Mikah 5 - Zanniat Bible

¹ Jerusalem mite, ning ralkap hmunkhat ah khawm tu ih! Kin kulh zo sio i! Israel hotu heh a biang ah thirfung in vit tuh i.

Uktu Ca Pathian Thukham

² Bawipa in, “Aw Bethlehem Ephratah, nang tu Judah peng ah khua cik ber pakhat inapui sikhaw na songin Israel uktu suakruai tuh ing. A suahsemhnak tu hlanlai, a liam zomi san in pan awng zo i,” ti i.

³ Ciatihin Bawipa in a minungte tu fa naitu tuh nupang in fapa a nai hlan song hmuah a ral kut songah hlum tuh i. Cia hnuaah a unau ralpomhnak hmunai a umtute thawn kom dun leh tuh i.

⁴ Amah a kawi fangin tu Bawipa ai thazang le Bawipa Pathian ai huham thawn a minungte uk tuh i. Laivum pumpuhluk ah mi zongzong in a songlawi zia hmu tuh manin amah ai minungte tu him ngai in um tuh i.

⁵ Daphnak hlengpui tuh i. Assyria mite in kin ram kin tawng ai kin ṭanghmun a hleng fangin anite tawng tuhin kin hotu hat ber pawl hlat tuh ing.

⁶ Amahte ralthuam thawn Assyria ram. Nimrod ai ram neh tuh i. Assyria mite in kin ram a tawng fangin kin huptu heh anite i tuh i.

Luangsuahhnak Le Cawhhnak

⁷ Israel mite a tangsunte tu miphun tampui caah Bawipa ai farruaihnak nai bang i tuh i; hampa dawnniu caah maici bang i tuh i. Ciamite in minung ilo in Pathian rinsan tlang tuh i.

⁸ Israel mite hrekkhat miphun lakah tang tuhai tupui song le sumhnam lenghnak hampalak ah rong si in a vaktu hnelhno chintit bang i tuh i. Chintit tu tuurual lakah lut in bot ai hlai berh i. Hung thil tuh umlamhnak um nawn lo i.

⁹ Ciatih bangin Israel in a ral tampui neh tuhai siatsuah tuh sek i.

¹⁰ Bawipa in, “Cia nia ah ning siphuhte kaimah in lang tuhai ning siphuhlengte hnawmruai tuh sio ing.

¹¹ Ning khuapuite hnawmruai tuh sio ai ning ṭanghmun vingpuite tu bal tuh sek ing.

¹² Ning dawithiamte lon tuh sio ai ning mipolte tu pakhat khai zuah tuh lo ing.

¹³ Ning milimte le ning biahnak hnelhno ning lungphum zarh pawl bal tuh sek ing. Ningmah kut ai bawnhnak thil zaikom inkhai bia tuh nawn lo i si.

¹⁴ Ning ram songai Asherah limte le ning khuate tu siatsuah tuh sek ing.

¹⁵ I thu a hlun lomi miphun tu thinraw in amahte vumah phuzul tuh ing.