Matthai 9 - Zanniat Bible

Jesuh In Mizepa Cakruai I

¹ Jesuh tu lawng songah lut ai tili khat lam ral ai a khua Kapernuam ah let i.

² Cen mize pakhat heh a ihphah thawn Jesuh hnenah zawng tlang i. Amahte in sanghnak a naidan heh Jesuh in a hmu fangin, mi ze pa hnenah, “I fapa, zaikhai lau mah. Na sualhnak tu ngaithiam zo i,” tiin ti i.

³ Cen Danthiam sayate hrekkhat in, “Hemi pa tu Pathian thangsiat in pong i,” tiin ti dun tlang i.

⁴ Ciatih ai a ruathnak heh Jesuh in ling ai, “Zaimanin he bangtluk thil sual heh ruat tlang i si?

⁵ ‘Na sualhnak tu ngaithiam zo i,’ ti maw ‘Tho tulai feh tu,’ ti bai sawn pa?

⁶ Minung Fapa in laivum ai misual ngaithiam thilhnak thu nai i, tiheh ning hmaiah larruai tuh ing,” tiin ti ai mi ze pa hnenah, “Tho tu, na ihphah lang tulai na inn ah tlung tu,” tiin ti i.

⁷ Mizepa tu tho ai a inn ah tlung i.

⁸ Ciami heh mizapui in a hmu fangin thin lau tlang ai ciabangtluk thunaihnak minung hnenah a pe manin Pathian thangphat tlang i.

Jesuh In Matthew Kohnak

⁹ Cia hmunin Jesuh tu suak ai a vak thliahthlo laitak ah siahkhawltu pakhat Matthew tihnak a zung songah a to khiah hmu ai, “I hlun tu,” tiin ti i. Matthew tu tho ai Jesuh hlun i.

¹⁰ Jesuh tu Matthew inn ah zanfak a ai laiah siahkhawltu dang tampui le misual i tiin a hnawlhnak mite in Jesuh le a hnuahlunte heh rong aipui tlang i.

¹¹ Farasite hrekkhat in ciami a hmu fangin a hnuahlunte khiah, “Ning sayapa heh zaimanin hebang minungte thawn rong ai tlang heh i?” tiin zawt tlang i.

¹² Ciami heh Jesuh in a za fangin anite hnenah, “Nun cak mite in sibawi kul lo i, miurte ian in kul i.

¹³ Feh tu ilai, ‘Sumhnam in hibawlhnak sel kul lo i, mi ninghiohnak thinlung i daih sawn i,’ tiin Lai Thianghlim in a tihnak tu a sullam ruat tucuk ih. Midikcangte ko tuhin kawi lo ing, misualte ko tuhin kawi ing,” tiin ti i.

Rong Ulhnak Thu

¹⁴ Cen baptisma petu John ai hnuahlunte tu Jesuh hnenah kawi tlang ai, “Kin le Farasite tu rong ul tlang de napui zaimanin na hnuahlunte tu rong ul tlang lo i,” tiin zawt tlang i.

¹⁵ Jesuh in, “Mo hoi puai ai sawm mite tu zaimanin mohoitu pa a um songah lungsia in um tuh i? Lungsia in um tuh lo i! Ikhalselai anite hnenin mohoitu pa a lang can hleng leh tuhai ciafangin rong ul tlang leh tuh i.

¹⁶ Aisu inkhai angki hlun her vumah pon thar in dat awng kel lo i, zaimantifangin a dathnak thil thar khiah ton tuhai angki a herhnak kau tuh amam i.

¹⁷ Ciabang pah in aisu inkhai savun thawl hlun songah cabitti thar thun awng kel lo i; thun lekhaw savun thawl tu khoi tuhai cabitti khiah zun tuh sek ai savun thawl hnawm tuh i. Ciahnak tahin savun thawl thar songah cabitti thar thun lekhaw hnawmhnak zaikhai um loin a pahnih in him tuh i,” tiin ti i.

Jesuh Ponhmur Daitu Nupang Nu

¹⁸ Ciami thu Jesuh in a rel laiah Judah mi lakah bawi pakhat Jesuh hnenah kawi ai a khuk caicin in, “Tun niu ah i fanu thi i. Ikhalselai nangmah kawi ai a vumah na kut suan lesikhaw nung leh tuh i,” tiin ti i.

¹⁹ Jesuh khai tho ai a hnuahlunte thawn cia pa hlun tlang i.

²⁰ Cialak fangin nupang nu pakhat kum hlaihnih song a roh ngai in thisuak ur a tuartu in Jesuh hnua lamin kawi ai a ponhmur khiah dai i.

²¹ “A ponhmur niu tal dai thil lengkhaw i cak tuh i,” tiin a thinlung niu in ruat i.

²² Ciafangin Jesuh tu a khel her ai cia nu khiah hmu i. “I fanu, na thinlau mah! Na sanghnak in na cakruai zo i,” tiin ti i. Cia sawngpah in cia nu tu cak i.

²³ Cen Jesuh tu Judah hotupa inn songah lut i. Mithi topuihnak khuang le dar a tumtute le minung hnok murhmo in um tlang a hmu fangin,

²⁴ “Ning veksen in suak tusek ih! Hemi naupang nu tu thi lo i, a mitmu i,” tiin ti i. Ciafangin hnihsan tlang i.

²⁵ Ikhalselai mi a suak sek sawng fangin Jesuh tu naupang nu umhnak khan ah lut ai a kut a awh sawngpah in naupang nu tu tho i.

²⁶ Cia thu tu a cingkim ram song hmuahhmuah ah thang sio i.

Mitcawte Pahnih Khua Hmuruai I

²⁷ Jesuh tu cia hmun in suak ai a vak thliahthlo laitak ah mitcawte pahnih in hnawh ai, “Aw David ai fapa, ning kin hio tu law,” tiin au kawm i.

²⁸ Jesuh tu inn songah lut ai mitcawte pahnih khai a hnenah kawi kawm ai Jesuh in, “Ning cakruai thil tuh ing tiin sang aw i sim?” tiin zawt i. “I, Bawipa!, sang i ing,” tiin ti kawm i.

²⁹ Ciafangin Jesuh in a mit dai ai, “Ning sanghnak bangin cang tuseh,” ti ai,

³⁰ Khua hmu thil leh i. Jesuh in anite hnenah, “Hemi thu heh aisu khai rel mah ih,” tiin a roh ngai in tiam i.

³¹ Ikhalselai feh kawm ai Jesuh thu khiah khuahacang ah than kawm i.

Pong Thil Lo Pa Cakruai I

³² Mizapui amahte inn ṭen ah a tlung laitak ah midangte in khuasia ai molhhnak manin a pong thil lomi pa pakhat Jesuh hnenah fehpui i.

³³ Jesuh in khuasia a hnawtsuak sawngpah in ciami pa tu pong thil leh ai mi zongzong ngaihsunur tlang sio i. “Israel mi lakah hebangtluk hmu awng lai lo ising,” tiin ti tlang ṭen i.

³⁴ Ikhalselai Farasite in, “Khuasia hnawtthilhnak huham tu khuasia bawi in a hnenah pe i,” tiin ti tlang i.

Jesuh In Mizapui Ngaihhar I

³⁵ Ciatihin Jesuh tu khual tlawng ai khuapui ituseh, khuatenau ituseh, feh kong zianzo i. Synagogue ah thuzirh i, vancung Ukhnak Thuthangpha rel ai urhnak le cak lohnak a phunphun a naitute cakruai betbo i.

³⁶ Mipui a hmu fangin khaltu nai lo tuu bangin rimsu le multing in a um tlang manin amahte vumah ngaihharhnak nai i.

³⁷ Ciafangin, Jesuh in a hnuahlunte hnenah, “Rong khawm tuh tam napui a khawmtu tuh tlawmniu i.

³⁸ Rong khawmtu tuh a naitu bawi hnenah rong khawmtu tuh mi tampui hlat tuhin sawngen tu ih,” tiin ti i.