Nehemiah 11 - Zanniat Bible

Jerusalem Ai A Umtute

¹ Hotute tu Jerusalem khuapui ah um tlang i; mizapui songin innsang pahra songah pakhat tu Jerusalem ah um tuhin camciafung duk tlang ai, a dang hmuahhmuah khuadang le khuatenau songah um tlang i.

² Jerusalem khua songah kaimah um tuh ing tiin lungkhim niu in a ti bentute tu mizapui in thangphat ngai i.

³ Israel mizapui, suangbawite, Levi mite, Biakinn satute le Solomon hnenumte ai tesinfate tu khua dang le khuatenau song amahte lairam ṭen ah um tlang i. Judah peng songin Jerusalem ai a umtu upa hmingthang deuh pawl tu a hnia lamai bangin i:

⁴ Judah hin songin Jerusalem ah a umtute: Uzziah ai fapa Zechariah ai tupa Athaiah, A dang pupate tu Amariah, Shephatiah le Mahalalel i ai Judah ai fapa Perez ai tesinfate i.

⁵ Baruch ai fapa le Kolhozeh ai tupa Maasaiah. A dang pupate tu Hazaiah, Adaiah, Joiarib le Zechariah i ai Judah ai fapa Shalah ai tesinfate i.

⁶ Perez ai tesinfa songin mi hmingthang za li sawmruk le pariat Jerusalem ah um tlang i.

⁷ Benjamin hin songin Jerusalem ai a umtute: Meshullam ai fapa le Joed ai tupa Sallu. A dang pupate tu Pedaiah, Kolaiah, Maasaiah, Ithiel le Jeshaiah i.

⁸ Sallu ai songkhat Gabbai le Sallai. A veksen in Benjamin innsang in za kua le kul hluanriat Jerusalem ah um tlang i.

⁹ Zikhri ai fapa Joel tu anite hotu i ai Hassanuah ai fapa Judah tu Jerusalem khua songai bawi upa ber sontu i.

¹⁰ Jerusalem ai a umtu suangbawite: Joiarib ai fapa Jedaiah le Jachin.

¹¹ Hilkiah ai fapa le Meshullam ai tupa Seraiah. A dang pupate tu Zadok, Meraioth le Suangbawi Sang Ahitub i. Ahitub tu Biakinn siktu upa i.

¹² A veksen in amahte hin songin za riat le kul hluanhnih tu Biakinn ai naruaihtu i. Jeroham ai fapa Peleliah ai tupa Adaiah. A dang pupate tu Amzi, Zechariah, Pashhur le Malchijah i.

¹³ A veksen in anite hin songah zahnih sawmli le pahnih tu innsang hotute i. Azarel ai fapa le Ahzai ai tupa Amashsai. A pupate tu Meshillemoth le Immer i.

¹⁴ Anite hin songin za le kul hluanriat tu ralkap hmingthang ngaingai pawl i. Amahte hin songin upa Zabdiel tu hotu i ai Haggedolim ai fapa i.

¹⁵ Jerusalem ai a umtu Levi mite: Hasshub ai fapa le Arzikam ai tupa Shemaiah. A dang pupate tu Hashabiah le Bunni i.

¹⁶ Biakinn pualam ah naper naitu Levi mi hmingthang Shabbethai le Jozabad.

¹⁷ Mica ai fapa le Asaph tesinfa Zabdi ai fapa sin Mathaniah; anghnak sawngen la a sa tlang fangin Mattaniah tu la hoitu i. Mattaniah bawmtu Bakbukiah. Shammua ai fapa le Jeduthun tesinfa Galal ai fapa sin Abda.

¹⁸ Jerusalem khua thianghlim songah Levi mite amahte veksen in zahnih sawmriat le pali um tlang i.

¹⁹ Biakinn kiltu Jerusalem ah a umtute: Akkub, Talmon, le a songkhatte za le sawmsarih le pahnih.

²⁰ A dang Israel mite, suangbawi le a dang Levi mite tu Judah ramsong khuapui le khuatenau songai amahte lairam ṭen ah um tlang i.

²¹ Biakinn tuamhlawmtute tu Jerusalem khua Ophel bialkhan ah um tlang ai a hotu tu Ziha le Gishpa i.

²² Jerusalem ai a umtu Levi mite hotu tu Bani ai fapa le Hashabiah ai tupa Uzzi i. A dang pupate tu Maattaniah le Mica i ai Asaph hin i. Asaph hinte tu Biakinn ah khawm fangin lasatute i.

²³ Hin khat hnua hin khat nisiar in Biakinn lasatu tu a sonson niu in sawng dun tuhin Kumpibawi ai thupeciahnak um i.

²⁴ Judah phun, Zerah hin, Meshezabel ai fapa Pethahiah tu Persia Kumpimangbawi zung ah Israel mite ai palai i.

Khua Dangdang Ai Umtute

²⁵ Minung tampui tu amahte lovaihnak hiangai khua ah um tlang i. Judah hinte tu Kiriath Arba khua, Dibon le Jekabzeel khua le a hiangai khuatenaute ah um tlang i.

²⁶ Cen Jeshua khua, Moladah khua, Bethpelet khua le

²⁷ Hazarshual khuate ahkhai um tlang ai Beersheba khua le a hiang khuate ahkhai um tlang i.

²⁸ Ziklag khua, Meconah khua le a hiang khuatenau ah um tlang i.

²⁹ Enrimmon khua, Zorah khua, Jarmuth khua,

³⁰ Zanoah khua, Adullam khua le a hiangai khuatenau ah um tlang i. Lakhish khua le a hiangai a vai lohnak ah le, Azekah le a hiangai khuate ah um tlang i. Ciatihin Judah mite tu hlang lam Beersheba in sak lam Jerusalem khua hiang Hinnom phairawn tian, khuacang ah um tlang i.

³¹ Cen Benjamin hinte tu Geba khua, Mikmash khua, Ai khua, Bethel khua le a hiang khuatenaute ah le,

³² Anathoth khua, Nob khua, Ananiah khua,

³³ Hazor khua, Ramah khua, Gittaim khua,

³⁴ Hadid khua, Zaboiim khua, Neballat khua,

³⁵ Lod khua, Ono khua le Zungthiam phairawn ah um tlang i.

³⁶ Judah ram songah a um awngtu Levi mite hrekkhat tu Benjamin mite thawn hmunkhat ah umruai i.