Zan fangin lampui tu maifar in det isi.

¹³ Sinai Mual vumah van in na zuktolh fangin, Ciata ah na minungte hnenah pong isi. Amahte hnenah dan pha le thudik zirhhnak pe isi.

¹⁴ Sabbath nia thianghlimruai tuhin zirh ai, Na cengfa Moses hnenin na dante pe isi.

¹⁵ “Anite rikam fangin van in sang hlak isi, Anite ti a hal fangin lungpui songin din tuhin ti suakruai isi. Anite hleng tuhhnak ram tu khur tuhin rel isi, Anite hnenah pe tuhin na thukhamhnak ram khiah.

¹⁶ “Ikhalselai kin pupate tu hngal ai lungruh tlang i, Na thupehnak hlun nuam tlang lo i.

¹⁷ Na thu hlun nuam tlang lo ai na thil bawnhnak hai tlang sio i; ngaihsunurkul na bawnhnak tepawl tu hih tlang nawn lo i. Hngal ngai in hotu ril tlang i, Egypt saltanghnak ah letpui tuhin. Ikhalselai nang tu mi ngaithiamtu le ngaihhartu Pathian isi, Ninghiohnak le ithnak nai isi, Thinraw hnuakfual thai isi. Na thinpemhnak tu lian ngai i, Zangtak siang lo isi.

¹⁸ Kawlpawcang pian in khuavang lim bawn tlang i, Egypt ram an kin suahtu pathian i ti tlang i; Bawipa, zaitlukin zoh na suam tlang i!

¹⁹ Ikhalselai nelrawn ah zam sek lo isi, Na ninghiohnak a lian manin. Khuanim le mai heh lang sah siang lo isi, Sun le zan in lam hmuhtute tu.

²⁰ Na pha manin amahte bawn tuhhnak rel isi, Manna in cawm isi,

²¹ Kum sawmli song nelrawn ah, a kulhnak hmuahhmuah pe sio isi, Amahte hnikpon her awng lo i, Ke khai ur in por awng lo i.

²² “Ram tampui le miphun tampui nehruai isi, A hiangai ramte khiah. Sihon ukhnak Heshbon ram neh i, Og Kumpibawi a ukhnak Bashan ram khai.

²³ Van arsi zah in tesinfa pe isi, Ram nehruai ai khurruai isi; Amahte pupate hnenah na thukhamhnak khur tuhhnak ram khiah.

²⁴ Canaan ram tu lang i; A umciatute neh sek isi; Na minungte hnenah a nuamhnak bawnthilhnak huham pe isi, Canaan ram kumpibawite le amahte minung vumah khiah.

²⁵ Na minungte in kulhhnak khuapuite lang tlang i, Ram pha le tikhur cociahnak khai, Sumsaw ai a dimmi innte, Olive kung, thingthai kung le cabit vuante thawn. Amahte daihzah in ai manin thau tlang i, Na pehnak thil pha lakah anite nunnuam ngai i.

²⁶ “Cia cing in na minungte tu raltho i, Na thu hlun nuam tlang lo i, Na Dan pehnak heh zangtak tlang i. Na thu zirhtu prophette rek i, Ralringhnak petu le na hnenah let tlang tuhin thureltute heh. Amahte zohsuamhnak heh a roh ze i.

²⁷ Ciamanin amahte ral kut songah hlengruai ai, Anite in uk ai cawh tlang i. Anite vansang fangin na bawmhnak daih in na ko tlang i, Van in amahte auhnak aw ngai sah isi. Na mi ninghiohnak a lian manin, Amahte hnenah hotute hlat isi. Amahte ralte kut songin huptu tuhin.

²⁸ Muanghnak hmu tlang fangin sual tlang lehthio i, Amahte ralte kut songah hlengruai lehthio isi. Ikhalselai sualsir tlang ai nunhnak na ngen tlang fangin, Van in ngai ai, A vel siar cawk loin hup de isi; Na ninghiohnak a tam manin.

²⁹ Na thuzirhhnak hlun tuhin ralringhnak pe isi, Ikhalselai puarthau in na dan heh hnawl tlang i; Na dan hlun heh nunhnak lampui inapui! Lungruh le thulungkhen nai in hlun nuam tlang lo i.

³⁰ Kum khat hnua kum khat thinsau in ralringhnak pe isi, Na prophette in rel tlang betbo napui, Na minungte tu a nangong tlang i. Ciamanin na minungte tu A dang miphunte in uk tlang i.

³¹ Ikhalselai na ninghiohnak a lian manin, Hnawl lo ai siatsuah lo isi; Nang tu ninghiohnak le thinpemhnak naitu Pathian isi!

³² “Aw Pathian, Cungnungber Pathian, kihkul le huhamnai Pathian; Na thukham heh a semkhim liang in khimruai sio isi. Assyria Kumpibawite ai kin cawh ai panin, Tunnia tian kin tuarhnak heh, Thu nauta in kin ruat sah hram malaw. Kin kumpibawite le kin hotute, Kin suangbawite le kin prophette, Kin pupate le kin mizapui ai tuarhnak, Hetluk kin tuarhnak heh kin ling sah tu belbo law.

³³ Kin cawh de heh na dik i, cawh tlak i ing; Nang tu rinsantlak isi, kin tu kin sual i,

³⁴ Kin pupa le kin kumpibawite ai panin, Kin hotute le kin suangbawite khai Na Dan heh hlun tlang lo i. Na thupehnak le ralringruaihnak tu, Ngai nuam tlang hrimhrim lo i.

³⁵ Na hmuifu pehnak thawmin Kumpibawi in na minungte uk i. Na pehnak ram kau le ram pha song a um tlang laiah cenin. Ikhalselai sualhnak songin let tlang lo ai Nang na ruaih tlang lo i.

³⁶ Tun tu na pehnak ram songah sal ah kin cang tlang i, Aihdin tuh kin petu hemi rampha songah cenin.

³⁷ Kin ram songai a suakhnak hmuahhmuah heh, Kumpibawi hnenah feh sio i; Kin sualhnak manin kin vumai na dahhnak bawite hnenah. Kinmah ituseh, kin sumhnamte ituseh, a nuamnuam in bawn tlang i. Van kin sang ze i,” tiin ti tlang i.

Lungkhimhnak Lai Ngan Tlang I

³⁸ Kin vumah thil canghnak manin, kinmah Israel mite in tunah lai ngan in lungkhimhnak laikhen bawn tlang ai kin hotute, kin Levi mite le kin suangbawite in a vumah hmingkhen tlang i.