Matthai 27 - Zanniat Bible

Pilat Hnenah Jesuh Fehpui I

¹ Zing lam fangin suangbawi upate le Judah upate in Jesuh rek tuhin tawlrel tlang i.

² Thir cikcin in a khit hnuaah fehpui ai Rome acuzah bawi Mangki Pilat kut ah pe i.

Judas Thihhnak

³ Mi zuar tu Judas in Jesuh tu thukhan ai mawh phurh tlang i, ti a ling fangin a sir ze in tangka sawm thum heh suangbawi upa le Judah upate hnenah khirh leh i.

⁴ “Mawhhnak nai lo pa thihhnak hleng tianin zuar manin i sual ze i,” tiin ti i. Anite in, “Kin tu zaikhai kin poi lo i? Na daihhnak bangin bawn tu,” tiin ti tlang i.

⁵ Judas in tangka sawmthum heh Biakinn songah lon ai suak leh i. Feh ai amah veve a hawng ri in awk dun ai thi i.

⁶ Suangbawi upate in ciami tangka khul tlang ai, “Hemi tangka heh thisan tangka a imanin biakinn tangka dahhnak songah dah tuh heh kin dan in daih lo i,” tiin ti tlang i.

⁷ A thula rel tlang ai veksen lungkhimhnak in ciami tangka heh Bel Bawntu ai lo laihnak ah hmang tlang ai cia lo heh ramdang mite phumhnak hlanmual ah hmang i.

⁸ Ciamanin cia lo khiah tunnia tianin, “Thisan lo,” tiin ko lai i.

⁹ Ciatihin prophet Jeremiah ai a relciahnak khim i. Prophet Jeremiah in, “Israel mite in ciami pa laihnak ah lungkhim tlang ai a sehhnak tangka sawmthum lang ai,

¹⁰ Bawipa in thu i pehnak bangin bel bawntu lo laihnak tuhin hmang tlang i,” tiin ti awng i.

Pilat In Jesuh Thu Zawt I

¹¹ Jesuh tu Rome acuzah Mangki bawi hmaiah ding ai Mangki bawipa in, “Judah mite ai Kumpibawi isim?” tiin zawt i. Jesuh in, “Nangmah in ti isi” tiin sawn i.

¹² Ikhalselai Suangbawi upa le Judah mi a dang upate ai mawh a hlukhnak khiah zaikhai sawn lo i.

¹³ Ciamanin Pilat in, “Amahte mawh hlukhnak hmuahhmuah heh ling lo isim?” tiin ti i.

¹⁴ Ikhalselai Jesuh in kam khat khai sawn nuam lo i; ciamanin Mangki bawipa tu a khuaruahhar ngai i.

Jesuh Thi Tuhin Thurelhnak

¹⁵ Kansuak Puai cangcang fangin Mangki bawipa in, misenpui in suah tuseh ti ai ngenhnak thawngtla pakhat khiah suakruai dan i.

¹⁶ Cialai ah mi zongzong in linghnak thawngtla pakhat um ai a hming tu Jesuh Barabbas i.

¹⁷ Mipui a tawk dun fangin Mangki bawi Pilat in, “Aisu hlat tuhin ning daih i? Jesuh Barabbas maw Messiah tihnak Jesuh sawn?” tiin zawt i.

¹⁸ Judah upate in iksikhnak thu menma manin Jesuh heh a kut ah hlengruai i, ti fiang ngai in Pilat in ling i.

¹⁹ Pilat tu thukhanhnak innpui songah a to lakah a nupui in, “Mawhhnak zaikhai nai lo pa heh a vumah zaikhai bawn mah. Zaimantifangin tunnia i mang ah amah manin tuarhnak tampui tawk ing,” tiin thucah i.

²⁰ Suangbawi upate le a dang upate in misenpui heh forh ai misenpui in Barabbas hlat in Jesuh rek tuhin Pilat khiah ngen tlang i.

²¹ Ikhalselai Pilat in, “Hemite pahnih lakah aisu sawn hlat inglai ning daih pa?” tiin misenpui zawt lala i. Mipui in “Barabbas,” tiin ti tlang i.

²² “Ciatih ilekhaw Messiah tihnak Jesuh tu akontih in bawn tuh ing?” tiin Pilat in zawt i. “Thinglamteh vumah rek tu,” tiin amahte veksen in ti tlang i.

²³ Ikhalselai Pilat in, “Ziang sualhnak ber bawn i?” tiin zawt i. Ciafangin, “Thinglamteh ah khen tu,” tiin amahte au ben tawp in au tlang dekdo i.

²⁴ Pilat in ciatihin a zawt hnelhno heh hnempuihnak um lo ai misenpui in hnaihnokhnak lehlam suakruai pang tuh ti a hmu manin tidap lang in misenpui hmaiah a kut som ai, “Hemi mawhhnak nai lo pa thihhnak ahhen kai tel lo ing! Ningmah ai bawnhnak i,” tiin ti i.

²⁵ Ciafangin misenpui in, “Hemi pa thihhnak ai thisan tu kinmah le kin tesinfate vumah hleng tu ngawn seh,” tiin ti tlang i.

²⁶ Ciatihin Pilat in amahte caah Barabbas hlat sah i; cen Jesuh tu vitruai hnuaah thinglamteh vumah rek tuhin amahte kut ah pe i.

Ralkapte In Jesuh Zohsuam Tlang I

²⁷ Cen Pilat ralkapte in Jesuh khiah Mangki bawipa inn ah fehpui ai misenpui tu a hiangah khawm tlang i.

²⁸ A hnikpon hawk ai ponsan silh i.

²⁹ Cen hling ai bawnhnak lukhuk a lu ah khuk i; cen a kiahhan lam kut ah fung awh ruai i. A hmaiah a khuk caicin in zohsuamhnak thawn, “Judah Kumpibawi a nun sau tuseh,” ti tlang i.

³⁰ Cil thuih tlang i, fungkek lang ai a lu vit tlang i.

³¹ Ciatih ai a zohsuam tlang hnuaah a pon hawk ai amah hnikpon kel silh leh i. Cen thinglamteh vumah rek tuhin fehpui i.

Thinglamteh Vumah Jesuh Khen Tlang I

³² Ciatihin a feh laitak ah Cyrene khuami Simon hmu ai ralkapte in Jesuh ai thinglamteh heh khengkhebel in phurruai i.

³³ Golgotha tihnak hmun hleng i. Golgotha tihnak tu, “Luruh Hmun,” tica i.

³⁴ Ciata ah Jesuh tu si kha thawn a roihhnak cabitti pe tlang i, Jesuh in tep ai ding lo i.

³⁵ Jesuh tu thinglamteh vumah khen ai a hnikpon heh camciafung duk in zem tlang i.

³⁶ Cia hnuaah to tlang ai ani tu kil tlang i.

³⁷ “Hemi pa tu Judah Kumpibawi Jesuh i,” tiin amahte sual hlukhnak ngan ai a lu vumah tar i.

³⁸ Cen mihrokhrawl damiahte pahnih Jesuh thawn thinglamteh vumah khen ve i; pakhat tu a kiahhan lamah, a dang pakhat tu a kekeh lamah tar i.

³⁹ A hiangai sukso a vaktute inkhai imm in lu nem tlang ai,

⁴⁰ “Biakinnpui bal in ni thum songah sa leh tuh ing ti ilo sim! Pathian ai Fapa ilesikhaw nangmah veve o dun tulai thinglamteh vuman tolh tu!” tiin zohsuam tlang i.

⁴¹ Cia bangin suangbawi upate le Danthiam mite le Judah upate in zohsuam tlang ai,

⁴² midang tu o ben i, ikhalselai amah veve tu o dun ben lo i! Israel Kumpibawi ilo im? Tun rori ah thinglamteh vuman tolh selai sang tuh i ing!

⁴³ Pathian rinsan ai Pathian ai Fapa ing ti i! Pathian in o na ngai maw sik tlang bang ngasing!” tiin nautathnak ponkam in ti tlang i.

⁴⁴ Amah thawn a khenbetmi damiah inkhai ciatih bangin zohsuam ve i.

Jesuh Thihnak

⁴⁵ Sun laitak ah ram song pumpuhluk ah khuathimpui tlung ai nazi pathum song thim i.

⁴⁶ Zan lam nazi pathum ah Jesuh tu cawm ngai in au ai, “Eli, Eli, lema sabachthani?” ti i; a sullam tu, “I Pathian, I Pathian, zaimanin i zam isi?” ti i.

⁴⁷ Ciata ah a dingtu hrekkhatte in za ai, “Elijah ko i,” tiin ti tlang i.

⁴⁸ Amahte lakai pakhat tu dawp vurvo ai ti a hawp thai ngai pon lang ai cabit songah a nim hnuaah fungkek vumah pen ai Jesuh heh dingruai tum i.

⁴⁹ Ikhalselai midang in, “Um rih tu, amah otu tuhin Elijah a kawi le kawi lo sik tlang ngasing,” tiin ti i.

⁵⁰ Jesuh tu cawm ngai in au lala ai a haihawh bo i.

⁵¹ Cen Biakinn ponzar tu a vum lamin a hnia lam tian khan hnih in zik i. Lailung hlin sio i, lungpui khoi sio i,

⁵² Hlankuate hong sio ai a thi cia mi Pathian mithiangte tho leh i.

⁵³ Amahte hlan song ṭen in suak tlang ai Jesuh tu hlan in a tho leh hnuaah Khua thianghlim songah lut tlang ai mi tampui hmaiah lar i.

⁵⁴ Jesuh hlan kiltu ral bawipa le ralkapte in hlinhlin le thil dang a canghnak hmuahhmuah hmu fangin tihik tlang ai, “Hemi pa tu Pathian fapa taktak i,” tiin ti tlang i.

⁵⁵ Galilee ram in Jesuh a hlun awngtute le a bawm awngtute nupang tampui um ai a hla thah in cuan tlang i.

⁵⁶ Ciami nupangte lakah Mary Magdalene, James le Joseph ai nu Mary le Zebedee ai nupui khai tel tlang i.

Jesuh Phumhnak

⁵⁷ Zan lam cu fangin Arimathea khua in milian pa pakhat hleng i. A hming tu Joseph i ai Jesuh hnuahluntu pakhat ve i.

⁵⁸ Pilat tawk ai Jesuh luang ngen i. Jesuh ai luang heh Joseph hnenah pe tuhin Pilat in thupe i.

⁵⁹ Ciatihin Joseph in Jesuh ai luang heh lang ai pon thar nemniu in tuam ai,

⁶⁰ Amah ai hlan tuhin lungkherhnak hlan thar songah phum i. Cia hnuaah lungtleppui in hlan kua heh kham ai tlung i.

⁶¹ Mary Magdalene le a dang Mary tu ciata ah hlanmual lam hoi in to kawm i.

Hlan Kiltute

⁶² A thangha Sabbath nia ah suangbawi upa le Farasite in Pilat tawk tlang ai,

⁶³ “Bawipa, he thudonreltu pa in a nung laiah, ‘Nithum hnuaah tho leh tuh ing,’ tiin ti awng i.

⁶⁴ Ciamanin a hlan heh phatak niu in ni thumhnak nia tian kilruai tu; Ciahlahle a hnuahlunte in a luang ru tuhai misenpui heh thihhnak in tho leh zo i, tiin zawl tlang tuh i. Hemi hnuata zawlhnak heh hmasa zawlhnak tahin poi tuh sawn i tiin ti tlang i.

⁶⁵ Pilat in, “A kiltu Rome ralkapte dah tu ilai hlan heh a him thai tawp in bawn tu ih,” tiin ti i.

⁶⁶ Ciamanin feh ai hlan khiah a him thai tawp in bawn i, hlan khamhnak lungtlep khiah tacik khen ai sumpua in phatak ngai in kilruai i.