Matthai 4 - Zanniat Bible

Jesuh Sualsawmhnak

¹ Cen Jesuh tu Satan in sualsawm tuhin Rauhla in hampalak ramkhing ah fehpui i.

² Ni sawmli le zan sawmli rong loin a um hnuaah Jesuh tu a rikam ngai i.

³ Ciafangin Satan a hnenah kawi ai, “Pathian ai fapa ngaingai ilesikhaw he lungtote heh sang ah cang tuhin thupe tu,” tiin ti i.

⁴ Ikhalselai Jesuh in, “Lai Thianghlim in ‘Minung nunhnak tu rong lekin ilo i. Pathian hmurka ai a suakhnak ponkam sawn in i,’ ti i,” tiin sawn i.

⁵ Cen Satan in Jesuh tu Jerusalem Khuapui Thianghlim ai Biakinn pardir ah fehpui ai,

⁶ a hnenah, “Pathian fapa ilesikhaw heta in dawp tu, zaimantifangin Lai Thianghlim ah, ‘Pathian in na hiangai a umtu Vancungmite thupe tuh i, Amahte kut in na dom tuhai Na ke tu lungto thawn khi dun tuh lo i,’ tiin um i,” tiin ti i.

⁷ Ikhalselai Jesuh in, “Lai Thianghlim in ‘Bawipa na Pathian heh cu mah,’ ti i,” tiin sawn i.

⁸ Cen Satan in Jesuh tu tlang sangpui vumah fehpui ai laivum ram hmuahhmuah khiah a songlawi zia thawn hmuh sio i.

⁹ Cia hnuaah Satan in, “Na khuk caicin in i bia lesikhaw he hmuahhmuah heh na pe tuh ing,” tiin ti i.

¹⁰ Ciafangin Jesuh in, “Satan, tlan tu, zaimantifangin Lai Thianghlim in ‘Bawipa na Pathian bia tulai amah na ian per tuh isi,’ ti i,” tiin sawn i.

¹¹ Cen Satan heh tlan i; cia hnuaah vancungmite in tuamhlawm i.

Jesuh In Galilee Ah Naper Pan I

¹² John khiah thawng ah toh i, ti a za fangin Jesuh tu Galilee ah feh i.

¹³ Nazareth ah um loin Kapernuam ah um tuhin feh i. Kapernuam khua tu Zebulun le Naphtali miphunte ram song Galilee Tili kamai umhnak khua i.

¹⁴ Hetih ai a umhnak tu prophet Isaiah ai a relciahnak khimruai tuhin i. Isaiah in:

¹⁵ “Gentile mite umhnak Galilee ram song, Jordan runpui ralkhat ai um, Tipui lamah, Zebulun le Naphtali ram,

¹⁶ Khuathim songah a umtute in, Tleuhnak a thawmlian hmu tuh i. Thihhnak ramthim songah a umtute vumah tleuhnak suak tuh i,” tiin lo ti awng i.

¹⁷ Ciami can ai panin Jesuh in, “Ning sual sir tu ih, zaimantifangin vancung ukhnak nong zo i,” tiin thurelhnak ham pan ihang.

Jesuh In Nga Pomtute Pali Ko I

¹⁸ Jesuh tu Galilee Tili kamah a vak laiah nga pomtu unaute pahnih, tili songah sur vorh ai nga pom kawm hnelhno hmu i. Ciami unaute pahnih tu Simon (Peter ti ai komi) le a nau Andrew i.

¹⁹ Jesuh in, “I hnenah kawi kawm tu ilai minung pomtu ah ning bawn tuh ing,” ti i.

²⁰ Cia sawngpah in amahte sur heh zam ai Jesuh hlun kawm i.

²¹ Feh betbo ai Zebedee ai fapate pahnih James le John unaute hmu i. A pa Zebedee thawn khawm songah um tlang ai amahte surte tholh tlang phetpho i. Jesuh in ko ai,

²² Cia sawngpah in a khawm le a pa zam in Jesuh hlun kawm i.

Jesuh In Zirh I, Mi Cakruai I

²³ Jesuh tu Galilee peng khuahacang ah feh ai synagogue cangcang ah thu zirh betbo i. Vancung Ukhnak Thuthangpha rel betbo ai urhnak a phunphun a tuartute khai cakruai betbo i.

²⁴ A thula tu Syria ram hmuahhmuah tianin thang sio i; ciamanin urhnak le harsahnak a phunphun a tuartu, khuasia ai pom mite, merai ur naitute le a ze mite khai a hnenah koih tlang ai amahte veksen in cak tlang sek i.

²⁵ Galilee le Dekhapolis peng, Jerusalem le Judea peng le Jordan Runpui ralkhat in mi tampui kawi tlang ai ani tu hlun tlang i.