Mikah 6 - Zanniat Bible

Bawipa In Israel Mawhhluk I

¹ Bawipa in Israel vumai mawhhlukhnak ngai tu ih! Aw Bawipa, tho tulai na naihnak thu rel tucuk law; tlang sang puipui le mual niam niuniu in na thu za tuseh.

² Ningmah tlang sangpui pawl, ningmah kumzangza a kho ngai laivum ham tohhnakte, Bawipa ai thu khiah ngai tu ih! Bawipa in a minung vumah thunai i. Israel vumah a naihnak thu rel tuh i.

³ Bawipa in, “I minungte, ning vumah ziang bawn awnghnak nai ing? Akontih in ningmah caah thilrit ai i cang khiah? I sawn tu ih!

⁴ Egypt ram an kaimah in ning o ing ai saltanghnak in ning tlan ing. Ningmah konghoitu tuhin Moses le Aaron le Miriam hlat ing.

⁵ I minungte, Moab kumpibawi Balak in ning vumah thil bawnhnak le Beor ai fapa Balaam in thu a sawnhnakte khiah hih tu ngio ih. Akasa ah zancam hmun an Gilgal fehhnak lampui ai thil a cang awnghnakte hih tu ngio ilai ningmah hup nuam in thil i bawnhnak tu ling leh tuh i si,” tiin ti i.

Bawipa Ai Daihhnak

⁶ Vancung Pathian Bawipa bia tuhin i feh fangin a hnenah ziang keng tuh ing? A hnenai maitai hibawlhnak sel tuhin kum khat khim kawlpaw dawnniu pha bik keng tuh ing maw?

⁷ Tuu a thawng a za in pe inglai Bawipa tu a lungawi tuh im? Catloin a luangmi olive thau in a lungawi ni im? I sualhnak manin a hnenah i song suak i fa upa ber pe tuh ing maw?

⁸ I lo i, Bawipa amah in a pha le bawnruai a nuamhnak tu i rel zo i. Amah in i cangruai nuamhnak tu: A dikcang bawn le ninghiohnak nai le hniatacuhniu in Pathian thawn vak tlang khiah i.

⁹ Bawipa kihzah heh fimhnak i. Bawipa in khuapui ko ai, “Khua songai a umtute ngai tu ih.

¹⁰ Miphalote ai inn ahcen phatlohnak thawn ngahhnak sumsaw tampui um i. A dikcang lo tehhnak hmang i, i huahnak thil i.

¹¹ A dik lomi tehhnak le a dik lomi cuaitehhnak a hmangtute tu akontih in ngaithiam thil tuh ing?

¹² Khuasong ai miliante in mifarahte nekrawk tlang ai ning veksen in thudonreltute ciang i si.

¹³ Ning sualhnak manin ningmah siatsuahhnak tunin pan zo i.

¹⁴ Rong tu ai tuh napui ning kham tuh lo i; ril ning kam tuh ṭio i. Thilri hup tuhin ning tlanpui inkhai hlawh ning tling tuh lo i. Ning tlanpuihnak um inkhai ral kut in hnawmruai tuh thotho ing.

¹⁵ Hlaici pawi tuh napui a thai tu khawm ngah tuh lo i si. Olive thai in siti rial tuh napui hmang tuh pha nai tuh awng lo i si. Cabitti pam tuh napui ding ngah tuh lo i si.

¹⁶ Kumpibawi Omri le a fapa kumpibawi Ahab ai thil sual a bawn kawmhnak hlun tlang zo i si. A hlumhnak thu tu ningmah in hlun ngio manin hnawmhnak ah ning hlenpui tuhai mi zongzong in zoh ning suam tuh i. Khuahacang ah mi in nautathnak thawn ning siatsuah tuh i,” tiin ti i.