Matthai 8 - Zanniat Bible

Jesuh In Miphar Pa Cakruai I

¹ Jesuh tu mualvum in zuktolh ai mi tampui in hlun tlang i.

² Cen miphar pa a hnenah kawi le a hmaiah a khuk caicin in ut ai, “Bawipa na nuam lekhaw i cakruai thai isi,” tiin ti i.

³ Jesuh in a kut in a dai hnuaah, na cakruai tuh ing, tunai panin thiang tuhang,” tiin ti i. Cia sawngpah in ciami pa tu cak i.

⁴ Cen Jesuh in, “Ngai tu, hemi thu heh aisu khai rel tuh lo isi; ikhalselai suangbawi hnenah feh tulai amah in na sik tuseh. Cen na cak zo i ti ai mizapui in ling tuhin Moses ai thupeciahnak bangin hibawlhnak sel tu,” tiin ti i.

Jesuh In Rome Ralbawi Ai Hnenum Cakruai

⁵ Jesuh tu Capernaum khua a hleng fangin Rome ralbawipa pakhat in tawk ai bawmhnak ngen i.

⁶ “Bawipa, i hnenum pa tu a roh ngai in ur ai mer thil loin inn ah it ngiode i,” tiin ti i.

⁷ “Kawi tuhai cakruai tuh ing,” tiin Jesuh in ti i.

⁸ Ralbawipa in, “Bawipa, ciatihin tu i maseh; nang i inn tian na kawiruai tuhin kai tu i tlak lo i. Cakhnak thupe tulai i hnenum pa tu cak tuh ngawn i.

⁹ Kaimah khai i vum lam bawite ai ukmi ing ai i kuthnia ahkhai ralkapte um i. I kuthnia ralkap pakhatkhat khiah, ‘Feh tu,’ ti lengkhaw feh i; ‘Kawi tu,’ ti lengkhaw kawi i. I hnenum khai, ‘Hemi bawn tu’ ti lengkhaw bawn i,” tiin ti i.

¹⁰ Ciami tu Jesuh in a za fangin a ngaihsunur ai amah a hluntu mizapui hnenah, “Thutak ning rel ing; Israel mi lakah rin he pa ai sanghnak bang hmu lai lo ing.

¹¹ Fiang ngai in ning rel ing: nisuahhnak le nitlakhnak in mi tampui kawi tlang tuhai Vancung Ukhnak rong ai puai ah Abraham, Isaac le Jacob thawn to tlang tuh i.

¹² Ikhalselai vancung ukhnak a cotu tuh mite sawn khiah kaphnak le kamriathnak hmun sawn ah lonhnak tuar tlang tuh i,” ti i.

¹³ Ciafangin Jesuh in ralbawipa hnenah, “Inn ah tlung ta tulai na sanghnak bangin na bawn sah tuh i,” tiin ti i. Ralbawipa ai hnenum tu ciami can cekci ah cak ve i.

Jesuh In Mi Tampui Cakruai I

¹⁴ Jesuh tu Peter inn ah feh ai ciata ah Peter ai pi heh hlawng ur in ur ai khuahluan vumah a it ngio khiah hmu i.

¹⁵ Jesuh in a kut awh ai a hlawng ur heh lawm i. Cen tho ai Jesuh tuamhlawm ben i.

¹⁶ Zan lam fangin khuasia ai polh mite heh Jesuh hnenah koih tlang i. A ponkam kam khat in khuasiate hnawt ai miurte cakruai sio i.

¹⁷ Hetihin a bawnhnak heh prophet Isaiah in, “Amah rori in kin urhnak heh lang ai kin cak lohnak pawl khiah phur sek i,” tiin a rel awnghnak khimruai tuhin i.

Jesuh Hluntu Tuh Mite

¹⁸ Jesuh in a cingkim ai mizapui a hmu fangin a hnuahlunte khiah tili khat lam ralah feh tuhin thupe i.

¹⁹ Danthiam saya pakhat a hnenah kawi ai, “Sayapa, na feh hmuncang ah na hlun tuh ing,” tiin ti i.

²⁰ Ciafangin Jesuh in, “Mehleng in kua nai ai vaniu in bu nai i; ikhalselai Minung fapa in a zau hmun le cawlum hmun rin nai lo i,” tiin ti i.

²¹ A hnuahluntu dang pakhat in Jesuh hnenah, “Bawipa, let tuh zual ai i pa phum rih tuh ing,” tiin ti i.

²² Jesuh in, ‘I hlun tu sawn, mithite in mithi heh vui tuseh,” tiin sawn i.

Jesuh In Khuahu Dapruai I

²³ Jesuh tu a hnuahlunte in hlun ai lawng songah lut tlang i.

²⁴ Mangrin loin khuahu zuang ai khawm ciah phum dawn lio i. Ikhalselai Jesuh tu mitmu meng i.

²⁵ A hnuahlunte in phawr ai, “Bawipa, kin o tu law! Kin thi dawn ihang,” tiin ti tlang i.

²⁶ Ciafangin Jesuh in, “Zaimanin ciatihin ning lau tlang heh i? Ning sanghnak a tlawm ze i,” tiin ti i. Cen tho ai hlivuate le tilepte heh dap tuhin thupe i; cia sawngpah in tilep tu dap sek i.

²⁷ Mi zongzong ngaihsunur tlang ai, “Hemi pa tu ziang minung heh ini? Khuahu le tilep inrin a thu ngai i,” tiin ti tlang i.

Khuasia Polh Mite Pahnih Cakruaihnak

²⁸ Jesuh tu tili khat lam ral Gadara tihnak ramah hleng ai ciata ai hlan khukua songin a suaktu mite pahnih in tawk i. Hemite pahnih tu khuasia polh mite i ai a kihkul manin ciami lampui tu aisu inkhai hlun ngam tlang de lo i.

²⁹ Cia sawngpah in au kawm ai, “Aw Pathian ai Fapa, nang le kin ziang seng dun ising? A can a khim hlanah kinmah cawh tuhin kawi isim? tiin ti kawm i.

³⁰ Ciata in a hla thah hmunah rong a aitu hnelhno vokrual um i.

³¹ Khuasiate in Jesuh tu ngen ai, “Kin hnawt tuh ilesikhaw khiata ai vokte songah kin lutruai tu,” ti i.

³² Jesuh in, “Lut tu ih,” tiin ti i. Khuasiate tu ciamite pahnih songin suak ai vokrual songah lut i. Vokrual tu ciata liang lakin dawp tlang ai tili songah tlok ai thi sek i.

³³ Vok khaltute tu khua songah dawp tlang ai ciami thulate le khuasia polh mite pahnih vumai thil a canghnakte heh a khimliang in rel tlang i.

³⁴ Ciamanin khua songmi hmuahhmuah khai Jesuh tawk tuhin feh tlang i; Jesuh a hmu tlang fangin amahte ram in hmundang ah feh tuhin ninghio ngen tlang i.