Nehemiah 12 - Zanniat Bible

Suangbawi Le Levi Mite

¹ Babylon saltanghnak in Shealtiel ai fapa Jerubbabel le Suangbawi Sang Joshua thawn a lettu suangbawi le Levi mite tu a hnia lamai bangin i:

^2-7 Suangbawite: Seraiah, Jeremiah, Ezra, Amariah, Malluk, Hattush, Shekaniah, Rehum, Meremoth, Iddo, Ginnethoi, Abijah, Mijamin, Maadiah, Bilgah, Shemaiah, Joiarib, Jedaiah, Sallu, Amok, Hilkiah, Jedaiah. Hemite Joshua san in a unau suangbawite lakah hotute i.

⁸ Levi mite: Anghnak la sa tlang fangin a hnia lam aite tu la hoitute i: Jeshua, Binnui, Kadmiel, Sherebiah, Judah le Mattaniah i.

⁹ Babukiah le Unno le amahte unau Levi mite thawn larem sawnduntute i.

Suangbawi Sang Joshua Ai Tesinfate

¹⁰ Joshua tu Joiakim ai pa i; Joiakim tu Eliashib ai pa i; Eliashib tu Joiada ai pa i.

¹¹ Joiada tu Jonathan ai pa i; Jonathan tu Jaddua ai pa i.

Suangbawi Hin Ai Hotute

^12-21 Suangbawi Sang Joiakim san ah a hnia lam aite tu suangbawi hin ai hotute i: Seraiah hin ah Meraiah, Jeremiah hin ah Hananiah, Ezra hin ah Meshullam, Amariah hin ah Jehohanan, Mallukhi hin ah Jonathan, Shebaniah hin ah Joseph, Harim hin ah Adna, Meraioth hin ah Helkai, Iddo hin ah Zechariah, Ginnethin hin ah Meshullam, Abijah hin ah Zichri, Miniamin hin in Moadiah hin ah Piltai, Bilgah hin ah Shammua, Shemaiah hin ah Jehonathan, Joiarib hin ah Mattenai, Jedaiah hin ah Uzzi, Sallai hin ah Kallai, Amok hin ah Eber, Hilkiah hin ah Hashabiah, Jedaiah hin ah Nethanel.

Suangbawi le Levi Mi Innsangte

²² Suangbawi Sang pawl Eliashib, Joiada, Johanan le Juddua san ah Levi mi innsangte le suangbawi innsangte hotu cazin laibu tu pha bik in dah i. Ciami laibu tu Darius in Persia Kumpimangbawi a cang laiah amahte bawn awnghnak i.

²³ Levi mite innsang hotute ai cazin laibu tu Eliashib ai tupa Johanan san tian kumpibawi thu hnikhnaihhnak laibu songah khum tlang i.

Biakinn Naperte Zemhnak

²⁴ Levi mite tu Hashabiah, Sherebiah, Jeshua, Binnui le Kadmiel hohnak in bu tampui in khan tlang i. Pathian ai minung, kumpibawi David ai thuhluphnak bangin nawk khat ah bu hnih bu hnih in a sawn dun in Pathian thangphat tlang ai Pathian hnenah anghnak rel i.

²⁵ Biakinn kotkate hiangai thilri dahhnak inn kiltute heh a hnia lamai bangin i: Mattaniah, Bakbukiah, Obadiah, Meshullam, Talmon le Akkub.

²⁶ Hemite tu Joshua ai fapa le Jehozadak ai tupa Joiakim san le ram uk Mangki bawi Nehemiah san le Dan thiam le suangbawi Ezra san ai umhnak i.

Khuapui Vingkulh Tu Pathian Hnenah Ap Tlang I

²⁷ Jerusalem khuapui vingkulh tu Pathian hnenah ap tlang fangin dartumcel, congcing le tingriset tum in mi zongzong in anghnak la sa tlang ai lungawi aipuang in puai ah tel thil tuh ṭen in Levi mite tu amahte umhnak cangah ko tlang sio i.

²⁸ Levi mi larem satute tu amahte umhnak hmun an le Jerusalem hiang Netophah hiang khuate,

²⁹ Beth Gilgal, Geba le Azmaveth khuate in suak khawm tlang i.

³⁰ Suangbawi le Levi mite in anite cianghlim hibawlhnak le mizapui ca hibawlhnak, kotkate le khuapui vingkulh cianghlim hibawlhnak tu pe tlang i.

³¹ Cen Judah mi hotu upate tu vingkulh vumah kairuai ai Pathian hnenah anghnak thurel kongin khuapui heltu tuhin bur lian puipui bur hnih in khan i. Bur khat tu vingpui vumah kiahhan lamin Hnawmborh Kotka lamah feh tlang i.

³² Lasatute ai khel lamin Hoshaiah feh ai ani tu Judah mi hotu a hrek in hlun tlang i.

^33-35 Ciami hnuaah a hnia lamai suangbawite in thirhlung tum kongin hlun tlang i. Hmasaber ah Azariah, Ezra, Meshullam, Judah, Benjamin, Shemaiah le Jeremiah i. A sontu ah Jonathan ai fapa le Shemaiah ai tupa Zechariah i. (A pupate tu Mattaniah, Milkaiah le Zakkur i ai Asaph hin i).

³⁶ Zechariah tu a hinpui unaute: Shemaiah, Azarel, Milalai, Gilalai, Maai, Nathanael, Judah le Hanani tepawl in hlun tlang ai amahte veksen in Pathian ai minung Kumpibawi David ai tum awnghnak awmawi bang awh tlang ṭen i. Hemite feh tlang fangin Dan thiam Ezra in hmaihoi i.

³⁷ Cirhti kotka hleng fangin David khuapui fehhnak kaipum kai tlang ai David Kumpibawi inn kan tlang hnuaah khuapui nisuah lam Ti Kotka ai vingpui ah hleng tlang leh i.

³⁸ Anghnak thurel bur dang pakhat tu vingpui vumah kekeh lamin feh tlang ai kaimah le mi hrekkhat in hlun tlang i ing. Feh tlang ai Maikhu suakhnak inn sangpui tihnak kan tlang ai Ving kaupui tihnak hleng tlang i ing.

³⁹ Ciata in Epharaim kotka, Jashanah kotka, Nga kotka, Hananel sardonsang le Zakhat sardonsang kan tlang ai Tuu kotka kin hleng hnuaah Ralvil kotka ah tawpruai i ing.

⁴⁰ Ciatihin amahte bur hnih in Pathian thangphat kongin Biakinn hiang hleng tlang i. I hnenah a fehtu hotute zolo in,

⁴¹ thirhlung tum kongin suangbawite Eliakim, Maasaiah, Miniamin, Mikaiah, Elioenai, Zechariah le Hananiah tel tlang i.

⁴² Cen lasatute ah Jezrahiah ho in Maasaiah, Shemaiah, Eleazar, Uzzi, Jehohanan, Malchijah, Elam le Ezer tel tlang ai amahte aw naihtawp in la sa tlang i.

⁴³ Ciami nia ah hibawlhnak tampui sel tlang ai anghnak thawn dim tlang i, zaimantifangin Pathian in ang roh in bawn i. Ciami anghnak puai ah nupang le naupangte khai tel tlang ai a thawmvang tu a hlapui tianin thang i.

Biakinn Ai Amahte Pehnak

⁴⁴ Cialai ah a rong hmasaber a cuhnak le thingthai kum siar in a hmasaber pawl le thawhhlawm, sawm ah pakhat le a dangdang Biakinn hrang ai a pehnakte dahhnak innte kiltu tuhin mi dah i. Hemi a dahhnak tepawl in thilri dahhnak in kil tlang ai hlaiah, Dan songai a umhnak bangin suangbawite le Levi mite ca ai amahte pehnakte tu khuapui hiangai umhnak lo songin khawm tlang i. Judah mi zongzong suangbawi le Levi mite vumah ang ngai i.

⁴⁵ Zaimantifangin Pathian ai thupeciahnak bangin thil bawn tlang ai fel ngai in cianghlim hibawlhnak khai bawn tlang i. Cen Biakinn lasatute le Biakinn kiltute inkhai kumpibawi David le a fapa Solomon ai thupeciahnak bangin, amahte naper heh fel ngai in per tlang i.

⁴⁶ Hlanlai ai kumpibawi David le la thiam Asaph san lai in lasatute tu thangphathnak la sa fangin le Pathian hnenah anghnak thurel tlang fangin mi hotu ṭiode i.

⁴⁷ Zerubbabel san le Nehemiah san ahkhai Biakinn lasatute le biakinn kiltute pumcawmhnak hrangah Israel mite in nisiar in thawhhlawm pe tlang ṭen i. Mizapui in hibawlhnak cianghlim heh Levi mite hnenah pe tlang ai Levi mite in amahte petuhhnak zah heh Aaron ai tesinfa suangbawite caah pe tlang ve i.