Mikah 7 - Zanniat Bible

Israel Ai Nuncan Siavadan

¹ Poi roh i! Rikam ngai in thingkung vumah thingthai si ai zaikhai a ngah lotu le cabit kuang vumah cabit thai si in a tawk lotu bang ing. Thaihmin ur ngai le cabit thai hmuahhmuah loih zo sek i.

² Hemi ram songah mifel pakhat khai um lo i; Pathian rinsantu pakhat khai um lo i. Mi rekhnak can ian bawh i. Pakhat le pakhat zuar dun tuhin bawh dun ṭen i.

³ Thil siava bawn lam ahcen rintlak ciang i. Hotu bawi le thukhantu bawite in nawhthuh ngen i. Thiltithai pasalte in amahte daihhnak rel ai ciatihin thil sual khiah rel tlang i.

⁴ Amahte lakai mi pha ber rin hling bang i ai mifel ber a tihnak tu saiso hling bang i. Prophet hmangin Pathian in ralringhnak a rel zo bangin a minungte a cawhhnak can hleng tuh i. Tun in hnok murhmo zo i.

⁵ Na innhnen khai rinsan mah; na rualpui khai sang mah. Na nupui hnenai na ponghnak rin ralring tu.

⁶ Ciabang can ahcen fapate in a pate khiah mivoi tiin ruat tlang tuhai, fanute in a nute ralcai tuh i. Mote khai a ni thawn hua dun tuhai aisusu khai a ral heh amahte ai innsang mi i tuh i.

⁷ Ikhalselai kai incen Bawipa hlir tuh ing. Hlamuang in i otu Pathian iang tuhai amah in i hup tuh i. I Pathian in i aw i za tuh i.

Bawipa In Nunohnak Koih I

⁸ Kin ralte in kin vumah imm tuh zaikhai nai lo i. Kin bah zo i, ikhalselai tho leh tuh ising. Thimhnak songah um ising, ikhalselai Bawipa in varhnak kin pe tuh i.

⁹ Bawipa vumah kin sual zo ai camkhat song a thinrawhnak tuar tlang tuh ising. Ikhalselai a tawphnak ahcen amah in kin ṭan tuhai kin vumai amahte thil dik lo a bawnhnak tu dikcanghnak thawn thukhan leh tuh i. Tleuhnak ah a mah in kin suah tuhai a kin ohnak khiah hmu tuh ising.

¹⁰ Ciafangin kin ralte in, “Bawipa ning Pathian tu akonah i?” tiin kin nautat hnelhnotute in hmu tuhai zakthi in um tlang tuh i. Kin ralte sung tuhai lampui ah nawngbek bangin fonhnak a tuar khiah hmu tuh ising.

¹¹ Aw Jerusalem mite, ning khuapui saleh tuh can hleng dawn ihang. Ciami can ah ning ram tu kauruai tuh amam i.

¹² Ning minungte khuahacang in ning hnenah let tlang tuh i: Nisuah lam Assyria in, hlang lam Egypt ram an le a hlapui tifingriat le tlang sang puipui in let tuh i.

¹³ Ikhalselai ciami lairamte tu a vumai umtute ai sualhnak le phatlohnak manin ramkhing ah cang tuh i.

Bawipa In Israel Ninghio I

¹⁴ Aw Bawipa, na rilmi na minungte tu tuu bangin na faikiang thawn khal tu. Amahte hiangai ramte tu ram pha bikbik ikhalselai anite ai umhnak tu ramkhing i ai ciata ah amahte lek um i. Ram pha hmun Bashan le Gilead ah feh tu selai hlanlaipui ai a um awng bangin rongkham in um leh tuseh.

¹⁵ Aw Bawipa, Egypt ram an na kin suah lai can ai na bawn awng bangin kin caah ngaihsunurkul bawn tu hram law.

¹⁶ A dang miphunte in ciami a hmu fangin zaitlukin mihat a ita inkhai zakthi tlang tuh i. Thinpit vansang in amahte ka hup tlang tuhai amahte bil hup tlang tu i.

¹⁷ Laivut lakah rul bangin vak tuh i; lai lakai a vaktu zuzit khokhuak bangin! Amahte ral ṭanghnak ralkulh in hlawng derdo in suak tuh i. Kihhnak thawn kin Bawipa Pathian hnenah let tuh i.

¹⁸ Aw Bawipa, nangmah bang Pathian aisu um pa! A tangsun na minungte tu amahte sualhnak ngaithiam isi. A kumzangza in thinraw lo isi; a kho ngai na ithnak tu amahte vumah larruai ṭio isi.

¹⁹ Tun ahkhai kin vumah ninghiohnak nai leh tuh isi. Kin sualhnak tu na ke hniaah fon tuhai tifingriat ai a holtong ah lon tuh teu isi.

²⁰ Hlanlai ah kin pupa Abraham le Jacob hnenai na thukhamhnak bangin a tesinfate, na minung Israel mite hnenah rinsantlak na ihnak le a kho ngai na ithnak tu larruai tuh isi.