Matthai 5 - Zanniat Bible

Mualvum Thuzirhhnak

¹ Jesuh in mizapui a hmu fangin mual vumah kai i; ciata ah to ai a hnuahlunte a hnenah kawi tlang i.

² Cen a ka ka ai hetihin thu zirh i:

³ Rauhla lamah fa i rah i, ti a lingtute tu mihmuifu i. Zaimantifangin vancung ukhnak tu amahte ai i.

⁴ Thinhnawm lungsiate tu mihmuifu i; zaimantifangin Pathian in hnem tuh i.

⁵ Thinnem mite tu mihmuifu i; zaimantifangin Pathian ai thukhamciahnak co tlang tuh i.

⁶ Pathian ai daihhnak bawn tuhin a hiamtute tu mihmuifu i, zaimantifangin Pathian in amahte thinlung riamruai tuh i.

⁷ Mi ninghio thiamtute tu mihmuifu i; zaimantifangin Pathian in anite ninghio thun tuh ve i.

⁸ Thinlung a thiangtute tu mihmuifu i, zaimantifangin Pathian hmu tlang tuh i.

⁹ Remhnak a bawntute tu mihmuifu i; zaimantifangin Pathian ai fa tiin kohnak ngah tlang tuh i.

¹⁰ Pathian ai daihhnak bawn manin cawhhnak a tuartute tu mihmuifu i; zaimantifangin vancung ukhnak tu amahte ai i.

¹¹ “Kaimah hnuahluntu ning imanin mi in zoh ning suam, ning cawh ai thudon a phuncang ning hluk fangin mihmuifu i si.

¹² Ning lungawi in aipuang tu ih, zaimantifangin ning caah tuarman tampui vancung ah dah i. Ning hlanai prophette khai cia bangtluk in cawhhnak tuar tlang zo i.

Ci Le Tleuhnak

¹³ “Ningte tu miphuncang hrangah ci i si. Ikhalselai ci tu a alhnak pai lekhaw alruai leh thil nawn lo i. Phathnemhnak zaikhai nai nawn lo manin lon tuh le fon tuh ian ihang.

¹⁴ “Ningte tu laivum pumpui caah tleuhnak i si. Tlang vumai tohhnak khua tu thup thil lo i.

¹⁵ Aisu inkhai maikhuat a var fangin kho in khum awng lo i. Mai varhnak tung vumah var i. Ciatihin inn songai umhnak veksen caah tleuhnak i.

¹⁶ Ciatih bangin ning tleuhnak khai mi hmaiah tleuruai tuh i si. Ciatihin thil pha ning bawnhnak heh mite in hmu tuhai van ai a umtu ning Pa khiah thangphat tlang tuh i.

Dan Thuzirhhnak

¹⁷ “Moses dante le prophette ai thuzirhhnak siatsuah tuhin kawi i, tiin i ruat mah ih. Ciamite siatsuah tuhin kawi lo ing, amahte zirhhnak khimruai tuhin kawi sawn ing.

¹⁸ Hemi tu phaniu in hih tu ih: Lai le van a um song tu dan songai dan nepnawi a cik ber pakhat rin pai tuh lo i, zaizongza a khim sek hlan tu pakhatniu bang khai pai tuh lo i.

¹⁹ Ciamanin aisu ita inkhai thukham a thupui lober pakhatniu khai hlun lo ai midang khai hlun tuh loin zirh ve lekhaw ani tu vancung ukhnak ah minauta cang tuh i.

²⁰ Fiang ngai in ning rel ing: Pathian daihmi bawnhnak ah Danthiam mite le Farasite tahin ning fel sawn hlah lekhaw vancung ukhnak ah lut thil tuh lo i si.

Thinrawhnak Thu

²¹ “Hlanlai ahcen ‘Mi rek mah, mi a rektu heh thukhanhnak tuar tuh i,’ a ti awnghnak ling zo i si.

²² Ikhalselai kai incen; a unau vumah thin a rawtute tu thukhanhnak tuar tuh i; aisu khai ituseh a unau khiah ‘Ziang khai hnempui lo,’ a titute tu thukhanhnak hmaiah suahpui tuhai a unau khiah, ‘Mi voi,’ a titute tu hell mai songah tlok tuh i tiin thinlau pha um i, tiin ti ing.

²³ Ciamanin puleng ah Pathian hnenah lehsawng pe ning tum laiah na unau pakhatkhat na vumah thinrawhnak nai i ti ling lesikhaw,

²⁴ Puleng hmaiah na lehsawng hma rih lawk tulai a rang ngai in na unau hnenah feh in remhnak bawn tu; cen kawi leh tulai na lehsawng heh Pathian hnenah pe tu.

²⁵ Mi pakhatkhat in na zuar ai zung ah na hlenpui lekhaw, zung ning hleng hlan a can um laiah amah thawn remhnak bawn tu. Zung na hlenpui hnuaah tu thukhantu kut ah na pe tuhai thukhantu in palik hnenah na pe tuh lala ai thawng ah na toh tuh i.

²⁶ Fiang ngai in na rel ing: a cawhhnak tangka na kuan sek hlanlo thawng songah um tuh isi.

Kangkawm Sualhnak Thu

²⁷ “Kangkawm sualhnak bawn mah, a ti dehnak ling i si.

²⁸ Ikhalselai kai incen: nupang khiah irhnak mit in a siktu heh a thinlung in ciami nu thawn kangkawm sualhnak bawn kawm zo i, tiin ning ti ing.

²⁹ Ciamanin na kiahhan lam mit in na sualruai lekhaw phorh tulai lon tu. Na ruangpui hell songah lon tuar tahin na taksa pakhatkhat na sung khiah nangmah caah pha sawn i.

³⁰ Na kiahhan lam kut in na sualruai lekhaw sat tu lio lai lon tu. Na ruangpui hell songah lon tuar tahin na kutke pakhatkhat tan khiah nangmah caah pha sawn i.

Nupui Mahnak Thu

³¹ “Aisu bang khai, a nupui ma lekhaw mahnak lai ken tuseh, tihnak ling i si.

³² Ikhalselai kai cenin: mi pakhat in a nupui khiah pasal dang thawn sualhnak manin siar lo, ma lekhaw, a nupui tu pasal a nai fangin kangkawm sualhnak bawntu cangruai i. Ciamanin ciami pa tu misual i. Ciatihin a mahnak nu a hoitu pa khai kangkawm sualhnak a bawntu i ve i.

Thutiamhnak Thu

³³ “Khuahlan lai ahcen, “Ning thukham pelhruai mah ih, Bawipa hnenah thu ning khamhnak heh bawn tu rori ih,’ a ti awnghnak ling i si.

³⁴ Ikhalselai kai incen hetih in ning rel ing: thutiamhnak ning bawn fangin zaikom inkhai cukcam in bawn mah ih. Vancung hming sal in thutiam mah ih, zaimantifangin Pathian tohnak i.

³⁵ Laivum hming sal inkhai thutiam mah ih, zaimantifangin Pathian ke dahhnak i. Jerusalem hming sal inkhai thutiam mah ih, zaimantifangin Kumpibawi thawmlian umhnak khuapui i.

³⁶ Ning lu sal inkhai thutiam mah ih, zaimantifangin ning lu vumai samfang fangkhat rin hangruai thil lo ai ngoruai thil fawn lo i si.

³⁷ ‘I,’ ‘ilo i,’ ti lek rel tu ih; cia hlai tu mi pha lo khuasia hnenin a suakhnak i.

Phuzulhnak Thu

³⁸ “Mit tumrul in mit, kam tumrul in kam, ti ai amahte relhnak tu ling i si.

³⁹ Ikhalselai kai cenin hetihin ning rel ing. Ning hnawmcantu vumah phuzul mah ih; mi pakhatkhat in na kiahhan lam biang na beng lekhaw na kekeh lam biang khai tun rih tu lawlaw.

⁴⁰ Cen mi pakhatkhat in na angki daih in zung ah na hlenpui lekhaw na angki silh puata khai pe tu lawlaw.

⁴¹ Cen na uktu ralkap pakhatkhat in thilri peng khat phur tuh na ruai lekhaw penghnih tian phur sah tu.

⁴² Mi pakhatkhat in thil pakhatkhat na ngen lekhaw pe tu; thil na pu nuamtute hnenah put tu.

Ralte Ithnak

⁴³ “Ning rualpui it tu ilai ning ralte hua tu ih,” tihnak tu ling zo i si.

⁴⁴ Ikhalselai kai cenin hetihin ning rel ing: ning ralte it tu ilai, ning reemtute caah sawnget tu ih;

⁴⁵ ciatihin vancung ai umtu ning Pa ai fa ning cang tuh i. Zaimantifangin Pathian in mi pha le mi pha lo vumah a bangvek in ni tlangruai ai thil pha a bawntu le thil hnawm a bawntu vumah a bangvek in ruah siruai i.

⁴⁶ Ning ittute ian it thun le i sikhaw zaimanin Pathian in lehsawng ning pe tuh i? Siahkhawltu inrin ciabang tu bawn ve i!

⁴⁷ Ning rualpui pha pawl ian phatak niu in pon le i sikhaw midang ning hlaihhnak zai um cuang tuh i? Pathian bia lotute rin cia bang tu bawn tlang ve de ilo im!

⁴⁸ Vancung ai a umtu ning pa a semkhim bangin ningmah khai semkhim liang in um tu ih.