Matthai 6 - Zanniat Bible

Sianghnak Thu

¹ “Biahnak lam thil pha ning bawnhnak heh mi in kin hmu tuseh tiin mizapui hmaiah bawn tuh loin ralring tu ih. Ciatihin mizapui hmaiah bawn le i sikhaw vancung ai a umtu ning Pa hnenin phatman zaikhai ngah tuh lo i si.

² “Ciamanin mi hlawhsamte hnenah thil pakhatkhat na sum fangin mi phalaktla pawl in synagogue le zalampui ai bawnhnak bangin thirhlung tum in au mah ih. Anite in mizapui ai thangphat tuhin bawn tlang i. Fiang ngai in ning rel ing: amahte ngah tuhhnak tu ngah zo sek ihang.

³ Ikhalselai ning incen mi hlawhsam pawl ning bawn fangin ning kiahhan lam kut ai bawnhnak khiah ning kekeh lam kut inkhai ling thai loniu in bawn tu ih.

⁴ Ciatihin a thupniu ai ning bawnhnak a hmutu ning Pa in phatman ning pe tuh i.

Sawngenhnak Thu

⁵ “Saw ning ngen fangin mi phalaktla pawl bangin ngen mah ih. Anite cenin mi zongzong in i hmu tuseh tiin synagogue le za lamtluanah ding kongin sawngen hiam tlang ngai i. Fiang ngai in ning rel ing: amahte ngah tuhhnak phatman tu ngah zo sek i.

⁶ Ikhalselai ning tu saw ning ngen fangin ning innkhan songah lut tu ilai dawngkham ning kham hnuaah mithmuh lo ning Pa hnenah sawngen tu ih. Cen a thupniu ai ning bawnhnak a hmutu ning Pa in ning phatman ning pe tuh i.

⁷ “Saw ning ngen fangin Pathian ling lotute ai sullam nai lo ponkam tampui a pong bangin bawn mah ih. Anite incen raipui saw a ngen fangin Pathian in ngai cuang tuh i tiin ruat tlang i.

⁸ Amahte bang cang mah ih. Ning kulhnak tu ning ngen hlan in ning Pa in ling cia zo i.

⁹ Ciamanin hetih bangin sawngen tuh i si: “Vancung ai a umtu kin Pa, Na hming thianghlim upathnak um tuseh;

¹⁰ Na Ukhnak hleng tu hram seh; Vancung ah na daihhnak a khim bangin laivum ahkhai khim tu ve seh.

¹¹ Nisiar kin kulhnak rong kin pe tu.

¹² Mi in kin vumah sualhnak bawn ai kin ngaithiam bangin Kinmah ai sualhnak khai kin ngaithiam tu ve law.

¹³ Sualsawmhnak kin tuarruai loin, hnawmhnak hmuah lakin kin hup tu law.’

¹⁴ “Ning vumah sualhnak a bawntute ngaithiam le i sikhaw vancung ai a umtu ning Pa in ning ngaithiam tuh ve i.

¹⁵ Ikhalselai midang sualhnak ngaithiam hlah le i sikhaw ning sualhnak tu Pathian in ning ngaithiam thun tuh ve lo i.

Rong Ulhnak Thu

¹⁶ “Rong ning ul fangin miphalaktla pawl bangin lungsia mithmai in um mah ih. Mihrekkhat in rong a ul khiah mi zongzong in i ling tuseh tiin a mithmai in larruai i. Fiang ngai in ning rel ing: amahte ngah tuhhnak phatman tu ngah tlang zo sek i.

¹⁷ Ning tu rong ning ul fangin ning hmai hliam in ning sam khai phatak niu in kiat tu ih.

¹⁸ Ciatihin aisu inkhai ning rong ulhnak khiah ning ling tuh lo ai mithmuh lo ning Pathian ian in ning ling tuh i. A thupniu ai ning bawnhnak a hmutu ning Pa in phatman ning pe tuh i.

Vancung Ah Khawl Tu ih

¹⁹ “Khar le nget ai a siatsuah thil le rukote in bal ai a ruthilhnak laivum ah ning sumsaw khawl mah ih.

²⁰ Khar le nget ai siatsuah thil lo le rukote ai a bal thil lohnak vancung ah ning sumsaw khawl tu sawn ih.

²¹ Zaimantifangin ning sumsaw umhnak ah ning thinlung khai um tuh ve i.

Taksa Ruangpui Ai Tleuhnak

²² “Mit tu taksa ruangpui caah maikhuat i. Ning mit ning fim lekhaw ning taksa ruangpui tu tleu tuh sio i.

²³ Ikhalselai ning mit pha lo fangin tu ning ruangpui tu thimhnak songah um tuh i. Ciamanin ning songai tleuhnak tu thimhnak in dim lekhaw zaitluk a kihkul thimhnak i tuh i!

Pathian Le Tangka Thu

²⁴ “Aisu inkhai bawite pahnih ai sal cang thil lo i. Pakhat daih tuhai pakhat hua tuh i. Pakhat hnenah rinsantlak in um tuhai pakhat tu zohsuam tuh i. Pathian le tangka ruaih kawm thil tuh lo i si.

²⁵ “Ciamanin ning rel ing: ning nunhnak caah ning kulhnak ti le rong le ning ruangpui caah hnikponte thu ruat le donhar in um mah ih. Thungai in tifangin, nunhnak tu rong tahin thupui sawn lo im? Hnikpon tahin taksa ruangpui thupui sawn lo im?

²⁶ Van ai a zuang thai vaniute khiah sik tu ih: anite in hlaici cing lo i, rong khai khawm lo ai been songah khai khawl tlang lo i. Ikhalselai vancung ai a umtu ning Pa in cawm sio i. Vaniu tahin tampui ning songlawi sawn ilo im?

²⁷ Ning donharhnak manin ning nunhnak can comniu tal sauruai thai awm?

²⁸ “Cen hnikpon thu ah zaimanin don ning har i? Hampalak ai dingawrh par heh sik tu ih: na per lo i, vokher ai thiam khai tak fawn lo i.

²⁹ Ikhalselai tunah ning rel ing: kumpibawi Solomon rin, khia tlukin lian napui, a lianhnak le a hnikpon tu papar ai mawihnak tluk lo i.

³⁰ Tunnia ah nung ai thangha ah mai songah lon tuh hampa rin a mawiruaitu Pathian in ciamite tahin ning tu ning thuam tuh sawn lo im? Ning sanghnak tlawm ze hlaihlawr i!

³¹ “Ciamanin ‘Aih le din le silh le fen tuh khai akonan ngah tuh ing,’ tiin donhar in um mah ih.

³² Hemite tu Pathian ling lo lawki mite ai panhlah ṭiohnak i. Vancung ai a umtu ning Pa in he thil ning kulhnak tepawl tu ling sio i.

³³ Ciahnak tahin Pathian Ukhnak le dikcanghnak si hmasa tu ilai thil dang hmuahhmuah ning pe bet tuh i.

³⁴ Ciamanin thangha caah donhar in um mah ih; thangha in donharhnak amah phutua in nai tuh ve i. Ni ni khat ai a phur tawk harsahnak vumah a dang betcih tuh ilo i.