Nehemiah 13 - Zanniat Bible

Ramdang Mite Thawn Khekhnak

¹ Ciafangin Moses Dan heh cawm ngai in mizapui hnenah siar ai a siarhnak tluan khat ah, Ammon mi le Moab mite tu zaikom inkhai Pathian ai minungte lakah tel tlang tuh lo i, tihnak hmu tlang i.

² Zaiman ciatihin um i tifangin, Israel mite Egypt ram an a suak tlang laiah Ammon mi le Moab mite in aih le din, ti le rong ning pe lo manin i. Aih le din ti le rong ning pe lo lek zolo in, Israel mite cukcam tuhin Balaam hnen lamlam ah paisa pe tlang awng i; ikhalselai ciami cukcamhnak tu kin Pathian in hmuifu cohnak sawn anite caah cangruai i.

³ Israel mizapui in ciami Dan siarhnak a za fangin amahte songin ramdang mite tu hnawt tlang sek i.

Nehemiah Ai A Remmhnakte

⁴ Biakinn thilri dahhnak khante a uktu suangbawi Eliashib le Tobiah tu can raipui rualrem ngai in um kawm awng i.

⁵ Ciamanin Tobiah tu a khan kaupui pakhat ah umruai i; ciami khan tu hibawlhnak hrangah selhnak sangvut le rimhmui; Biakinn ai dahhnak thilri; suangbawite caah hibawlhnakte; Levi mite hnenah pehnak thawhhlawm, sawm ah pakhat, le cabit le olive thaute, biakinn lasatu le biakinn kiltute caah a pehnak hmuahhmuah dahhnak tuh tihnak i.

⁶ Cialak ah Jerusalem khua ah um lo ing; Artaxerxes in Babylon kumpibawi a canghnak kum sawmthum le kum hnih kum ah amah tawk tuhin le thula than tuhin feh ing. Tlawmniu a rai hnuaah amah ai lungkhimhnak in,

⁷ Jerusalem khua ah tlung lehsal ing. Cen Biakinn thilri dahhnak khan pakhat Eliashib in Tobiah hmangruai i ti khiah i hmu fangin thin i raw i.

⁸ I thinraw in Tobiah ai thilri hmuahhmuah heh lon sio ing.

⁹ Cen thilri dahhnak khante tu cianghlim hibawlhnak bawn tuhin le a songah Biakinn thilri, hibawlhnak sangvut le rimhmuite dah tuhin thupe ing.

¹⁰ Ciahlaiah Levi mite le Biakinn lasatute tu mizapui in rong aih kham pe ben tlang lo manin Jerusalem an suak ai amahte lo ṭen ah tlung tlang sek i ti ling ing.

¹¹ Ciafangin hotu bawite khiah, “Zaimanin Bawipa Biakinn tu zulhzau in khingruai tlang i si?” tiin mawhhluk ing. Levi mi le lasatute tu ko leh ai amahte naper perruai leh ing.

¹² Cen Israel mite in a thawhhlawm rong, cabitti le olive thaute heh biakinn thilri dahhnak khan ah dah leh ing.

¹³ A hnia lamai mite tu thilri dahhnak khan kiltu tuhin dah ing: suangbawi Shelemiah, Dan thiam Zadok le Levi mi Pedaiah. Zakkur ai fapa le Mattaniah ai tupa Hanan tu anite bawmtu ah dah ing. Hemite tu napertu dang a unaute hnenah ti le rong phaniu in zem tlang tuh i, tiin i rinsanhnak mite i.

¹⁴ Aw i Pathian, nangmah biahnak le na biakinn hrangah he thil i bawnhnak hmuahhmuah heh hai hram malaw.

¹⁵ Cialai Judah mite in Sabbath nia ah cabit thai rial tlang thliahthlo khiah hmu ing. Midang inkhai amahte sangvut, cabitti le cabit thai, thaihmin, le a dang thilte khai laakte vumah toh in Jerusalem ah phur betbo khiah hmu ing. Sabbath nia ahcen zaikhai zuar tlang tuh loin thupe ing.

¹⁶ Tyre khuami Jerusalem ah a umtute in Sabbath nia ah i minungte hnenah zuar tuhin nga le thildang a phunphun phur tlang i.

¹⁷ Judah mi hotute khiah hau ai, “Thil siava ning bawnhnak heh sik tu ih! Sabbath nia ningrimtiar i si.

¹⁸ Hemi bang heh ning pupate in bawn tlang awng manin nakhaw Pathian ai cawhhnak tuar tlang awng ai hemi khuapui khai siatsuah tuar awng sio heh! Ciacingin Sabbath nia tu ningrimtiar ai Israel vumah Pathian thinrawhnak hlengruai amam i si,” tiin mawhhluk awng ing.

¹⁹ Ciamanin zan lam can hleng ai Sabbath nia a pan cang fangin khua kotkate heh kham tuhin le ciami Sabbath nia a bo hlanlo kotkate hong tuh loin thupe ing. Sabbath nia ahcen khuasong ah thilri zaikhai lutruai tuh loin i minungte hrekkhat heh kotkate kilruai fawn ing.

²⁰ Vel khat vel hnih tu dawrbawntu thil a phunphun a zuartute heh khuapui vingpui pualam ah tlawngkai ni nga zankhuavar in cam tlang de i.

²¹ Ciamite hnenah, “Thangha tian iang nuam mah ih, ning in iang lak tuh menma i si, cen zuar tum tlang thotho le i sikhaw roh ngai in ning ti tuh ing,” tiin ralringhnak pe ing. Ciahnua tu Sabbath nia ah kawi ngam tlang nawn lo i.

²² Cen Levi mite tu amahte cianghlimhnak bawn tuhin le Sabbath nia thianghlim in ul tuhin kotka heh phatak niu in kil tu ih tiin thupe ing. Aw i Pathian, he thil i bawnhnak hmuahhmuah heh hai hram malai na ithnak a lian bangin na ninghiohnak heh i hnenah hlengruai tu hram law.

²³ Cialai ahcen Judah mi pasal tampui in miphun dang nupang Ashdod mi, Ammon mi le Moab mite hoi tlang i, ti ling ing.

²⁴ A naihnak a fate hrekkhat tu Ashdod pon le pon dangdang in pong ai kin pong thiam tlang nawn lo i.

²⁵ Ciami pasalte heh kaimah in hau ai cukcam dekdo ing. Vit ai amahte sam khai phai sah ing. Cen anite ituseh, a fate ituseh, a dang miphunte ai fanu hoi tuh nawn loin le a fapate pasal in nai tuh nawn loin Pathian hming sal in cukcam thukhamhnak bawnruai ing.

²⁶ Anite hnenah, “Kumpibawi Solomon sualruaitu heh ramdang nupangte i. Ani tu miphun dang kumpibawi hmuahhmuah tahin lian sawn i. Pathian in ani tu it ai Israel mite veksen vumah Kumpibawi in bawn i. Ikhalselai ciami sualhnak songah tlok i.

²⁷ Ciatihin maw nuncan ziaza pha lo heh hlun in miphun dang nupangte hoi tuhai ning Pathian ai thupehnak hlun loin um tuh ve ising im?” tiin ti ing.

²⁸ Suangbawi Sang Eliashib ai fapa tu Joiada i. Ikhalselai Joiada ai fapa pakhat in Beth Horon khuami Sanballat ai fanu hoi i. Ciamanin amah Joiada heh Jerusalem an hnawt teu ing.

²⁹ Aw i Pathian, hemite in suangbawi na ruaih le, suangbawi le Levi mite thawn thutiam na bawnhnak amahte bal zia heh hih tu ngio law.

³⁰ Cen mizapui tu amahte lakah ramdang mite ai zaikhai um tuh hrimhrim loin cianghlimhnak bawnruai sio ing. Suangbawi le Levi mite in amahte naṭuan lingfel tuhin dante bawn sah ing.

³¹ Can thiahhnak a khim fangin hibawlhnakte taihnak tuhin zanthing, rongthar le thingthai thar hibawlhnak hrangah sel tuhhnakte khai ruat sah ing. Aw i Pathian, hemi heh a pha lamin i hih tu hram law.