Mipun Siarnak 3 - Zanniat Bible

Aaron Ai Fapate

¹ Bawipa in Moses hnenai Sinai Mual vumah thu a pe fangin Aaron le Moses tefate tu a hnia lamai bangin i.

² Aaron in fapate pali nai i; a upa ber tu Nadab i ai a dangte tu Abihu, Eleazar le Ithamar i.

³ Amahte tu suangbawi tuhin thaupawhhnak le kutsuanhnak ngahtute i.

⁴ Ikhalselai Nadab le Abihu tu Sinai nelrawn ah Bawipa hnenai a thianghlim lomi maitai hibawlhnak sel kawm manin amahte pahnih in rekhnak tuar kawm i. Fa pakhat khai nai kawm lo i; ciamanin a pa Aaron nunsong hmuahhmuah Eleazar le Ithamar in suangbawi na ruaih kawm i.

Levi Mite Tu Ruaihtu Suangbawi Tuhin Ril I

⁵ Bawipa in Moses hnenah,

⁶ “Levi mite tu suangbawi Aaron hnenah um tuhin le ruaihtu tuhin koih tu.

⁷ I umhnak Ponhlam hrang ai a kulhnak, Israel mizapui le amah suangbawite caah a kulhnak ruaih tlang tuseh.

⁸ Ponhlam songai a umhnak thilrite kilkhawl tu selai Israel mite caah biahnak napertu cang tuseh.

⁹ Israel mite songin Levi mite tu Aaron le fapate tu ruaihtute tuhin pehnak i tuh i.

¹⁰ Ikhalselai suangbawi ṭuantu tuhin tu Aaron le a fapate lek tuh i. Aisu khai ituseh ciami a tumtu in rekhnak tuar tuseh,” tiin ti i.

¹¹ Bawipa in Moses hnenah,

¹² “Tunai panin Israel mite ai fapa upa ber hmuahhmuah caah Levi mite tu kaimah in lang tuhai kaimah ai cang tuh ihang.

¹³ Zaimantifangin Egypt ramah Egypt mite ai fapa upa ber i rek berh fangin Israel mite ai fapa upa ber hmuahhmuah le sumhnamte ai fa upa ber hmuahhmuah heh cianghlimruai ai kaimah ca i hamhnak i. Tun tu Israel mite ai fapa upa ber caah Levi mite lang ing. Kai tu Bawipa ing,” tiin ti i.

Levi Mite Hmingkhum I

¹⁴ Sinai nelrawn ah Bawipa in Moses hnenah,

¹⁵ “Levi mite tu amahte hin ṭen in le innsang ṭen in hla khat le a vum lam pasal hmuahhmuah mipum siar tu,” tiin thupe i.

¹⁶ Bawipa ai thupeciahnak bangin Moses in bawn i.

¹⁷ Levi in fapate pathum nai i: Gershon, Kohath le Merari i ai anite tu amahte hin ṭen ah sentu imanin anite hming heh amahte hin hming ah cang i.

¹⁸ Gershon in fapate pahnih nai ai Libni le Shemai i.

¹⁹ Kohath in fapate pali nai ai Amram, Izhar, Hebron le Uzziel i.

²⁰ Merari in fapate pahnih nai ai Mahli le Mushi i. Anite tu sentute i ai amahte hming tu amahte hin hming ṭen ah cang tlang i.

²¹ Gershon nam ah hinte pahnih um ai Libni le Shemai i.

²² Pasal hla khat khim le a vum lam hmuahhmuah mipum siar fangin amahte veksen in thawng sarih le za nga um i.

²³ Hemi hinte tu nitlak lam, Ponhlam hnua lamah riahbuk zar tlang tu selai,

²⁴ Lael ai fapa Eliasaph tu amahte miuk i.

²⁵ Ponhlam kilkhawl tuhin a pualam khuh ituseh a songlam khuh ituseh, Ponhlam luthnak ponzar,

²⁶ Ponhlam le puleng kimvel ai a ummi a kulhhnak ponzarte le a kulhhnak dawngkhamte ponzar a kiltu tuh i. Hemi thilrite hrang a kulhnak hmuahhmuah bawn tuh i.

²⁷ Kohath nam ah hinte pali um i. Amram hin, Izhar hin, Hebron hin, Uzziel i.

²⁸ Hlakhat le a vum lam pasal hmuahhmuah mipum siar ai amahte veksen in thawng riat le zaruk um i.

²⁹ Hemi hinte tu Ponhlam ai hlang lamah riahbuk sa tuhai,

³⁰ Uzziel ai fapa Elizaphan heh amahte miuk i.

³¹ Anite tu Thutiam Kuang, cabuai, maivarhnak khuam, pulengte, Hmun Thianghlim ai suangbawite ai hmanghnak bel le hlengte le Hmun Thianghlim Ber dawngkham ponzarte kilkhawl ai he thilrite thawn peh dun in bawn a kulhnak hmuahhmuah a bawntu tuh i.

³² Levi mite miuk tu suangbawi Aaron ai fapa Eleazar i. Amah khiah Hmun Thianghlim ai napertute hotu i.

³³ Merari nam ah hinte pahnih um i. Mahli hin le Mushi hin i.

³⁴ Hlakhat le a vum lam pasal hmuahhmuah mipum siar ai amahte veksen in thawng ruk le zahnih um i.

³⁵ Amahte miuk heh Abihail ai fapa Zuriel i. Hemi hinte tu ponhlam ai sak lamah riahbuk zar tlang i.

³⁶ Anite tu Ponhlam sahnak thingte, bangphaite, a khuamte, a kedote, le inn ningte ai pehhnak kilkhawl ai he thilrite hrang ai a kulhnak hmuahhmuah bawn tuh i.

³⁷ Ciahlaiah a pualam kulhhnak khuamte, a kedote, ri khihhnak khemte, le rihualte khai kilkhawl tuh i.

³⁸ Moses le Aaron le a fapate tu Ponhlam ai nisuah lamah riahbuk zar tuseh. Israel mite ca Hmun Thianghlim ai bawn tuhhnak hmuahhmuah anite in bawn tlang tuh i. Ciami heh midang pakhat in tum lekhaw rek tuar tuseh.

³⁹ Levi mite, hlakhat le a vum lam pasal hmuahhmuah heh Bawipa ai thupeciahnak bangin Moses in a hin ṭen in mipum a siar fangin amahte veksen in thawng kul hluanhnih um i.

Levi Mite In Fapa Upaber Aiawh I

⁴⁰ Bawipa in Moses hnenah, “Israel mite ai fapa upa ber hlakhat le a vum lam hmuahhmuah a hming rori in hmingkhum tu sio.

⁴¹ Kai tu Bawipa ing. Israel mite fapa upa ber hmuahhmuah ca Levi mite tu kaimah ai tuhin ham zo ing; cen Israel mite sumhnam fa upa ber hmuahhmuah ca Levi mite ai sumhnamte ham zo ing,” tiin ti i.

⁴² Moses in Bawipa ai thupeciahnak hlun ai,

⁴³ hlakhat le a vum lam fapa upa ber hmuahhmuah mipum a siar fangin amahte veksen in thawng kul hluanhnih zahnih le sawmsarih pathum um tlang i.

⁴⁴ Moses hnenah Bawipa in,

⁴⁵ “Israel mite ai fapa upa ber ca Levi mite tu i hnenah ap tulai, Israel mite sumhnam ai fa upa ber ca Levi mite sumhnam i pe tu. Levi mite tu kaimah ai tuh i. Kai tu Bawipa ing.

⁴⁶ Cen Israel mite ai fapate a upa ber heh Levi mite tahin zahnih sawmsarih le pathum tam sawn imanin a hlaihnak fapate tu tlan leh tuh i si.

⁴⁷ Hotu upate ai hmanghnak bangin fapa pakhat tu ngun tangka fang nga in tlan tuh i si.

⁴⁸ Ciami tangka heh Aaron le a fapate hnenah pe tuh i si,” tiin ti i.

⁴⁹ A tihnak bangin Moses in bawn sio ai,

⁵⁰ ngun tangka thawng khat za thum sawmruk le panga suak ai,

⁵¹ Aaron le a fapate hnenah pe i.